ዘኍል 33 - መጽሐፍ ቅዱስ - (ካቶሊካዊ እትም - ኤማሁስ)

እስራኤላውያ ከግብጽ ያደረጉት ጉዞ

¹ በሙሴና በአሮን ልጅ እየተመሩ በየሠራዊታቸው ሆነው ከግብጽ በወጡ ጊዜ የእስራኤል ልጆች ያደረጉት ጉዞ ይህ ነበረ።

² ሙሴም በጌታ ትእዛዝ የጉዞአቸው መነሻ የሆኑትን ስፍራዎቻቸውን ጻፈ፤ እንደ መነሻ ስፍራዎቻቸው ጉዞአቸው እንዲህ ነበረ።

³ በመጀመሪያው ወር ከወሩም በዓሥራ አምስተኛው ቀን ከራዓምሴ ተጓዙ፤ ከፋሲካ በኋላ በማግስቱ የእስራኤል ልጆች ግብፃውያን ሁሉ እያዩ ከፍ ባለች እጅ ወጡ።

⁴ በዚያም ጊዜ ግብፃውያን ጌታ የገደላቸውን በኩሮቻቸውን ሁሉ ይቀብሩ ነበር፤ በአማልክቶቻቸውም ላይ ደግሞ ጌታ ፈረደባቸው።

⁵ የእስራኤልም ልጆች ከራዓምሴ ተጉዘው በሱኮት ሰፈሩ።

⁶ ከሱኮትም ተጉዘው በምድረ በዳ ዳርቻ ባለች በኤታም ሰፈሩ።

⁷ ከኤታምም ተጉዘው በበኣልዛፎን ፊት ወደ ነበረች ወደ ፊሀሒሮት ተመለሱ፤ በሚግዶልም ፊት ለፊት ሰፈሩ።

⁸ ከፊሀሒሮትም ተጉዘው ባሕሩን በመሻገር ወደ ምድረ በዳ አለፉ፤ በኤታምም በረሀ የሦስት ቀን መንገድ ሄደው በማራ ሰፈሩ።

⁹ ከማራም ተጉዘው ወደ ኤሊም መጡ፤ በኤሊምም ዐሥራ ሁለት የውኃ ምንጮች ሰባ ዘንባቦችም ነበሩ፤ በዚያም ሰፈሩ።

¹⁰ ከኤሊምም ተጉዘው በኤርትራ ባሕር ዳር ሰፈሩ።

¹¹ ከኤርትራም ባሕር ተጉዘው በሲን ምድረ በዳ ሰፈሩ።

¹² ከሲን ምድረ በዳም ተጉዘው በራፋቃ ሰፈሩ።

¹³ ከራፋቃም ተጉዘው በኤሉስ ሰፈሩ።

¹⁴ ከኤሉስም ተጉዘው በራፊዲም ሰፈሩ በዚያም ሕዝቡ የሚጠጡት ውኃ አልነበረም።

¹⁵ ከራፊዲምም ተጉዘው በሲና ምድረ በዳ ሰፈሩ።

¹⁶ ከሲናም ምድረ በዳ ተጉዘው በኬብሮን-ሐታማ ሰፈሩ።

¹⁷ ከኬብሮን-ሐታማም ተጉዘው በሐጼሮት ሰፈሩ።

¹⁸ ከሐጼሮትም ተጉዘው በሪትማ ሰፈሩ።

¹⁹ ከሪትማም ተጉዘው በሬሞን ዘፋሬስ ሰፈሩ።

²⁰ ከሬሞን ዘፋሬስም ተጉዘው በልብና ሰፈሩ።

²¹ ከልብናም ተጉዘው በሪሳ ሰፈሩ።

²² ከሪሳም ተጉዘው በቀሄላታ ሰፈሩ።

²³ ከቀሄላታም ተጉዘው በሻፍር ተራራ ሰፈሩ።

²⁴ ከሻፍር ተራራም ተጉዘው በሐራዳ ሰፈሩ።

²⁵ ከሐራዳም ተጉዘው በመቅሄሎት ሰፈሩ።

²⁶ ከመቅሄሎትም ተጉዘው በታሐት ሰፈሩ።

²⁷ ከታሐትም ተጉዘው በታራ ሰፈሩ።

²⁸ ከታራም ተጉዘው በሚትቃ ሰፈሩ።

²⁹ ከሚትቃም ተጉዘው በሐሽሞና ሰፈሩ።

³⁰ ከሐሽሞናም ተጉዘው በሞሴሮት ሰፈሩ።

³¹ ከሞሴሮትም ተጉዘው በብኔያዕቃን ሰፈሩ።

³² ከብኔያዕቃንም ተጉዘው በሖርሃጊድጋድ ሰፈሩ።

³³ ከሖርሃጊድጋድም ተጉዘው በዮጥባታ ሰፈሩ።

³⁴ ከዮጥባታም ተጉዘው በዔብሮና ሰፈሩ።

³⁵ ከዔብሮናም ተጉዘው በዔጽዮንጋብር ሰፈሩ።

³⁶ ከዔጽዮንጋብርም ተጉዘው በጺን ምድረ በዳ ሰፈሩ፤ ይህችም ቃዴስ ናት።

³⁷ ከቃዴስም ተጉዘው በኤዶምያስ ምድር ዳርቻ ባለው በሖር ተራራ ሰፈሩ።

³⁸ ካህኑም አሮን በጌታ ትእዛዝ ወደ ሖር ተራራ ላይ ወጣ፥ በዚያም የእስራኤል ልጆች ከግብጽ ምድር ከወጡ በኋላ በአርባኛው ዓመት በአምስተኛው ወር ከወሩም በመጀመሪያው ቀን ሞተ።

³⁹ አሮንም በሖር ተራራ በሞተ ጊዜ ዕድሜው መቶ ሀያ ሦስት ዓመት ነበር።

⁴⁰ በከነዓን ምድርም በደቡብ በኩል ተቀምጦ የነበረው ከነዓናዊው የዓራድ ንጉሥ የእስራኤል ልጆች እንደመጡ ሰማ።

⁴¹ እነርሱም ከሖር ተራራ ተጉዘው በሴልሞና ሰፈሩ።

⁴² ከሴልሞናም ተጉዘው በፉኖን ሰፈሩ።

⁴³ ከፋኖንም ተጉዘው በአቦት ሰፈሩ።

⁴⁴ ከአቦትም ተጉዘው በሞዓብ ዳርቻ ባለው በዒዬዓባሪም ሰፈሩ።

⁴⁵ በዒዬዓባሪም ተጉዘው በዲቦንጋድ ሰፈሩ።

⁴⁶ ከዲቦንጋድም ተጉዘው በዓልሞንዲብላታይም ሰፈሩ።

⁴⁷ ከዓልሞንዲብላታይምም ተጉዘው በናባው ፊት ባሉ በዓብሪም ተራሮች ላይ ሰፈሩ።

⁴⁸ ከዓብሪምም ተራሮች ተጉዘው በዮርዳኖስ አጠገብ በኢያሪኮ ፊት ባለው በሞዓብ ሜዳ ሰፈሩ።

⁴⁹ በዮርዳኖስም አጠገብ በሞዓብ ሜዳ ላይ ከቤትየሺሞት እስከ አቤልሰጢም ድረስ ሰፈሩ።

ከነዓንን ለመያዝ የተሰጠ ምሪት

⁵⁰ ጌታም ሙሴን በዮርዳኖስ አጠገብ በኢያሪኮ ፊት ለፊት በሞዓብ ሜዳ ላይ እንዲህ ብሎ ተናገረው፦

⁵¹ “ለእስራኤል ልጆች እንዲህ ብለህ ለእነርሱ ተናገር፦ ወደ ከነዓን ምድር ዮርዳኖስን በተሻገራችሁ ጊዜ፥

⁵² የአገሩን ሰዎች ሁሉ ከፊታችሁ ታሳድዳላችሁ፥ የተቀረጹትንም ድንጋዮቻቸውን ሁሉ ታጠፋላችሁ፥ ቀልጠው የተሠሩትንም ምስሎቻቸውን ሁሉ ታጠፋላችሁ፥ በኮረብታ ላይ ያሉትን መስገጃዎቻቸውንም ታፈርሳላችሁ፤

⁵³ ምድሪቱንም ለእናንተ ርስት አድርጌ ሰጥቼአችኋለሁና ምድሪቱን ትወርሱአታላችሁ ትቀመጡባታላችሁም።

⁵⁴ ምድሪቱንም በየወገኖቻችሁ በዕጣ ትወርሳላችሁ፤ ለብዙዎች እንደ ብዛታቸው ለጥቂቶቹም እንደ ጥቂትነታቸው መጠን ርስትን ትሰጣላችሁ፤ እያንዳንዱ ሁሉ ዕጣው እንደ ወጣለት በዚያ ርስቱ ይሆናል፤ በየአባቶቻችሁ ነገዶች ትወርሳላችሁ።

⁵⁵ የአገሩንም ሰዎች ከፊታችሁ ባታሳድዱ፥ ያስቀራችኋቸው ለዓይናችሁ እንደ ስንጥር ለጎናችሁም እንደ እሾህ ይሆኑባችኋል፥ በምትቀመጡባትም ምድር ያስጨንቁአችኋል።

⁵⁶ እኔም በእነርሱ ላይ ለማድረግ ያሰብሁትን በእናንተ ላይ አደርግባችኋለሁ።”