1 Timoteo 6 - Osotua Ng'ejuk

¹ Ore singan pookin ootii abori enjata, njeiken laitoriak lenye tʼenganyit pookin, pememori engarna Engai o enkiteng'enare.

² Ore lelo, looata laitoriak ooiruk, nememenaa tiaraki nara lalashera; kake eikash, teni epon ninje aaisyayaki ninje, amu era ninje lairukok naa kiroteti oong'ar emunyani. Nteng'ena kuna baak nididing'!

³ Teni eiteng'en oltung'ani nkulie baak nemebik tiatua rorei ooi-shiuniisho lʼOlaitoriani lang' Yesus Kristos o tiatua enkiteng'enare narisiore orregie lʼEngai,

⁴ neiteija ilo elukunya pesho, nemeyolo toki, neata emoiyan naaunye nkikilikwanat o njangarrin, naapukunye engilata e tau, enkitarrikino, emoroto, elapo torrono,

⁵ olarrabal loo ltung'anak ooitarruoitie eng'eno enye netooruoki esipata, loodamu, aajo orregie lʼEngai etumie endupoto. Tapaashare looba nji!

⁶ Kake era emokunoto Engai o engiraishu oo naatai, engong'u sapuk endupoto;

⁷ amu eitu kiau toki atua olmaa, eibala, ajo mikindim aaea toki.

⁸ Ore pikiata ndaikin o ilkilani, matigirata too nena.

⁹ Ore kulo looyeu neaku ladupak, neurokino atua enkitasuroto o erreshet o ilng'warraitin kumok lʼemodaishu o looata enkitameito looitadoiki iltung'anak atua erruoroto o enkiminata.

¹⁰ Amu era enyorrata oo ngoshola entonata oo ntorrok pookin, neng'war kulekai ena neimalimal neing'ua enkirukoto nepej aten too mioitin kumok.

¹¹ Kake iye, letung'ani lʼEngai, kweta kuna! Tonyoku esupato, emokunoto Engai, enkirukoto, enyorrata, olng'iria, emborran!

¹² Taarai tʼearata sidai enkirukoto, mbung'a empuan oo nkatan pookin nikimpotieki nimbalu enkibalunoto sidai tʼengomom oo ljaken kumok.

¹³ Aaitanap iye tʼengomom Engai naisho pookin enkishui, o tʼengomom e Yesus Kristos oijakenuo tʼengomom e Pontius Pilatos enkibalunoto sidai;

¹⁴ mbung'a enkitanapata, metii entibili nemetii enkitadiata, metabana neaku elioroto Olaitoriani lang' Yesus Kristos,

¹⁵ naitadol tʼenkata enye ilo lora tesh, naa ninye oata engolon pookin ake, ora olkarsis loo lkarsisi pookin o Olaitoriani loo laitoriak pookin,

¹⁶ naa ninye ake lemee, omany tiatua eong'an enemeidim atijing'a oltung'ani, neitu edol oltung'ani ninye nemeidim atadua; enenye enkitook o enkarsishu oo nkatan pookin. Amen.

¹⁷ Ntanapa ladupak lootii atua ele maa, pemewuasa, pemeiruk masaa naaibelibel, kake Engai naishiu, naitarasaki yook pookin tʼenkumoi, pekisotu tʼeng'ida,

¹⁸ peitobir ninje sidan, netum endupai oo nkitobirat sidan, neishooio tʼeng'ida, neretisho,

¹⁹ neiturrur aten masaa naaku entonata sidai e idya nalotu, neibung' empuan nasipa.

²⁰ Iye, Timoteos, torripo kuna nikinjooki, tanya rorei le pesho lʼentung'anishu o njangarrin eyolounoto elejare,

²¹ amu etusuja kulekai nena neiminye enkirukoto. Njoo kiboitare eng'adunoto. Amen.