መዝሙር 92 - መጽሐፍ ቅዱስ - (ካቶሊካዊ እትም - ኤማሁስ)

¹ በሰንበት ቀን የምስጋና መዝሙር።

² ጌታን ማመስገን መልካም ነው፥ ልዑል ሆይ፥ ለስምህም ዝማሬ ማቅረብ፥

³ በማለዳ ምሕረትን፥ በሌሊትም እውነትህን ማውራት

⁴ ዐሥር አውታር ባለው በበገና፥ ከምስጋና ጋርም በመሰንቆ።

⁵ አቤቱ፥ በሥራህ ደስ አሰኝተኸኛልና፥ በእጅህም ሥራ ደስ ይለኛልና።

⁶ አቤቱ፥ ሥራህ እንዴት ትልቅ ነው! ሐሳብህም እንዴት ጥልቅ ነው!

⁷ የማያስተውል ሰው አያውቅም። አላዋቂ አይረዳውም።

⁸ ኃጢአተኞች እንደ ሣር ቢበቅሉ ዓመፃ የሚያደርጉ ሁሉ ቢለመልሙ፥ ለዘለዓለም ዓለም እንደሚጠፉ ነው።

⁹ አቤቱ፥ አንተ ግን ለዘለዓለም ልዑል ነህ፥

¹⁰ አቤቱ፥ እነሆ፥ ጠላቶችህ ይጠፋሉና፥ ዓመፃንም የሚሠሩ ሁሉ ይበተናሉና።

¹¹ እንደ ጐሽ አጠነከርከኝ፥ በአዲስ ዘይትም ቀባኸኝ።

¹² ዓይኔም ጠላቶቼን ቃኘች፥ ጆሮዬም በእኔ ላይ የተነሡትን ክፉዎች ሰማች።

¹³ ጻድቅ እንደ ዘንባባ ያፈራል፥ እንደ ሊባኖስ ዝግባም ያድጋል።

¹⁴ በጌታ ቤት ውስጥ ተተክለዋል፥ በአምላካችንም አደባባይ ውስጥ ይበቅላሉ።

¹⁵ ያንጊዜ ገና በሽምግልናም ያፈራሉ ገና ወተታማና አርንጓዴ ሆነው ይኖራሉ።

¹⁶ ጌታ ትክክለኛ እንደሆነ ይነግራሉ፥ ዓለቴ ነው፤ በእርሱም ዘንድ ዓመፃ የለም።