መጽሐፈ ሲራክ 8 - መጽሐፍ ቅዱስ - (ካቶሊካዊ እትም - ኤማሁስ)

ብልህነትና የተፈጥሮ ዕውቀት

¹ ችሎታ ላለው ከትልቅ ሰው አትከራከር፤ አለበለዚያ በእጁ ትወድቃለህ።

² ከሀብታም ሰው ጋር አትጋጭ አለበለዚያ ይጫንኻል፤ ምክንያቱም ወርቅ ብዙዎችን አጥፍቷል። የነገሥታትንም ልቦና መንገድ አስቷል።

³ ከተሟጋች ጋር አትከራከር፤ በእሳቱ ላይ እንጨት አትከምር።

⁴ አያቶችህን እንዳይሰደቡብህ ከነውረኛ ሰው ጋር አትዘባበት።

⁵ በኃጢአቱ የሚጸጸተውን ሰው አትውቀሰው፤ ሁላችንም በደለኞች መሆናችንን አስብ።

⁶ ሽማግሌን አትጥላ፥ ከኛም አንዳንዶቻችን እየሸመገልን ነውና።

⁷ በሌላው ሞት አትደሰት፥ ሁላችንም ሟቾች መሆናችንን አትዘንጋ።

ባህል

⁸ የጥበበኞችን ንግግር አታቃል፤ ምሳሌዎቻቸውን ተከተል፤ ታላላቆችን የማገልገል እውቀትና ጥበብ ከእነርሱ ትማራለህና።

⁹ ሽማግሌዎች የሚናገሩትን አታቀል፥ እርሱም የተማሩት ከአባቶቻቸው ነውና፤ ብልህነትንና በአስፈላጊውም ጊዜ መልስ የመስጠት ጥበብን የምትማረው ከነሱ ነው።

ማስተዋል

¹⁰ በነበልባሉም ትቃጠላለህና የኃጢአተኛን ከሰል አታቀጣጥል።

¹¹ ለተሳዳቢ አትበገር፥ በቃልህ ሊያጠምድህ ይችላል።

¹² ከአንተ ለሚያይል አታበድር፤ ካበደርክም እንደጠፋብህ ቁጠረው።

¹³ ከችሎታህ በላይ ዋስ አትሁን፥ ከተዋስክ ለመክፈል ተዘጋጅ።

¹⁴ ከዳኛ ጋር አትካሰስ፥ ምክንያቱም ለእርሱ ይፈረድለታል።

¹⁵ ከችኩል ሰው ጋር አትጓዝ፥ አለበለዚያ ሸክም ይሆንብሃልና፤ እሱ በገዛ ፈቃዱ የሚመራ ነው፤ በእርሱም ጥፋት ሁለታችሁም አብራችሁ ትጠፋላችሁ።

¹⁶ ከቁጡ ሰው ጋር አትከራከር፤ ሰዎች በሌሉበት ከሱ ጋር አትሂድ፥ ደም መፍሰስ ለእርሱ ምኑም አይደለምና፤ ሰው በሌለበት ሊጎዳህ ይችላል።

¹⁷ ከሞኝ ምክር አትጠይቅ፥ ምስጢር መቋጠር አይችልምና።

¹⁸ ምን እንዲሆን አታውቅምና በእንግዳ ፊት ምሥጢር አታውጣ። እንግዳው እንዴት ሊጠቀምበት እንደሚችል አታውቅምና።

¹⁹ ለማንም ልብህን አትግለጥ፤ መልካም ተግባሮቻቸውም ላይ አትተማመን።