1 Petero 1 - Osotua Ng'ejuk

¹ Petros, olairriwani le Yesus Kristos: too lomon ootegeluaki, ooisardakakinote Pontus o Galatia o Kapadokia o Asia o Bitinia,

² loora gelunot lʼEngai Papa tʼeyolounoto enye neba opa, o tiatua esinyaroto Olmumua Sinyati metabaiki ening'oto o enkisuakinoto osarge le Yesus Kristos. Metoponari eng'adunoto o eseriani Engai too ndai!

³ Njeitadarari Engai o Menye lʼOlaitoriani lang' Yesus Kristos, lotoiwuo yook kat are tʼenanai enye kitok e oshoke, pekitum eanyunoto naishiu tʼempiunoto e Yesus Kristos too lootuata,

⁴ pekitum enjung'o nemerruoio, nemeata entibili, nemeinaaia, natorripokoki ndai te shumata,

⁵ ndai loorripi tiatua engolon Engai tʼenkirukoto, pitumutumu enkitopuata naitobirieki, peboluni tʼenkata enkiting'oto.

⁶ Nipuopuo aagalalu te ina kata, baiki teni meata kata nemeilishieki ndai enkiti kata too nkitasurot oo muain kumok,

⁷ petumi enkirukoto inyi enataleenoki neata enkinyang'a kitok nelang' esahabu namuta naleeni tʼenkima, neaku enkitadararoto o enkitook o enganyit tiatua embolunoto e Yesus Kristos,

⁸ leitu idolidolo ninyorrinyorro nirukuruku ninye nimidolitata taata, nipuopuo aagalalu tʼeng'ida nemeiroroi o enaitadarari,

⁹ nipuopuo aaea enkiting'oto enkirukoto inyi, nera enkitopuata oo ltauja linyi.

¹⁰ Ore ina kitopuata, eing'orutua neikeernu layolounok ooitayolo ena ng'adunoto nipuopuo aatum ndai.

¹¹ Eikeernutuo, aajo kaa kata arashu kaa pukunoto natuutua Olmumua le Kristos otii atua ninje, netang'asa aijakenu nkisilot e Kristos o enkitook nasuju tekurum.

¹² Etabolokoki ninje metayolo; amu eitu eisyayaki aten, kake ndai, tiatua nena baak naainosakitia taata ndai lelo ooakitia ndai euangelion tʼOlmumua Sinyati, oirriuaki aitung'ua shumata, naa mbaak naang'war si ilmalaikan pedol.

¹³ Onaa, enteen mpolosi oo ndamunot inyi, enjololoto, enting'idare metabaiki enkiting'oto empuris nayakini ndai tiatua embolunoto e Yesus Kristos,

¹⁴ anaa nkera naaning'isho, emimbung' orregie loo lng'warraitin linyi lʼenkata elukunya litonyorra miyololo,

¹⁵ kake anaa peyeu oloipoto ndai, ora sinyati, entaa si ndai sinyat tiatua orregie pookin,

¹⁶ amu etisiraki: njoo irara sinyat, amu ara nanu sinyati.

¹⁷ Naa tiaraki nimpotipoto ninye Papa oigwenaki oltung'ani pookin anaa petiu enkyas enye, meing'oraa entemet enye, entilimanata tiatua enkuretishu tʼenkata inyi nitiiyeiye ene,

¹⁸ iyololo, aajo eitu elakuni ndai too naarruoio, too ngoshola arashu tʼesahabu, tʼemokunoto inyi musana nitang'amutua too loominyi,

¹⁹ kake tʼosarge ogol enkinyang'a anaa lʼembalelo neitu eitarruo nemeata entibili, le Kristos,

²⁰ loiturukieki ayolou, eton eitu epiki entonata olmaa, kake loitalioiyoki tʼenkiting'oto oo nkatan tʼolbae linyi,

²¹ ndai liruko te ninye Engai, naitopiwuo ninye tiatua lootuata neisho ninye enkitook, peiye iatata enkirukoto inyi o eanyunoto e atua Engai.

²² Esuja iltauja linyi tiatua ening'oto esipata tʼolmumua, piatata enyorrata oo lalashera nemeitusupatuo, entonyorrata too ltauja naleng',

²³ anaa lootoiwuoki kat are, me tʼembeu erruoroto, kake te nemerruoio, tʼororei lʼEngai naishiu obik nkatan pookin.

²⁴ Amu Era enkiring'o pookin anaa olkujita, o enkitook enye pookin anaa entapukai olkujita; etoiyo olkujita nerarunye entapukai;

²⁵ kake ebik ororei lʼOlaitoriani nkatan pookin. Nera ninye ele rorei loinosuaki too ndai.