1 Ilkorintio 11 - Osotua Ng'ejuk

¹ Entaa ndai lasujak lainei, neijia anaa para nanu olasujani le Kristos.

² Aitadaraa ndai, lalashera, tiaraki nikidamumu nanu too ntokitin pookin nimbung'arere rregieita laishoo ndai.

³ Nayeu ndai niyololo, aajo era elukunya olee pookin Kristos, ore elukunya eng'oroyoni, naa olmoruo, ore elukunya e Kristos, naa Engai.

⁴ Ore olee pookin osaisho arashu oitayolou mbaak e akenya, teni eitoip elukunya, nemepik elukunya enye enganyit.

⁵ Ore eng'oroyoni pookin nasaisho arashu naitayolou mbaak e akenya, teni meitoip elukunya, nemepik elukunya enye enganyit; netiu anaa etabarnoki.

⁶ Teni eitu eitoip eng'oroyoni elukunya, njebarni ninye. Kake tiaraki nemeaku tʼeng'oroyoni, teni edung'i ilpapit ana ebarni, njeitoip elukunya.

⁷ Kake ore olee, njoo meitoip elukunya, tiaraki naa ninye emua o enkitook Engai. Kake ore eng'oroyoni, naa enkitook olmoruo.

⁸ Amu eitu eing'ua olee atua eng'oroyoni, kake eng'oroyoni natung'aiye atua olee.

⁹ Neitu eitobiri olee tʼolbae reng'oroyoni, kake eng'oroyoni tʼolbae lʼolee.

¹⁰ Onaa, eikash, teni eata engolon tʼelukunya tʼolbae loo lmalaikan.

¹¹ Kake eikununo nji: mera eng'oroyoni metii olmoruo, nemera olmoruo metii eng'oroyoni tiatua Olaitoriani.

¹² Amu anaa eng'oroyoni eing'ua olee, neija etii olee tʼeng'oroyoni; kake eing'ua pookin Engai.

¹³ Engwenare ndai oopeny: Keitoriori, teni esai eng'oroyoni Engai eitu eitoip elukunya?

¹⁴ Arashu meiteng'en ndai enkitobirunoto ajo ore teni eata olee ilpapit ooado, neaku enkurruna te ninye,

¹⁵ neija teni eata eng'oroyoni ilpapit ooado, naa enkitook te ninye? amu eishooki ilpapit aaku eopet enye.

¹⁶ Teni etii oltung'ani onyor enjangar, mikiata yook orregie oba nji, nemeata si sirito Engai.

¹⁷ Ore aisho ndai ena kitanapata, maitadaraa ndai, tiaraki nimitumomo tʼorregie oikash, kake tʼorregie torrono nelang'.

¹⁸ Ore en enkiterata, teni itumomo tʼesirit, natoning'o ajo etii rishat atua ndai, nairuk ematua oo nona.

¹⁹ Amu meata kata nemeaku rishat tiatua ndai, peibaluni loora supati tiatua ndai.

²⁰ Kake teni itumomo, nemenyai endaa Olaitoriani.

²¹ Amu teni iyeuu ninyanya endaa sinyati, neng'as pookin anya endaa enye openy, neata olekai olamei, nemera olekai.

²² Amaa, miatata ngajijik inyi ninyayeye niokioko? Arashu imenimene ndai esirit Engai nintukurrurru kulo lemeata toki? Kajoki aa ndai? Kaitadaraa ndai? Tʼolbae loo nona maitadaraa ndai.

²³ Amu atang'amua nanu tʼOlaitoriani enaishoo ndai, ajo eibung'a Olaitoriani Yesus te ina kiarie naitarasarieki ninye, olmkate

²⁴ nejo ashe nebelibel ejo: Enkoito, entaam! Era ele osesen lai logilieki ndai; enkuna ena, pekidamumu nanu.

²⁵ Neijia eibung'a baiki enkwaru, eidipa endaata, ejo: Era ena kwaru osotua ng'ejuk tiatua osarge lai; enkuna ena oshi, teni iokioko, pekidamumu nanu.

²⁶ Amu oshi, teni inyanya ele mkate niokioko ena kwaru, enosutu enkea Olaitoriani, metabana nelotu ninye.

²⁷ Ore olonya olmkate neok enkwaru Olaitoriani, meitobirakino, nelatumoki kion earata osesen o osarge lʼOlaitoriani.

²⁸ Akae, njeleen oltung'ani kion, petum ainosa nji ele mkate neok ena kwaru.

²⁹ Amu olonya neok, meitobirakino, nenya neokoki kion enkigwena, tiaraki nemeitaa kitok osesen lʼOlaitoriani.

³⁰ Onaa, etii atua ndai ilkumok loora menat o loomoiyaa neirura ematua kitok.

³¹ Amu teni kingwenaki aten, nemeigwenakini yook.

³² Ore peigwenaki yook Olaitoriani, neitubuluni yook, pemedeki yook te nebo o olmaa.

³³ Onaa, lalashera lainei, teni itumomo te nebo aanya endaa, entaanyunoto ndai aten.

³⁴ Ore teni eata obo olamei, nenya tʼengaji enye, pemeaku oltumo linyi ol enkigwena. Ore nkulie naatong'oro, teni alotu naitobir.