1 Petero 2 - Osotua Ng'ejuk

¹ Akae, enturrai entorroni pookin o olosek pookin o enkitusupatuo o engilata e tau o elikioroto pookin;

² entang'warr anaa nkera naa eneiunyeki kule eng'eno nemeata olosek, pipuopuo aabulaki too kuna atua enkitopuata,

³ teni inyorrinyorra, aajo ebor Olaitoriani.

⁴ Ipuonunu enetii ninye anaa osoit oishiu loiturraitie iltung'anak, kake lotegelua Engai negol enkinyang'a.

⁵ Enteshet si ndai aten anaa soito looishiu, piakuku engaji emumuaishu, nipuopuo aaitobir enkyas sinyati olaidasani, ninjoioio nkidasareitin emumuaishu naaiting'id Engai te Yesus Kristos.

⁶ Onaa etisiraki tiatua esirata: Ng'orai, apik atua Sion osoit kitok lʼolpijata otegeluaki negol enkinyang'a, naa oloiruk ninye, nemelakurru.

⁷ Akae, nera ninye too ndai looiruk, lʼenkinyang'a nagol; kake etaa ele soit, loiturraitie lashetak neaku olkitok lʼolpijata lʼengaji, too lemeiruk

⁸ osoit lʼenkikoboto o osoit lʼenkitarrikino; nepuo aaikob ninje aten tiatua ororei nemening'isho, etipikaki ninje baiki atua ena.

⁹ Kake irara ndai eishoi nategeluaki, enkyas olaidasani olkarsis, olorere sinyati, olorere lenye, pitumutumu aainosutu sidan oloipotoko ndai tʼenaimin atua enkilang'et enye naiputukunyi;

¹⁰ leitu irara opa olorere, kake irara taata olorere lʼEngai, leitu eibung'akini ndai engoshoke nanana, kake eibung'akaki taata.

¹¹ Lanyor, adiding' ndai anaa lomon o iltung'anak lʼolototo, pipaasharere ilng'warraitin loo nkiri looarare Olmumua

¹² niatata orregie sidai tiatua loreren, pedol kulo looimaki ndai anaa laitobirak loo ntorrok, nkyasin inyi sidan neitadaraa Engai tʼengolong' eleenoto.

¹³ Entipik aten abori enkitoria pookin oo ltung'anak tʼolbae lʼOlaitoriani, ten aa olkarsis lolang' kulekai,

¹⁴ ten aa larikok looirriua ninye, pelaaki laitobirak loo ntorrok neitadaraa laitobirak loo sidan.

¹⁵ Amu era ena eyeunoto Engai, pipising'ing'i nkutukie o emodaishu oo ltung'anak lemeata eng'eno, intobiribiri sidan;

¹⁶ anaa loolakuno, nimintaata elakunoto anaa enaopoo entorroni, kake anaa laisyayak lʼEngai.

¹⁷ Entaa kituak iltung'anak pookin, entonyor lalashera, enturia Engai, enjoo olkarsis enkitook.

¹⁸ Laisyayak, entoning laitoriak tʼenkuretishu pookin, me isidan o loobor ake, kake baiki lemebor,

¹⁹ Amu era ena empuris, teni eng'iriaki oltung'ani nkisilot tʼolbae lʼoltoilo lʼoltau edamu Engai, netum osina pesho.

²⁰ Kaa kitadararoto ena, teni ing'iriri neari ndai intarruorruo? Kake teni intobiribiri sidan neisili ndai ning'iriri, era ena empuris tʼengomom Engai.

²¹ Amu eipotoki ndai te ina, amu eisiloki baiki Kristos tʼolbae linyi neing'uaiki ndai olponoto, pisujusuju rregiei lenyena;

²² leitu eitobir enkitarruoto o nabo neitu etumi olmarengei o obo tiatua enkutuk enye;

²³ leitu emorisho, etamoroki ninye; neitu eitureishe, eisiloki ninye; kake eitarasaka pookin ele loigwenaki aitorio;

²⁴ olotanapa nkitarruot ang' tiatua osesen lenye shumata enjata, pikinjiuoki esupato, kituatakitia nkitarruot; injiutuo too lbaak lenyena.

²⁵ Amu nanyanyukie ntare naaisardaka, kake etorrinyokoki ndai taata olairritani o olaing'orani loo lmumuan linyi.