1 Ilkorintio 14 - Osotua Ng'ejuk

¹ Entusuj enyorrata, ninyokinyoko aaing'oru nkishoorot emumuaishu, enaikash teni intayolouu ne akenya.

² Amu ore ilo oiro tʼolekai ng'ejep, nemeirorie iltung'anak, kake Engai; nemening' olekai, eiro ninye ake mikiot tʼOlmumua.

³ Kake oloitayolou ne akenya, neirorie iltung'anak, peaku nʼenjetakinoto o nʼendiding'aroto o nʼenkilejilejata.

⁴ Ore oloiro tʼolekai ng'ejep, neshet kion; kake oloitayolou ne akenya, neshet esirit.

⁵ Kake ayeu taata ndai pookin niroro too lng'ejepa, o naleng', teni intayolouu ne akenya. Amu ore oloitayolou ne akenya, nelang' oloiro too lng'ejepa, teni meitaai ninye ninje, peiye etum esirit enjetakinoto.

⁶ Onaa, lalashera, ten emut eaku alotu enitiiti, airo too lng'ejepa, kaa dupoto itumutumu te nanu, teni mairorie ndai tʼembolunoto ana tʼeyolounoto ana tʼenkitayolounoto ana tʼenkiteng'enare?

⁷ Neijia etiu ntokitin nemeishiu naaisho oltoilo, anaa enkisulet arashu enkinanda; teni meisho ninje iltoiloi ooro, kaji eikuni teni eyolouni enaoshi tʼenkisulet arashu tʼenkinanda?

⁸ Arashu teni eoshi emowuo tʼoltoilo lemeyolounoi, kang'ai oitobirakinore enjore?

⁹ Neijia si itiuu ndai, teni iroro too lng'ejepa nimiatata rorei ooyolounoi, kaji eiko teni eyolo iltung'anak, enilimumu? Amu iroro anaa atua enkijape.

¹⁰ Etii iltoiloi loo muain kumok tiatua olmaa, kake metii nemeyolounoi.

¹¹ Teni mayolou enkutuk enye, naaku omoni tʼele oiro, neaku ilo oiro, olomoni te nanu.

¹² Neijia si ndai liyeuu nkishoorot emumuaishu, entonyok aaing'oru enkumoi oo nkishoorot nishetietie esirit.

¹³ Akae, ore oloiro too lng'ejepa, njesaisho nji, peitaai si.

¹⁴ Amu teni asaisho too lng'ejepa, nesai Olmumua lai, kake meaki eng'eno ai ilmomo oltung'ani o obo.

¹⁵ Ainyo naa enaikash? Ayeu nasai tʼolmumua lai naitoki asai tʼeng'eno ai. Arany singolioitin lʼEngai tʼolmumua lai, narany tʼeng'eno ai si.

¹⁶ Kake teni imayan tʼolmumua, kaji eiko teni eiruk ele otii ewueji oo laning'ok ajo: Amen, tʼelikinoto ashe ino, teni meyolo eniroro?

¹⁷ Esipa, iliki iye ashe naleng', kake eitu eitagoli olekai te ina.

¹⁸ Aliki Engai ashe, tiaraki nairo too lng'ejepa nalang' ndai pookin;

¹⁹ kake tiatua esirit, ayeu nairo rorei imiet ake tʼeng'eno ai, paiteng'en ilkulekai, nelang' airo rorei iip kat iip too lng'ejepa.

²⁰ Lalashera, emiaku nkera tiatua eng'eno inyi; kake tiatua ntorrok entaa nkera, kake entaa baiarot tiatua eng'eno inyi.

²¹ Etisiraki tiatua nkitanapat: Ayeu nairorie ele orere too kulekai ng'ejepa o too nkutukie oo lomon, nemaaning' ninje nanu, etejo Olaitoriani.

²² Akae, era ilng'ejepa ilponot loo lemeiruk, neme loo looiruk, kake era enkitayoloto e akenya en oo looiruk, neme noo lemeiruk.

²³ Ten emutu etumo esirit nalulung'a tʼewueji nebo neiro pookin too lng'ejepa, neitoki aapuonu iltung'anak leme ng'eni ana lemeiruk, anaata mejo iatata oloirirua?

²⁴ Kake ten eaku eitayolou pookin lomon lʼEngai, nelotu olemeiruk ana olemeyolo toki, nediding' neigwenaki pookin ninye;

²⁵ ore mbaak oltau lenye naaisudori, neibalunyeki, nebatata tʼengomom enye aserem Engai, neiruk ajo etii Engai atua ndai esipa.

²⁶ Ainyo naa, lalashera? Teni itumomo ndai, niatata pookin isingolioitin lʼEngai, enkiteng'enare, embolunoto, ilng'ejepa, enkitaalata; enjoo ntokitin pookin meidipata nʼenjetata.

²⁷ Teni eiro oltung'ani too lng'ejepa, njoo metaa aare, ana teni elusoo, neaku okuni, kake tʼolkereri, ninjosho obo, peitaalu.

²⁸ Naa teni metii oloitaal, njegira ilo tiatua esirit, neirorie kion o Engai.

²⁹ Enjoo layolounok loo lomon lʼEngai eiro aare arashu okuni, ninjosho ilkulekai metirisha.

³⁰ Kake teni etum olekai oton tene embolunoto, negira ol enkiterata.

³¹ Amu indimidimi ndai pookin aatayolou, me obo ake, peiteng'enuo pookin nediding! pookin.

³² Ore ilmumuan loo layolounok, nening' layolounok.

³³ Amu ore Engai, me Engai enjangar, kake en eseriani.

³⁴ Anaa tiatua sirito pookin oo sinyat, enjoo egira ng'oroyok tiatua esirit. Amu eitu eishori ninje, peirorie, kake pening' anaa enatejo nkitanapat.

³⁵ Naa teni eyeu neiteng'enuo toki, njoo meikilikwana ilmoruak lenye too ngajijik, amu enkurruna tʼeng'oroyoni, teni eiro tʼesirit.

³⁶ Ainyo, ai ndai eing'ua ororei lʼEngai, ana ndai etabaikia ake?

³⁷ Ore oltung'ani pookin oiken kion ajo olayolounoni arashu ol Olmumua, njeyolou nona baak nasiraki ndai, amu nkitanapat Olaitoriani.

³⁸ Naa ten eaku emoda oltung'ani, njemoda.

³⁹ Akae, lalashera lainei, entonyok piakuku layolounok, emimitiki eiro too lng'ejepa.

⁴⁰ Enjoo ntokitin pookin eitoriori neaku tʼorregie sidai.