መጽሐፈ ሲራክ 42 - መጽሐፍ ቅዱስ - (ካቶሊካዊ እትም - ኤማሁስ)

¹ በሚከተሉት ሁናቴዎች ልታፍር አይገባህም፤ ሌሎች በሚያስቡትን በመፍራት፥

² በልዑል እግዚአብሔር ሕግ ወይም በቃል ኪዳኑ፥ ከሐዲውን በነጻ በሚያሰናብት ፍርድ፥

³ ከመንገድ ጓደኛህ ጋር በመተሳሰብህ፥ ሀብትህን ወዳጆችህ በማካፈልህ፥

⁴ በሚዛኑና በክብደቱ ትክክለኛነት ጥቂት ወይም ብዙ በማትረፍህ፥

⁵ በንግድ ሥራ በመጠቀምህ፥ ልጆችህን በሚገባ በመቅጣትህ፥ አመፀኛውን አገልጋይ እስኪደማ በመግረፍህ፥ በኃጢአት አትውደቅ።

⁶ ሚስትህ ሁሉን ማወቅ የምትሻ ከሆነ፥ ማሸጊያህን መጠቀም ያስፈልጋል፤ በርካታ እጆች ባሉበትም ንብረትህን ቆልፍ።

⁷ ከዕቃ ቤት የሚወጣው ሁሉ በቁጥጥርና በሚዛን ይሁን፤ ወጪዎችና ገቢዎች ጽሑፍ ይመዝገቡ።

⁸ አላዋቂውንና ሞኙን ሰው፥ ከወጣቶች ጋር የሚዳራውን ያረጀ ሽማግሌ፥ ለማረም አትፈር፤ በውል የተማርክ መሆንህን ያኔ ታሳያለህ፤ ሰውም ሁሉ ይህንኑ ያረጋግጥልሃል።

አባት ስለ ሴት ልጁ ያለበት ጭንቅ

⁹ እርሷ ባታውቀውም፥ የሴት ልጅ አባት እንቅልፍ የለውም፤ ስለ እርሷ ሲያስብ እንቅልፉን ያጣል በወጣትነቷ ቆማ ብትቀር፥ ካገባች በኋላ ባሏ ቢጠላት፥

¹⁰ በልጃረገድነቷ ብትደፈር፥ ባባቷም ቤት ብትወልድ፥ ባል ኖሯት ብትማግጥ፥ ከጋብቻ በኋላ ብትመነኩስ በማለት ይጨነቃል።

¹¹ ልጅህ አስቸጋሪ ነችን? የጠላቶችህ መሳቂያ፥ የከተማው መዘባበቻ፥ የወሬኞች መጠቋቆሚያ እንዳታደርግህ፥ በሕዝብም ፊት ኀፍረትን እንዳታከናንብህ በብርቱ ጠብቃት።

ሴቶች

¹² ስለ ቁንጅናው ብላችሁ ወንድ አትመልከቱ፤ ከሴቶችም ጋር አትቀመጡ፥

¹³ ብል ከልብስ እንደሚመጣ፥ የሴት ክፋትም የሚመነጨው እንዲሁ ከሴት ነው።

¹⁴ ከሴት ደግነት የወንድ ክፋት ይሻላል፤ ሴቶች ኀፍረትንና ጥላቻን ያመጣሉ።

የእግዚአብሔር ታላቅነት ሀ. በተፈጥሮ ውስጥ

¹⁵ የእግዚአብሔርን ሥራዎች ቀጥዬ አስታውሳችኋለሁ፤ ያየሁትንም እዘረዝራለሁ። በእግዚአብሔር ቃል ሥራዎች ሁሉ ሕያው ሆኑ፤ ፍጥረታትም ሁሉ ፈቃድን ይፈጽማሉ።

¹⁶ የምታበራዋ ፀሐይ ሁሉንም ዘቅዝቃ ትመለከታለች፤ የእግዚአብሔርም ሥራ በክብሩ የተመላ ነው።

¹⁷ እግዚአብሔር ድንቅ ሥራዎቹን ይገልጽ ዘንድ፤ ለቅዱሳኑ ሥልጣንን አልሰጠም፤ ኃያሉ እግዚአብሔር ሥራዎቹን ሁሉ አጽንቶ ፈጥሯል፤ ዓለምንም በክብሩ ፊት አቁሟል።

¹⁸ ጥልቁን ጉድጓድ፥ የሰውንም ልብ ይመረምራል፤ አሳሳች መንገዶቻቸውንም ይመለከታል። ልዑል እግዚአብሔር ሁሉንም ያውቃል፤ የዘመናትንም ምልክቶች ያስተውለልና።

¹⁹ ያለፈውንም፥ የሚመጣውንም ይናገራል፤ የሚሥጢራትንም አካሄድ ይገለጻል።

²⁰ አንዲት ሐሳብ አታመልጠውም፤ አንድም ቃል ከእርሱ አይሰወርም።

²¹ በጥበብ የሠራቸውን ድንቅ ሥራዎች አስውቧቸዋል፤ መጀመሪያም መጨረሻም የለውም፥ ምንም አይቀነስበትም፥ ምንም አይጨመርበትም፥ እርሱ የማንንም ምክር አይሻም።

²² የእጁ ሥራዎች ምንኛ ያስደስታሉ! ዓይንንስ ምንኛ ያጥበረብራሉ!

²³ ሁሉም ይኖራሉ፥ ዘላለማዊ ናቸው፤ በማንኛውም ሁኔታ ትእዛዙን ይፈጽማሉ።

²⁴ ሁሉም ጥንድና ተቃራኒ ናቸው፤ ጐደሎ አድርጐ የፈጠረው የለም።

²⁵ አንድ ነገር የሌላውን ከፍተኛ ችሎታ ያሟላል፤ ወደ ክብሩ አተኩሮ ተመልክቶስ ማን ታከተ?