መዝሙር 49 - መጽሐፍ ቅዱስ - (ካቶሊካዊ እትም - ኤማሁስ)

¹ ለመዘምራን አለቃ፥ የቆሬ ልጆች መዝሙር።

² አሕዛብ ሁላችሁ፥ ይህን ስሙ፥ በዓለም የምትኖሩትም ሁላችሁ፥ አድምጡ፥

³ ዝቅተኞችና ከፍተኞች፥ ሀብታሞችና ድሆች በአንድነት።

⁴ አፌ ጥበብን ይናገራል፥ የልቤም አስተንትኖ ማስተዋልን።

⁵ ጆሮዬን ወደ ምሳሌዎች አዘነብላለሁ፥ በበገናም ምሥጢሬን እገልጣለሁ።

⁶ በደል ተረከዜን በከበበኝ ጊዜ በክፉ ቀን ለምን እፈራለሁ?

⁷ በኃይላቸው የሚታመኑ፥ በሀብታቸውም ብዛት የሚመኩ፥

⁸ በእውነት ማንም እራሱን አያድንም፥ ማንም ቤዛውን ለእግዚአብሔር አይሰጥም፥

⁹ የነፍሳቸው ዋጋ ክቡር ነው፥ መቼውንም በቂ አይሆንም፥

¹⁰ ሰው ገና እንዲኖርና አዘቅቱንም እንዳያይ

¹¹ ጠቢባን እንደሚሞቱ፥ ሰነፎችና ደንቆሮች በአንድነት እንደሚጠፉ፥ ገንዘባቸውንም ለሌሎች እንደሚተዉ አይቶአል።

¹² ብዙ መሬት በስማችው ቢያስጠሩም እንኳን፥ መቃብራቸው የዘለዓለም ቤታቸው፥ ለልጅ ልጅ የሚሆን ማደሪያቸውም ነው።

¹³ ሰው ግን ክቡር ሆኖ ሳለ አያውቅም፥ እንደሚጠፉ እንስሶች መሰለ።

¹⁴ ይህች መንገዳቸው መሰናክላቸው ናት፥ ከእነርሱም በኋላ የሚመጡ በንግግራቸው ይደሰታሉ።

¹⁵ እንደ በጎች ወደ ሲኦል የሚሄዱ ናቸው፥ እረኛቸውም ሞት ነው፥ ቅኖችም በማለዳ ይገዙአቸዋል፥ ውበታቸውም ከመኖሪያቸው ተለይታ በሲኦል ታረጃለች።

¹⁶ ነገር ግን እግዚአብሔር ይቀበለኛልና ነፍሴን ከሲኦል እጅ ይቤዣታል።

¹⁷ የሰው ሀብት የቤቱም ክብር በበዛ ጊዜ አትፍራ፥

¹⁸ በሞተ ጊዜ ከእርሱ ጋር ምንም አይወስድምና፥ ክብሩም ከእርሱ በኋላ አይወርድምና።

¹⁹ በሕይወቱ ሳለ ነፍሱን ባርኮአልና ለሰውነቱ መልካም በማድረጉ ይወደሳልና።

²⁰ ሆኖም ወደ አባቶቹ ትውልድ ይወርዳል፥ ለዘለዓለም ብርሃንን ወደ ማያዩበት።

²¹ አእምሮ የሌለው ክቡር ሰው እንደሚጠፉ እንስሶች መሰለ።