1 Timoteo 2 - Osotua Ng'ejuk

¹ Akae, adiding'isho, peitaai tʼenkata elukunya oo ntokitin pookin omonot, sayat, sayakinot, ashen too ltung'anak pookin,

² too lkarsisi o too pookin looata engolon, pekiata empuan girati o nʼeseriani tʼorregie lʼEngai o tʼenkishaa pookin.

³ Amu sidai ena neiting'idisho tʼengomom Engai, Olaitopuani lang',

⁴ loyeu nepok iltung'anak pookin nepuonu atua eyolounoto esipata.

⁵ Amu etii Engai nabo netii olaidikidikoni obo lʼEngai o loo ltung'anak, oji oltung'ani Kristos Yesus,

⁶ loishooiye kion, peaku elakunoto too pookin, enjakenishu too nkatan enye;

⁷ te ina aaitaaki olkilikwai o olairriwani, (airo esipata, malejisho) o olaiteng'enani loo loreren lemeata Engai tiatua enkirukoto o esipata.

⁸ Akae, ayeu nesaisho leak tʼewueji pookin neilepie ngaik sinyat, metii engoro o enking'arrirroto.

⁹ Neija si ng'oroyok, njekaj aten tʼolkila oikishaan te nebo o nganyiti o eng'eno bioto, neme tʼenjetata oo lpapit o tʼeikare e sahabu o noo lulu arashu tʼenkishopoto oo lkilani oogol enkinyang'a,

¹⁰ kake anaa peaku too ng'oroyok naaibalu enkuretishu Engai too nkitobirat sidan.

¹¹ Ore eng'oroyoni, njeiteng'enuo tʼolgira o tʼening'oto.

¹² Maisho eng'oroyoni eiteng'enisho, arashu eitore olee, kake njegira.

¹³ Amu Adam etang'asaki aaitobir, neitokini Eva.

¹⁴ Eitu eleji Adam, kake eng oroyoni etelejaki, neau enkitarruoto.

¹⁵ Kake eitopoki tʼeishoi oo nkera, teni ebik ninje tiatua enkirukoto o enyorrata o esinyatishu te nebo o eng'eno bioto.