መጽሐፈ ሄኖክ 40 - የአማርኛ መጽሐፍ ቅዱስ (ሰማንያ አሃዱ)

¹ ዛሬም እኔ በታላቅ ጌትነቱና ክብሩ፥ በከበረ መንግሥቱና በገናናነቱ ለእናንተ ለጻድቃን እምላለሁ።

² ይህንም ምሥጢር እኔ አውቃለሁና፥ በሰማይ ሰሌዳ ያለውን አንብቤአለሁና፥ ቅዱሳን የጻፉትንም አይቻለሁና እምልላችኋለሁ።

³ በጎው ነገር ሁሉ፥ ደስታውና ክብሩም ተዘጋጅቶላቸዋልና ስለ እነርሱ በውስጣቸው ተጽፎና ተቀርፆ አገኘሁ።

⁴ በእውነትና በቀና ነገር፥ በብዙም በጎነት ለሞቱ ሰዎች ነፍሳት ተጻፈላቸው፤ የድካማችሁም ዋጋ ይሰጣችኋል፤ እድላችሁም ከሕያዋን እድል ይበልጣል።

⁵ ስለ ጽድቅ የሞታችሁ የእናንተ ነፍስ ትድናለች፤ ነፍሶቻቸውም ደስ ይላቸዋል፤ ሐሤትም ያደርጋሉ።

⁶ መታሰቢያቸውም በእግዚአብሔር ፊት ለልጅ ልጅ ዘመን ይኖራል፤ አሁንም መከራቸውን አትፍሩት።

⁷ የሞታችሁ ኃጥኣን፥ በኀጢአታችሁ በምትሞቱበት ጊዜ ወዮላችሁ!

⁸ እንደ እናንተም ያሉ በእናንተ ላይ እንዲህ ይላሉ፤ ኃጥኣን ብፁዓን ናቸው፤ ዘመናቸውን ሁሉ አይተዋልና።

⁹ ዛሬም በበጎነትና በባለጠግነት ሞቱ፤ መከራውንና ሰልፉንም በሕይወታቸው አላዩም፤ በጌትነትም ሞቱ፤ በሕይወታቸውም ፍርድ አልተደረገባቸውም።

¹⁰ ነፍሶቻቸው ወደ ሲኦል እንደሚወርዱ፥ ክፋታቸውም ጽኑ መከራ እንደሚሆንባቸው አታውቋቸውምን?

¹¹ ሰውነታችሁም በጨለማና በወጥመድ፥ በሚነድ ወላፈንም ወደ ጽኑ ፍርድ ትገባለች፤ ጽኑ ፍርድም በዓለም ትውልድ ሁሉ ትሆናለች።

¹² ሰላም የላችሁምና ወዮላችሁ! በሕይወት ላሉ ለጻድቃንና ለደጋጎች እንዲህ አትበሉአቸው- “በደከምንበት ወራት ድካምን ደከምን።

¹³ መከራውን ሁሉ አየን፤ ብዙ መከራዎችንም ተቀበልን፤ ጨርሰን ጠፋን፤ አነስን፤ ሰውነታችንም አነሰች፤ ጠፋንም።

¹⁴ በነገርም የሚረዳን የለም፤ በሥራም ደከምን፤ ምንም አላገኘንም፥ ተጨነቅን፤ ጠፋንም፤

¹⁵ ከዛሬ ነገ ሕይወትን እናይ ዘንድ ተስፋ አደረግን፥ ራስ ልንሆን ተስፋ አደረግን፤ ነገር ግን ጅራት ሆን፤ ስንሠራም ደከምን።

¹⁶ ነገር ግን በድካማችን ላይ ግዳጃችንን አልፈጸምንም፤ ለኃጥኣንም መብሎችን ሆን፤ ዐመፀኞችም ቀንበራቸውን አከበዱብን።

¹⁷ እኛን የሚጠሉንና የሚወጉን በእኛ ሠለጠኑብን፤ ለሚጠሉንም አንገታችንን ዝቅ አደረግን፤ እነርሱ ግን አልራሩልንም።

¹⁸ ከእነርሱ እንሸሽና እናርፍ ዘንድ እንድንሄድ ወደድን፤ ከእነርሱም ሸሽተን የምንድንበትን አላገኘንም።

¹⁹ በመከራችን ጊዜ በአለቆች ዘንድ ከሰስናቸው፤ በሚጠሉንም ላይ ጮህን፤ ጩኸታችንን ግን አልሰሙንም፤ ቃላችንንም ሊሰሙን አይወዱም።

²⁰ የሚቀሙንን፥ የሚበሉብንን፥ ያጐደሉብንንም ይረዷቸዋል፤ ግፋቸውንም ይሰውሩላቸዋል፤ ቀንበራቸውን ከእኛ አያወጡም፤ ነገር ግን ይበሉናል።

²¹ ይበትኑናል፤ ይገድሉናል፤ ሞታችንንም ይሰውራሉ፤ እጃቸውንም ከእኛ ላይ ያነሡ ዘንድ አላሰቡም።”

²² ጻድቃን! እምልላችኋለሁ፤ መላእክት በገናናው ጌትነት ፊት በሰማይ ስለ እናንተ በጎ ያስባሉና።

²³ ስሞቻችሁም በገናናው ጌትነት ፊት ይጻፋሉ። አስቀድሞ በክፋትና በድካም ጐስቍላችኋልና ተስፋ አድርጉ።

²⁴ አሁንም እንደ ሰማይ ብርሃን አብርታችሁ ትታያላችሁ፤ የሰማይ ደጃፍም ይከፈትላችኋል።

²⁵ ጩኸታችሁ ይሰማል፤ ለፍርድ ጩኹ፤ ይገለጥላችሁማል፤ ችግራችሁም ሁሉ ከመላእክትና የሚነጥቋችሁን ከሚረዷቸው ሁሉ ይመረመራልና።

²⁶ እንደ መላእክት በሰማይ ታደርጓት ዘንድ ታላቅ ደስታ ትሆንላችኋለችና ተስፋ አድርጉ፤ ተስፋችሁንም አትተዉ፥ በታላቋ የፍርድ ቀንም ትሰወሩ ዘንድ ያላችሁ አይደለም።

²⁷ እንደ ኃጥኣንም ሁናችሁ አትገኙም፤ ከእናንተ ወዲያ የዘለዓለም ፍርድ ለዓለም ትውልድ ሁሉ ትሆናለች።

²⁸ አሁንም ጻድቃን! ኃጥኣንን በፈቃዳቸው ጸንተውና ተዘጋጅተው በምታይዋቸው ጊዜ አትፍሩ።

²⁹ ከሰማይ ሠራዊት ጋር አንድ ትሆኑ ዘንድ አላችሁና ከእነርሱ ግፍ ራቁ እንጂ ከእነርሱ ጋራ አትተባበሩ።

³⁰ እናንተ ኃጥኣን! ኀጢአታችን ሁሉ አይመረመርም፤ አይጻፍብንም፥ ትላላችሁ፥ ነገር ግን ኃጢአቶቻችሁ ሁሉ በየቀኑ ይጻፉ ዘንድ አላቸው።

³¹ አሁንም ብርሃንና ጨለማ፥ ቀንና ሌሊት ኀጢአታችሁን ሁሉ ይገልጡባችኋልና እኔ አሳያችኋለሁ፤ በልቡናችሁም አትዘንጉ፤ አቷሹም።

³² የፍርድንም ነገር አትመልሱት፤ የቅዱሱንና የገናናውንም ነገር ሐሰት አታድርጉት፤ ጣዖታችሁንም አታክብሩት፥ ሐሰታችሁ ሁሉ፥ ዝንጋታችሁም ሁሉ ለታላቅ ኀጢኣት እንጂ ለጽድቅ አይደለችምና።

³³ ዛሬም እኔ ይህን ምሥጢር ዐውቀዋለሁ፤ ብዙዎች ኃጥኣን የፍርድን ነገር ይመልሳሉና፥ ይገለብጡማልና።

³⁴ ክፉዎችንም ነገሮች ይናገራሉ፤ ታላላቅ ልብ ወለድንም በሐሰት ፈጥረው ይናገራሉ፤ በነገራቸውም ላይ መጻፎችን ይጽፋሉ።

³⁵ ነገር ግን ነገሮቼን ሁሉ በቅንነት በአንደበቶቻቸው ቢጽፉ ኖሮ፥ ከነገሮቼም በአይለውጡና በአያጐድሉም ስለ እነርሱ አስቀድሜ ያዳኘሁባቸውን ሁሉ በቅንነት በጻፉ ነበር።

³⁶ ሌላ ምሥጢርንም ዐውቃለሁ፤ ለጻድቃንና ለጠቢባን ስለ ደስታና ስለ ቅን ፍርድ፥ ስለ ብዙ ጥበብም መጻሕፍት ይሰጧቸዋልና፤

³⁷ ለእነርሱም መጻሕፍት ይሰጣሉ፤ እነርሱም ያምኑባቸዋል፤ በእነርሱም ደስ ይላቸዋል፤ ሐሤትም ያደርጋሉ፤ ከእነርሱም የእውነት መንገዶችን ሁሉ ያወቁ ጻድቃን ሁሉ ዋጋቸውን ያገኛሉ።

³⁸ በእነዚያም ወራቶች ጌታ እንዲጠሯቸውና ጥበባቸውን ለምድር ልጆች እንዲያሰሙ እንዲህ አለ-

³⁹ “እናንተ መሪዎቻቸው ናችሁና፥ በምድርም ሁሉ ላይ ስጦታዎች ናችሁና አሳዩአቸው።

⁴⁰ እኔና ልጄ በእውነት መንገዶች በሕይወታቸው ከእነርሱ ጋር ለዘለዓለም አንድ እንሆናለን፤ ሰላምም ይሆንላችኋል፤ የእውነት ልጆች! በእውነት ደስ ይበላችሁ።”