መጽሐፈ ባሮክ 4 - መጽሐፍ ቅዱስ - (ካቶሊካዊ እትም - ኤማሁስ)

¹ ይህች የእግዚአብሔር ትእዛዝ መጽሐፍና ለዘለዓለም የምትኖር ሕግ ነች። አጥብቀው የሚይዟት ሁሉ በሕይወት ይኖራሉ፥ የሚተዉአት ይሞታሉ።

² ያዕቆብ ሆይ ተመለስና ያዛት፤ ወደ ብርሃንዋ ጮራም ሂድ።

³ ክብርህን ለሌላ አትስጥ፥ ጥቅምህን ለባዕድ አትስጥ።

⁴ እስራኤል ሆይ እኛ የተባረክን ነን፤ እግዚአብሔርን ደስ የሚያሰኘው ነገር ተገልጦልናልና!

የኢየሩሳሌም ቅሬታዎችና ተስፋዎች

⁵ የእስራኤል መታሰቢያ፥ ሕዝቤ ሆይ በርቱ፤

⁶ ለአሕዛብ ተሽጣችሁ ነበር ለጥፋት ግን አይደለም፥ ነገር ግን እግዚአብሔርን በማስቆጣታችሁ ለጠላቶቻችሁ ተላልፋችሁ ተሰጥታችሁ ነበር።

⁷ ለእግዚአብሔር ሳይሆን ለአጋንንት በመሠዋት ፈጣሪያችሁን በጣም አስቆጣችሁት።

⁸ የተንከባከባችሁን ዘላለማዊ አምላክ ረስታችሁታል፥ ያሳደገቻችሁን ኢየሩሳሌምንም አሳዝናችኋል።

⁹ የእግዚአብሔር ቁጣ በእናንተ ላይ ሲመጣ ባየች ጊዜ እንዲህ አለች፦ “የጽዮን ጐረቤቶች ስሙ፥ እግዚአብሔር ጽኑ ኀዘን አምጥቶብኛል፤

¹⁰ ዘላለማዊ አምላክ ያመጣባቸውን ወንዶች ልጆቼንና የሴቶች ልጆቼን መማረክ አይቻለሁና።

¹¹ በሐሴት አሳደግኋቸው፥ ነገር ግን በልቅሶና በኀዘን ሸኘኋቸው።

¹² በብዙዎች በተጣልሁት፥ በመበለቷ በእኔ ማንም ደስ አይበለው፤ በልጆቼ ኃጢአት ምክንያት ባዶ ቀርቻለሁ፥ ከእግዚአብሔር ሕግ ርቀዋልና።

¹³ ትእዛዞቹን አላወቁም፤ በእግዚአብሔር ትእዛዛት መንገድ አልተከተሉም፤ በሱ ጽድቅ መሠረት የተማሩትን ተከትለው አልሄዱም።

¹⁴ የጽዮን ጐረቤቶች ይምጡ፤ ዘላለማዊው ያመጣባቸውን የወንዶች ልጆቼና የሴቶች ልጆቼ መማረክ አስታውሱ።

¹⁵ የማያፍር፥ ባዕድ ቋንቋ የሚናገር፥ ሽማግሌን የማያከብርና ለሕፃን የማይራራ ሕዝብ ከሩቅ አመጣባቸው።

¹⁶ የመበለትዋን የተወደዱ ልጆች ነጠቁ፤ ከሴቶች ልጆችዋም ለይተው ብቻዋን አስቀሩአት።

¹⁷ ነገር ግን እኔ እንዴት ልረዳችሁ እችላለሁ?

¹⁸ ይህን ክፉ ነገር ያመጣባችሁ እርሱ ከጠላቶቻችሁ እጅ ያወጣችኋልና።

¹⁹ ሂዱ ልጆቼ ሂዱ፤ እኔ ምድረ በዳ ሆኜ ተትቻለሁና።

²⁰ የሰላም ልብሴን አወለቅሁ፥ ለልመናዬም ማቅን ለበስሁ፤ በዘመኔን ሁሉ ወደ ዘላለማዊው እጮሃለሁ።

²¹ ልጆቼ ጽኑ፥ ወደ እግዚአብሔር ጩኹ፤ ከጠላቶቻችሁ አገዛዝና እጅ ያወጣችኋል።

²² እንዲያድናችሁ ተስፋዬን በዘላለማዊ አድርጌአለሁና፥ ከዘላለማዊው አዳኛችሁ ፈጥኖ ስለሚመጣላችሁ ምሕረት፥ ከቅዱሱ ደስታ መጣልኝ።

²³ እኔ በኀዘንና በልቅሶ ሸኝቻችኋለሁና፥ ነገር ግን እግዚአብሔር በደስታና በሐሤት እናንተን መልሶ ለዘለዓለም ለእኔ ይሰጣችኋል።

²⁴ የጽዮን ጎረቤቶች አሁን መማረካችሁን እንዳዩ፥ እንዲሁም ከታላቅ ክብርና ከዘላለማዊው ውበት ጋር ከእግዚአብሔር ወደ እናንተ የሚመጣውን መዳናችሁን ፈጥነው ያያሉ።

²⁵ ልጆቼ ከእግዚአብሔር የመጣባችሁን ቁጣ በትዕግሥት ተቀበሉ፤ ጠላቶቻችሁ አሳደድዋችሁ፥ ነገር ግን ውድቀታቸውን በፍጥነት ታያላችሁ፤ አንገታቸውንም ትረግጣላችሁ።

²⁶ ለግላጋ ልጆቼ በሻከረው መንገድ ሄዱ፤ እንደ ተዘረፉ መንጋዎች በጠላቶች ተወስደው ነበር።

²⁷ ልጆቼ ጽኑ፤ ወደ እግዚአብሔር ጩሁ፤ ይህን ያመጣባችሁ እርሱ ያስባችኋልና፤

²⁸ ከእግዚአብሔር በፈቃዳችሁ እንደራቃችሁ፥ አሁን ደግሞ እርሱን ለመፈለግ በአስር እጥፍ ተመለሱ።

²⁹ እነዚህን መከራዎች በእናንተ ላይ ያመጣባችሁ እርሱ ዘላለማዊ ደስታን ከድኅነታችሁ ጋር ያመጣላችኋል።

³⁰ ኢየሩሳሌም ሆይ ጽኚ፥ ስምሽን የሰጠሽ እሱ ያጽናናሻልና።

³¹ መከራ ያጸኑብሽና በውድቀትሽ የተደሰቱ ሰዎች ይጐሰቁላሉ።

³² ልጆችሽ ባርያዎች የሆኑባቸው ከተሞች ይጐሰቁላሉ፤ ልጆችሽን የተቀበሉ ከተሞች ይጐሰቁላሉ።

³³ በውድቀትሽ እንደ ተደሰተች፥ በመጥፋትሽም ሐሤት እንደ አደረገች፥ በራሷ መጥፋት ታዝናለች።

³⁴ ደስተኞች ሕዝቦቿን እነጥቃታለሁ፥ ትምክሕቷ ወደ ኀዘን ይለወጥል።

³⁵ ከዘላለማዊው እሳት ለብዙ ቀኖች ይመጣባታልና፥ ለብዙ ዘመንም የአጋንንት መኖሪያ ትሆናለችና።

³⁶ ኢየሩሳሌም ሆይ ወደ ምሥራቅ ተመልከቺ፥ ከእግዚአብሔር የሚመጣልሽንም ደስታ እዪ፤

³⁷ እነሆ የላክሻቸው ልጆችሽ መጡ፤ በእግዚአብሔር ክብር እየተደሰቱ፥ በቅዱሱ ቃል ከምሥራቅና ከምዕራብ ተሰበሰቡ።”