1 Timoteo 1 - Osotua Ng'ejuk

¹ Paulos, olairriwani le Yesus Kristos tʼenkitanapata Engai, Olaitopuani lang', o Olaitoriani Yesus Kristos lora eanyunoto ang':

² en ino, Timoteos, enkerai ai nasipa tʼenkirukoto, eng'adunoto o enkordunoto o eseriani naing'ua Engai, Papa lang', o Yesus Kristos, Olaitoriani lang'.

³ Anaa idya naaitanapa iye, pibik te Efesos enkata nalo Makedonia, nintanap kulekai, pemeiteng'en nkulie baak,

⁴ nemening' natinin e opa o noo lmakui nemeata enkiting'oto, naayau nkilikwanat nelang' enjetakinoto e atua Engai tiatua enkirukoto.

⁵ Kake enkitabaiaroto oo nkitanapat, naa enyorrata naing'ua oltau oibor o oltoilo sidai lʼoltau o enkirukoto nemeata esungureishu.

⁶ Ore kulekai etapaasha nona neibelekenyakino ororei le pesho,

⁷ neyeu neaku laiteng'enak lʼesipata, nemeyolo enalimu arashu enaitasheye.

⁸ Kake kiyolo, aajo sidan nkitanapat, teni eitobir oltung'ani abaraki,

⁹ neyolou ena, ajo eitu epiki tʼoltung'ani supat, kake etipikaki too looitobir ntorrok o lemening'isho, too lemeure Engai o laitarruok, too lemesinyari o looimaki engarna Engai pesho, too lootara menye o lootara ng'otonye, o laarak metuata,

¹⁰ o looitobir mbaak torrok oo nkiri, o looisokorisho, o loopur iltung'anak, o lalejak, o looituruj elejisho, o teni etii olekai bae lemenyanyukie enkiteng'enare naishiuniisho,

¹¹ tʼerisioroto euangelion kitok Engai tesh, naaishooki nanu, painosu.

¹² Aliki ashe Kristos Yesus, Olaitoriani lang', Aaitagolo, amu aatadua ara airukoni naapik atua enkisyayare,

¹³ lara tʼenkata elukunya olamoroni o olamirani o olaotikinoni loo ntorrok; kake aaibung'akaki engoshoke nanana, amu aitobira opa nena mayolo, maata enkirukoto.

¹⁴ Kake etaa kitok naleng' empuris Olaitoriani lang' te nebo o enkirukoto o enyorrata natii atua Kristos Yesus.

¹⁵ Esipa ele rorei neaku, peng'amu pookin, ajo eewuo Kristos Yesus atua olmaa, peitopok laitarruok, naa nanu ol elukunya lenye.

¹⁶ Kake te ina aaibung'akaki engoshoke nanana, peitadolu Yesus Kristos tʼenkata elukunya tiatua nanu olng'iria pookin, peaku entoki enkiteng'enare oo kulo loopuo aairuk ninye, petum empuan oo nkatan pookin.

¹⁷ Njetum olkarsis loo nkatan pookin o Engai nabo ng'en, nemerruoio, nemelio, enganyit o enkitook nkatan pookin o nkatan pookin.

¹⁸ Ena enkitanapata naaisho iye, enkerai ai Timoteos, tʼerisioroto oo nkitayolounot nitang'asa atum, piarare enjore sidai tiatua ninje,

¹⁹ niata enkirukoto o oltoilo sidai lʼoltau, naa ninje eiturraitie kulekai, netigile emeili enkirukoto enye.

²⁰ Ore too lelo naa Humenayos o Aleksandros, laitarasaka satan, peiboiori nememorisho.