መጽሐፈ ሲራክ 2 - መጽሐፍ ቅዱስ - (ካቶሊካዊ እትም - ኤማሁስ)

በፈተና ጊዜ እግዚአብሔርን መፍራት

¹ ልጄ ሆይ ጌታን ማገልገል ስትፈልግ፤ እራስህን ለፈተና አዘጋጅ፤

² ቅን ልብ ይኑርህ፥ ቆራጥ ሁን፥ በጭንቀት ጊዜ አትታወክ፥

³ ወደ እግዚአብሔር ተጠጋ፥ ከሱ አትራቅ፥ በመጨረሻ ቀኖችህም ክብርን ትጐናጸፋለህ።

⁴ የሚመጣብህን ነገር ሁሉ ተቀበለው፤ በመከራ ጊዜ ግራ ብትጋባም ታገስ።

⁵ ወርቅ በእሳት እንደሚፈተነው ሁሉ፥ በእግዚአብሔር የተመረጡ ሰዎችም የሚፈተኑት በውርደት ምድጃ ነው።

⁶ በእግዚአብሔር ታመን፥ ይረዳሃል፤ ትክክለኛውን መንገድ ተከተል፤ ተስፋህም በእርሱ ላይ ይሁን፤

⁷ እናንተ ጌታን የምትፈሩ ምሕረቱን ተጠባበቁ፤ እንዳትወድቁ ከሱ አትራቁ።

⁸ እናንተ ጌታን የምትፈሩ በሱ ተማመኑ፤ የሚገባችሁ ዋጋ አይቀርባችሁም፤

⁹ እናንተ ጌታን የምትፈሩ፥ የእርሱን መልካም ስጦታዎች ደስታንና ምሕረትን ተስፋ አድርጉ።

¹⁰ ያለፉትን ትውልዶች ተመልከቱ፥ እዩ፤ እስቲ ማነው በጌታ ተማምኖ ያፈረ?

¹¹ ማነው እግዚአብሔርን በመፍራት ጸንቶ የተጣለ? ማነው እግዚአብሔርን ለምኖ ያልተሰማ? ምክንያቱም እግዚአብሔር ርኁርኀና መሐሪ ነው፤ ኃጢአትን ይቅር የሚልና በጭንቀት ጊዜ የሚያድን ነው።

¹² ስንፍና ለሚያጠቃቸው ልቦችና፥ ብርታት ለሌላቸው እጆች ወዮላቸው፤ በሁለት መንገድ የሚሄድ ወላዋይ ኃጢአተኛ ወዮለት።

¹³ ብርታትና እምነት የሌለው ልብ ወዮለት፤ ምክንያቱም ጠባቂ የለውም።

¹⁴ እናንተ ጸንታችሁ ያልኖራችሁ ወዮላችሁ፤ ጌታ ሲጐበኛችሁ ምን ልታደርጉ ነው?

¹⁵ ጌታን የሚፈሩ ሰዎች፤ ከቶ ቃሉን አይጥሱም፤ እግዚአብሔርን የሚወዱ መንገዶችን ይጠብቃሉ፤

¹⁶ ጌታን የሚፈሩ ሁሉ፥ እርሱን ደስ የሚያሰኘውን ይፈጽማሉ፤ እሱን የሚወዱ በሕጉ ይረካሉ።

¹⁷ ጌታን የሚፈሩ ሁልጊዜ ዝግጁ ልብ አላቸው፤ በፊቱ ራሳቸውን ዝቅ ያደርጋሉ፤ እንዲህም ይላሉ፥

¹⁸ በሰው እጅ ከምንወድቅ በእርሱ እጅ እንውደቅ፤ ምሕረቱ እንደ ታላቅነቱ ነውና።