1 Ilsesalonike 3 - Osotua Ng'ejuk

¹ Ore peaku mekure kindim aating'iria, nikinyor, aajo eing'uaikini yook oopeny te Atenai

² nikirriwaa Timoteos, olalashe lang' o olaisyayani lʼEngai, naa olaretoni lang' too lomon lʼeng'ida le Kristos, peitagol neilejilej ndai tʼenkirukoto inyi,

³ pemenanau oltung'ani tiatua kulo sinaitin; amu iyololo, aajo etipikaki yook nona.

⁴ Ore en opa kata nikitii e nebo o ndai, kitolikitio yook ndai tʼenkiterata, aajo kipuo aatum sinaitin, anaa petaa niyololo si ndai.

⁵ Tiaraki nemekure aidim ating'iria, nairriwaa olkilikwai, payolou enkirukoto inyi, pemeaku eitasur ndai olaitasuroni neaku enkyas ang' en e pesho.

⁶ Kake ore pelotu Timoteos aing'ua ndai enikitii neliki yook enkirukoto inyi o enyorrata inyi, nidamunyenve yook oshi ake too sidan niyeuu naleng' nidolidolo yook, anaa si yook kiyeu nikidol ndai:

⁷ akae, eilejilejaki yook, lalashera, tʼolbae linyi tiatua emion ang' pookin o osina lang' tʼenkirukoto inyi;

⁸ amu kinjiu yook taata, teni intasheshe ndai tiatua Olaitoriani.

⁹ Amu kaa ashe kindim aatalaaki Engai tʼolbae linyi tʼena ng'ida pookin niking'ida too ndai tʼengomom Engai ang'?

¹⁰ Kiomon Engai naleng' dama o kiarie, pikidol ngomomi inyi nikitum aaitobira ina natong'oro tʼenkirukoto inyi.

¹¹ Ore Engai Papa lang' openy o Olaitoriani lang' Yesus Kristos, njeitorioo ngoitoi ang' maetu enitiiti.

¹² Metoponai Olaitoriani enyorrata tiatua ndai aten o too ltung'anak pookin, anaa eniki-tiu yook too ndai,

¹³ peitagoli iltauja linyi nemeata entibili tiatua esinyatishu tʼengomom Engai o Papa lang' metabaiki elotunoto Olaitoriani lang' Yesus Kristos te nebo o sinyat lenyena pookin.