1 Ilkorintio 1 - Osotua Ng'ejuk

¹ Paulos oipotoki, peaku olairriwani le Yesus Kristos tʼeyeunoto Engai, o Sostenes, olalashe lang':

² en esirit Engai natii Korintos ena palai, noo lelo ootisinyaiyoki tiatua Yesus Kristos, isinyat ooipotoki, te nebo o pookin ooipot engarna Olaitoriani lang' Yesus Kristos, too wuejitin enye o nkunang' pookin.

³ Njeboitare ndai eng'adunoto o eseriani naing'ua Engai Papa lang' o Olaitoriani Yesus Kristos.

⁴ Aliki Engai ashe oshi tʼolbae lʼeng'adunoto Engai naishooki ndai tiatua Kristos Yesus,

⁵ tiaraki nitudupore ndai ntokitin pookin tiatua ninye, enkiteng'enare pookin o eyolounoto pookin,

⁶ neijia anaa petagolo enjakenishu e Kristos tiatua ndai,

⁷ neijia eitu ing'oruru tʼenkishooroto o nabo nianyunyu embolunoto Olaitoriani lang' Yesus Kristos

⁸ oloitagol baiki ndai metabaiki enkiting'oto, perneitang'ori ndai tʼengolong' Olaitoriani lang' Yesus Kristos.

⁹ Supat Engai naipotokinyeki ndai atua enkidikidikoto Oinoti lenye Yesus Kristos, Olaitoriani lang'.

¹⁰ Adiding' ndai, lalashera, tʼolbae lʼengarna Olaitoriani lang' Yesus Kristos, piroro pookin entoki nabo, nimiatata orot tiatua ndai, kake embung'aroto tʼoltau obo o tʼendamunoto nabo.

¹¹ Amu aatolikitio mbaak inyi, lalashera lainei, lekua lʼengaji e Kloe, aajo etii enjangar atua ndai.

¹² Ajo nanu ele rorei, njere ejo pookin too ndai: Ara nanu ole Paulos, nara nanu ole Apolos, nara nanu ole Kefas, nara nanu ole Kristos.

¹³ Amaa, ketoore Kristos? Ketooshokoki Paulos esalaba tʼolbae linyi? Arashu keibatisaki ndai lʼengarna e Paulos?

¹⁴ Aliki Engai ashe, amu eitu aibatis oltung'ani obo too ndai neme Krispos o Gayos.

¹⁵ Nemetii oltung'ani o obo oidim atejo eibatisaki lʼengarna ai.

¹⁶ Kake aibatisa si lʼengaji e Stefanos. Teni me lelo, madamu ajo aibatisa kulekai.

¹⁷ Amu eitu aainiwaa Kristos, paibatis, kake painosu lomon lʼeng'ida, neme too rorei ng'eni, pemeiturrari esalaba e Kristos.

¹⁸ Amu ore ororei lʼesalaba, nera emodaishu too lelo ooimin, kake ore too yook ooitopuaki, naa engolon Engai.

¹⁹ Amu etisiraki: Aiminye eng'eno oo lang'eni, naiturraa eng'eno oo looyolo.

²⁰ Kodee olng'en? Kodee olayoloni loo sirat? Kodee lang'eni lʼele maa? Keitu eitaa Engai eng'eno ele maa emodaishu?

²¹ Amu tiaraki neitu eyolou olmaa tʼeng'eno enye Engai tiatua eng'eno enye, etonyorrua Engai aitopua tʼenkinosunoto emodaishu kulo looiruk.

²² Amu eing'oru Yudayoi ilponot, neing'oru Ilgrikini eng'eno,

²³ kake kinosu yook Kristos otooshokoki esalaba, nera too Yudayoi erikai o too loreren emodaishu,

²⁴ kake too kulo looipotoki, too Yudayoi o too Lgrikini, nera Kristos engolon Engai o eng'eno Engai.

²⁵ Amu era emodaishu Engai ng'en nelang' iltung'anak, neata emenatishu Engai engolon nelang' iltung'anak.

²⁶ Amu eng'orai, lalashera, enkipototo inyi, metii atua ndai kumok loora lang'eni nemetii kumok lʼengolon nemetii kumok looata enkitook;

²⁷ kake etegelua Engai naara moda olmaa, peiye eitukurru lang'eni, o naara menat olmaa etegelua Engai, peiye eitukurru naara nʼengolon;

²⁸ etegelua Engai nemeata enkitook olmaa o natemenaki, nemera toki, peiye eiturraa nara toki, peiye pemeitaa toki nara toki,

²⁹ pemeitadaraa kion enkiring'o pookin tʼengomom Engai.

³⁰ Ing'uang'ua si ndai atua ninye tiatua Kristos Yesus, lotaa too yook eng'eno naing'ua Engai, esupato o esinyaroto o elakunoto,

³¹ peiye anaa petisiraki; Oloitadaraa kion, njeitadaraa kion tiatua Olaitoriani.