መዝሙር 54 - አማርኛ አዲሱ መደበኛ ትርጉም

እነሆ፥ ዳዊት በእኛ ዘንድ ተሸሽጓል ብለው በነገሩት ጊዜ የዳዊት መዝሙር ከጠላት እጅ ለመዳን የቀረበ ጸሎት

¹ አምላክ ሆይ! በስምህ አድነኝ፤ በኀይልህም ፍረድልኝ።

² አምላክ ሆይ! ጸሎቴን ስማ! ቃሌንም አድምጥ።

³ ሞገደኞች አደጋ ሊጥሉብኝ ተነሡ፤ ጨካኞች ሊገድሉኝ ይፈልጋሉ፤ ስለ እግዚአብሔርም አያስቡም።

⁴ ነገር ግን አምላክ ረዳቴ ነው፤ ጌታም የሕይወቴ ደጋፊ ነው።

⁵ ተንኰላቸውን በሚያስጨንቁኝ ጠላቶቼ ላይ መልስባቸው፤ እነርሱን በማጥፋት ታማኝነትህን አሳይ።

⁶ መሥዋዕትህን በፍላጎቴ አቀርብልሃለሁ፤ እግዚአብሔር ሆይ፥ ተገቢ ስለ ሆነ ለስምህ ምስጋና አቀርባለሁ

⁷ ከችግሬ ሁሉ አድነኸኛል፤ የጠላቶቼንም ውድቀት አየሁ።