1 Ilkorintio 10 - Osotua Ng'ejuk

¹ Amu mayeu, pemiyololo ndai, lalashera, aajo etii loopapa lang' pookin abori erukenya neim pookin atua olbalbal,

² neibatisi pookin atua Mose tiatua erukenya o tiatua olbalbal,

³ nenya pookin endaa nabo emumuaishu,

⁴ neok pookin eokoto nabo emumuaishu, amu etooko tʼosoit lʼemumuaishu lotusujare ninje, nera ele soit Kristos.

⁵ Kake eitu eng'ida Engai too lkumok lenye, amu etaraki ninje ti ang'ata.

⁶ Etaa nena entoki enkiteng'enare too yook, pimikiaku yook lang'warrak loo ntorrok, anaa petang'warrishote lelo.

⁷ Emiaku baiki laisyayak loo nkulie ain, anaa petaa looje too ninje, anaa pesira: Etotonitio olorere aadaa neokisho neinyototo, peiguran.

⁸ Njoo mikintobir mbaak torrok oo nkiri anaa peitobira looje too ninje, nerara tʼengolong' nabo elfun tikitam o uni.

⁹ Njoo mikintasur baiki Olaitoriani, anaa peitasuro looje too ninje, neimin ninje too lasuria.

¹⁰ Eming'unyung'uny baiki anaa peing'unyung'unya looje too ninje, neimin tʼolaiminieni.

¹¹ Etaa nena pookin, peaku entoki enkiteng'enare oo lelo, nesiri, peaku erojata too yook looinepua emutata enkop.

¹² Onaa, olojo eitashe, peing'oraa, pemebatata.

¹³ Eitu einepu ndai enkitasuroto neme nʼentung'anishu; kake era Engai supat nemeisho eitasuri ndai nalang' enindimidimi, kake eitaa tʼenkitasuroto empukunoto, pindimidimi aatanap ninye.

¹⁴ Akae, lalashera lainei, elanya enkisyayare oo nkulie ain.

¹⁵ Airorie ndai anaa iltung'anak ng'eni; entetem enalimu.

¹⁶ Ore enkwaru emayani nikimayan, mera ninye enkidikidikoto osarge le Kristos? Ore olmkate likibelibel yook, mera ninye enkidikidikoto osesen le Kristos?

¹⁷ Tiaraki nara olmkate obo, nikira si yook ilkumok osesen obo, amu king'ar yook pookin olmkate obo.

¹⁸ Eng'orai Israel eneikununo too mbaak osesen. Ore kulo ooinos nkidasareitin, meidikidikore ninje si olperere?

¹⁹ Kajo aa? Kajo entoki nateyeng'akaki nkulie ain, ninye toki?

²⁰ Kake ajo: Ore ntokitin naaidasishore loreren lemeata Engai, neidasaki loiriruani, me Engai; namayeu nanu ndai ping'aring'ara loiriruani.

²¹ Mindimidimi ndai aatook enkwaru Olaitoriani o enkwaru oo loiriruani, nimindimidimi aatang'ar enaraa Olaitoriani o enaraa oo loiriruani.

²² Arashu king'elaki Olaitoriani? Ke kiata yook engolon aalang' ninye?

²³ Aidimakino pookin, kake me pookin naisho endupoto; naidimakino pookin, kake me pookin nashet.

²⁴ Njoo meing'oru oltung'ani nkun enyena, kake baiki nʼolekai.

²⁵ Entoki pookin natii tʼenemirishoreki, entaam, niminkilikwanunu tʼolbae loo ndamunot.

²⁶ Amu: En Engai enkop o emborei enye.

²⁷ Kake ore teni eipot ndai obo too lemeiruk, pinyanya endaa te nebo o ninje, niyeuu nipuopuo, entaam pookin naisho ndai, niminkilikwanunu tʼolbae loo ndammunot.

²⁸ Naa teni ejoki ndai oltung'ani: eteyeng'akaki kuna kiri nkulie ain, eminya, tʼolbae le ilo otiaka ndai o pimitutu ndamunot.

²⁹ Kake me ndamunot inono, ajo ndamunot olekai. Ainyo peigwenakini elakunoto ai too ndamunot olekai?

³⁰ Teni anya aliki ashe, ainyo paamori tʼolbae loo nena natejoiye ashe?

³¹ Akae, teni inyanya arashu iokioko arashu intobiribiri toki, entobira pookin, peaku nʼenkitook Engai.

³² Eminjo enkikoboto Yudayoi, ana Ilgrikini, ana esirit Engai,

³³ neijia anaa paitiship si nanu iltung'anak pookin, namaing'oru endupoto ai, kake en oolkumok, petum aatopok.