መጽሐፈ ጥበብ 17 - መጽሐፍ ቅዱስ - (ካቶሊካዊ እትም - ኤማሁስ)

አምስተኛው ተቃርኖ፦ ጨለማና የእሳት ዓምድ

¹ ፍርዶችህ ታላላቅና ድብቅ ናቸው፤ ያልተማሩ ነፍሶች ከመንገድ የወጡትም ለዚህ ነው።

² ክፉዎች ቅዱሱን ሕዝብ በኃይል ያንበረከኩ ቢመስላቸውም፥ በረጅሙ ሌሊት ከጣራቸው ስር ተተብትበው፥ ከዘላለማዊው ጥበቃ ተባረሩ።

³ ከሠሯቸው ሥውር በደሎች ጋር ሳይታዩ ለማምለጥ ቢያስቡም፤ ጥቁሩ ዝንጉነት ጋርዷቸው፥ በጣረ ሞት ተሳቅቀው፥ በአስፈሪ ተስፋ መቁረጥ ተበታተኑ።

⁴ መደበቂያ ብለው የያዙት ከለላቸው ፍርሃትን ሊያባርርለቸው አልቻለም፤ አስደንጋጭ ድምጾች በዙሪያቸው ያስተጋባሉ፤ ፊታቸው የጠቆረ ጐስቋላ መናፍስት ያስፈራሯቸዋል።

⁵ የቱንም ያህል የሚነድ እሳት፥ በድምቀት የሚያበሩትም ከዋክብት ቢሆኑ ብርሃን ሊሰጧቸው አልቻሉም።

⁶ ብቸኛው ብርሃናቸው፥ ድንገተኛው፥ አስፈሪውና ታላቁ ያ ትርዒት በጠፋ ጊዜም ከፍርሃታቸው የነሣ ምንም ጊዜ ካዩት ሁሉ እጅጉን አስደንጋጭ ሆነባቸው።

⁷ በዚህ ጊዜ አስማታዊ ምትሃታቸው ኃይሉ ሁሉ ከዳው፤ አውቃለሁ ባይነታቸውም የማይጨበጥ ሆነ።

⁸ ከታመሙ ነፍሶች ድንጋጤንና ፍርሃትን እናባርራለን ይሉ የነበሩ ሁሉ፥ በሚያስገርም ፍርሃት ተያዙ።

⁹ የሚያስፈራ ነገር ባጠገባቸው ባይኖርም፥ የትናንሽ እንስሳት ሩጫና የአበቦች ፉጨት ያሸብራቸው ጀመር።

¹⁰ ሊያመልጡት የማይችሉትን ነጻውን አየር እንኳን ለማየት አሻፈረን ብለው፥ በፍርናት ተቆራምደው ሞቱ።

¹¹ ክፋት በጣም ፈሪ ነው፤ ለዚህም ራሱን ያወግዛል፤ የኀሊና ተጽዕኖ ሲበዛበት ደገሞ ይብስበታል።

¹² ፍርሃት የአእምሮ እርዳታ መቋረጥ ከመሆን ውጭ ሌላ ሊሆን አይችልም፤

¹³ በአእምሮህ ላይ ያለህ መተማመን ከቀነሰ፥ የጭንቀትህን ምክንያት አለማወቅህ የበለጠ አሳሳቢ ነው።

¹⁴ እጅግ ደካማ የሆነውና እርሱኑ ከመሰለው የሲኦል ጉድጓድ የመነጨው ጨለማ ሳይገፍ በአንድ ዓይነት እንቅልፍ ተሸንፈው ነበር።

¹⁵ አሁን ደግሞ ግዙፍ መናፍስት ያባርሯቸዋል፥ ነፍሶቻቸውም በመደንገጣቸው ሽባ ሆነዋል፤ ድንገተኛና ያልተጠበቀ ሽብር አጥቅቷቸዋል።

¹⁶ በዚያ የወደቀ ማንም ሰው ቢሆን፥ ካረፈበት ቦታ ተጣብቆ መዝጊያ በሌለው በዚህ እስር ቤት ይማቅቃል።

¹⁷ ገበሬም ይሁን እረኛ፥ በበረሃም የሚሠራ ቢሆን፥ በድንገት እየተያዘ የወደቀበትን የማይታለፍ ዕጣ በግደ ይቀበላል፤ ሁሉም ባንድ የጨለማ ሠንሠለት ታሥረው ነበርና።

¹⁸ የነፍሱ ፉጨት፥ እንደ ልብ በተዘረጉት ቅርንጨፎች ላይ ሆነው ወፎች የሚያሰሙት ጣዕም ያለው ዜማ፥ የሚንፍዋፍዋው የወራጅ ውሃ ድምፅ፥ እየተምዘገዘጉ የሚወርዱ ዐለቶች ኳኳታ፥

¹⁹ የማይታየው የሚቦርቁ እንስሳት መንገድ፥ ከዱር አራዊት የአስፈሪዎቹ ግሳት፥ ከተራሮች ላይ ካሉ ጉድባዎች የሚስተጋባው የገደል ማሚቶ፥ ሁሉም በፍርሃት ያሸማቅቃቸዋል።

²⁰ መላው ዓለም በቀን ብርሃን ደምቆ፥ ያለ ምንም ችግር ሥራውን ይሠራ ነበር።

²¹ እነርሱ ላይ ብቻ ድቅድቅ ጨለማ ተንሠራፋ፤ የሚቀበላቸው ጽልመት ምስል ነው፤ እነርሱ ለራሳቸው ሸክም የሆኑትን ያህል፥ ጨለማው አልከበዳቸውም።