1 Ilkorintio 2 - Osotua Ng'ejuk

¹ Ore si nanu, lalashera, eitu alotu enitiiti ndai tʼenkishaa ororei arashu eng'eno ainosaki ndai enjakenishu Engai.

² Amu eitu aikenaki kion payolo toki too ndai neme Yesus Kristos otooshokoki esalaba.

³ Natii nanu atua ndai tʼenjalan o tʼenkuretishu o tʼenkikirikirata naleng'.

⁴ Ore ororei lai o enkinosunoto ai, nemera ororei sidai lʼeng'eno oo ltung'anak, kake ol enkitaduaroto Olmumua o tʼengolon,

⁵ peiye eunokino enkirukoto inyi, me tʼeng'eno oo ltung'anak, kake tʼengolon Engai.

⁶ Kake kilimu eng'eno too lootabaitie, me eng'eno ele maa, neme en oo lkituak lʼele maa, loopuo aamuta,

⁷ kake kilimu eng'eno Engai tiatua emikio, natushumaki, natipika Engai tʼenkiturukoto e opa moitie, peaku enkitook ang';

⁸ neitu eyolou ninye o obo loo lkituak lʼele maa; amu ten emutu etayoloutuo, anaata eitu eoshoki esalaba Olaitoriani lʼenkitook;

⁹ kake anaa petisiraki: Neitu edol engong'u, neitu ening' enkiyok, neitu ejing' atua oltau lʼoltung'ani, ninje eitobiraka Engai kulo loonyor ninye.

¹⁰ Kake etaboloko yook Engai ena tʼOlmumua lenye; amu eirengesu Olmumua mbaak pookin, baiki ngasurin Engai.

¹¹ Amu kang'ai too ltung'anak loyolo nʼoltung'ani neme Olmumua lʼoltung'ani otii atua ninye? Neijia meyolo o obo nʼEngai, neme Olmumua lʼEngai.

¹² Eitu king'amu yook Olmumua lʼele maa, kake Olmumua oing'ua Engai, pikitum aatayolou ng'adunot naaishoo yook Engai;

¹³ nikilimu baiki ninje, me too rorei looiteng'enu eng'eno oo ltung'anak, kake looiteng'enu Olmumua, nikingwenaki mbaak emumuaishu tʼemumuaishu.

¹⁴ Meyolo oltung'ani lʼenkop mbaak Olmumua lʼEngai, amu era te ninye emodaishu, nemeidim atayolou, amu eigwenuni ninje tʼemumuaishu.

¹⁵ Kake eigwenu ol Olmumua mbaak pookin, nemeigwenaki o obo ninye.

¹⁶ Amu kang'ai lotayolouo nkibirribiirat Olaitoriani? Kang'ai elaiteng'en ninye? Kake kiata yook nkibirribirrat e Kristos.