መዝሙር 48 - መጽሐፍ ቅዱስ - (ካቶሊካዊ እትም - ኤማሁስ)

¹ በሁለተኛ ሰንበት የቆሬ ልጆች የምስጋና መዝሙር።

² ጌታ ትልቅ ነው፥ በአምላካችን ከተማ በተቀደሰው ተራራ ምስጋናው ብዙ ነው።

³ በሰሜን በኩል በመልካም ስፍራ የቆመ የምድር ሁሉ ደስታ የጽዮን ተራራ ነው፥ እርሷም የትልቁ ንጉሥ ከተማ ነች።

⁴ እግዚአብሔር በአዳራሾችዋ መጠጊያ ሆኖ ይታወቃል።

⁵ እነሆ፥ ነገሥታት ተከማችተው በአንድነት መጥተዋል።

⁶ እነርሱስ አይተው ተደነቁ፥ ደነገጡ፥ ሸሹም።

⁷ በዚያ እንደ ወላድ ምጥ መንቀጥቀጥ ያዛቸው።

⁸ በኃይለኛ ነፋስ የተርሴስን መርከቦች ትሰብራለህ።

⁹ እንደ ሰማን እንዲሁ አየን በሠራዊት ጌታ ከተማ፥ በአምላካችን ከተማ፥ እግዚአብሔር ለዘለዓለም ያጸናታል።

¹⁰ አምላክ ሆይ፥ በመቅደስህ ውሰጥ ርኅራኄህን አሰላሰልን።

¹¹ አምላክ ሆይ፥ እንደ ስምህ ምስጋናህም እንዲሁ እስከ ምድር ዳርቻ ድረስ ነው፥ ቀኝህ ጽድቅን የተሞላች ናት።

¹² አቤቱ፥ ስለ ፍርድህ የጽዮን ተራራ ደስ ይበለው፥ የይሁዳም ሴት ልጆች ሐሤት ያድርጉ።

¹³ ጽዮንን ክበቡአት፥ በዙሪያዋም ተመላለሱ፥ ግንቦችዋንም ቁጠሩ፥

¹⁴ በብርታትዋ ልባችሁን አኑሩ፥ ቅጥሮችዋን መርምሩ፥ ለሚመጣው ትውልድ ትነግሩ ዘንድ።

¹⁵ ለዓለምና ለዘለዓለም ይህ አምላካችን ነው፥ እርሱም ለዘለዓለም ይመራናል።