1ኛ መጽሐፈ መቃብያን 2 - መጽሐፍ ቅዱስ - (ካቶሊካዊ እትም - ኤማሁስ)

የማታትያስ ቅዱስ ጦርነት መጀመር ማታትያስና ልጆቹ

¹ በእነዚያ ዘመን ከዮሃሪብ ልጆች መካከል ካህን የሆነ፥ የዮሐንስ ልጅ የሆነ፥ የስምዖን የልጅ ልጅ ማታያስ ተነሣ፤ ኢየሩሳሌምን ትቶ በመዲን ተቀመጠ።

² አምስት ልጆችም ነበሩት፤ እነሱም ጋዲ የተባለ ዮሐንስ፤

³ ባሕሲ የተባለ ስምዖን፥

⁴ መቃቢስ የተባለ ይሁዳ፤

⁵ አዋራን የተባለ ኤልዓዛር፥ አጶሁስ የተባለ ዮናታን ናቸው።

⁶ በይሁዳ አገርና በኢየሩሳሌም የተደረገውን ርኩሰት አየ፤

⁷ እንዲህም አለ፥ “ወዮልኝ፥ እኔ የተወለድሁት የሕዝቤን መጥፋትና የቅድስቲቱን ከተማ መደምሰስ ለማየት ነውን? ከተማይቱ በጠላት እጅ ስትወድቅና ቤተ መቅደሷም ለባዕድ ሰዎች ተላልፎ ሲሰጥ ቁጭ ብሎ ልቀር ነውን?

⁸ ቤተ መቅደሱ ክብር እንደሌለው ሰው ሆኗል፤

⁹ ክብሩን የሚያንጸባርቁ ዕቃዎች ተማርከው ሄደዋል፤ ሕፃናቱ በየመንገዱ ታርደዋል፤ ወጣቶቹም በጠላት ሰይፍ ወድቀዋል።

¹⁰ (የከተማችንን) የመንግሥትነት መብቷን ያልወረሰባት ምን አገር አለ? ምርኮዎችዋን ያልወሰደ ማን አለ?

¹¹ ጌጧ ተወስዶባታል፤ የቀድሞ ነጻነትዋ በባርነት ተቀይሯል።

¹² እነሆ የተቀደሰው ቦታ፥ ተቀይሯል። ውበታችን መና ሆኗል፤ አሕዛብ አርክሰውታል።

¹³ ለመሆኑ የምንኖረው ለምኑ ነው?”

¹⁴ ማታትያስና ልጆቹ በኀዘን ልብሳቸውን ቀደዱ፤ የተለተለ ልብሳቸውን የተለተለ ለብሰው ታላቅ ኀዘን አደረጉ።

¹⁵ ለማስካድ የታዘዙ የንጉሡ መልእክተኞች መሥዋዕት ፍለጋ ወደ ሞደን መጡ።

¹⁶ ብዙ እስራኤላውያን ወደ እነርሱ ሄዱ፤ ማታትያስና ልጆቹ ግን ብቻቸውን ተለይተው ቀሩ።

¹⁷ የንጉሡ መልእክተኞች ማታትያስን እንዲህ አሉት፥ “አንተ በዚች ከተማ ክቡርና ታላቅ ሹም ነህ፤ በልጆችህና በወንድሞችህ የተደገፍህ ነህ።

¹⁸ በል እንግዲህ ሕዝቦች ሁሉና በኢየሩሳሌም የቀሩ ሰዎች እንዳደረጉት አንተ በመጀመሪያ ቅደምና በንጉሡ የተወሰነውን ነገር ፈጽም፤ አንተና ልጆችህ ቁጥራችሁ ከንጉሡ ወዳጆች ጋር ይሆናል፤ ብርና ወርቅ ይሰጣችሁና ብዙ ስጦታዎችም ይደረግላችሁና ትከብራላችሁ”።

¹⁹ ማታትያስ በብርቱ ቃል እንዲህ ሲል መልስ ሰጠ፤ “በንጉሡ መንግሥት ውስጥ ያሉት ሕዝቦች ሁሉ ከየአባቶቻቸው አምልኮ ርቀውና ትእዛዙንም እሺ ብለው ቢቀበሉትም

²⁰ እኔና ልጆቼ፥ ወንድሞቼም የምንከተለው የአባቶቻችንን ቃል ኪዳን ነው።

²¹ ሕጉንና ትእዛዞቹን እንዳንተው ጸጋውን ይስጠን።

²² ወደ ቀኝ ወይም ወደ ግራ በማለት ከአምልኮአችን ርቀን የንጉሡን ትእዛዞች አንቀበልም”።

²³ ማታትያስ ንግግሩን ባቆመ ጊዜ አንድ አየሁዳዊ ሰው በንጉሡ ትእዛዝ መሠረት በሞዲን መሠዊያ ላይ በሰዎች ሁሉ ፊት ለመሠዋት ወደ ፊት ሄደ።

²⁴ ማታትያስ ይህን ባየ ጊዜ በእግዚአብሔር ፍቅር ተቃጠለ፤ ሰውነቱም በቁጣ ተንቀጠቀጠ፥ በጣም ተቆጣ፥ ሮጦም ሰውዬውን በመሠዊያው ላይ አረደው፤

²⁵ ሰዎቹ እንዲሰዉ ያስገድድ የነበረውን የንጉሡን ባለሟል ወዲያው ገደለውና መሠዊያውንም ገልብጦ ጣለው።

²⁶ በሳሉ ልጅ በዚምሪ ላይ ፊንሃስ እንዳደረገው ሁሉ ማታትያስ በሙሴ ሕግ ፍቅር በመቃጠል እንዲሁ አደረገ።

²⁷ ከዚህ በኋላ ማታትያስ በከተማው መካከል ሲያልፍ ድምፁን ከፍ አድርጐ፥ “የሙሴን ሕግ የሚያፈቅሩ ሰዎች ሁሉ፥ ቃል ኪዳኑንም የሚደግፉ ሁሉ ይከተሉኝ” እያለ ጮኸ።

²⁸ እርሱና ልጆቹ በከተማ ያላቸውን ሁሉ ትተው ወደ ተራራ ሸሹ።

የሰንበት ቀን መከራ በበረሃ

²⁹ ፍትሕንና ትክክለኛነትን ይፈልጉ የነበሩ ብዙ ሰዎች በበረሃ ለመኖር ወደ በረሃማው አገር ወረዱ፤

³⁰ እነርሱ፥ ልጆቻቸውና ሚስቶቻቸው መከራ ስለ በዛባቸው ሁሉም ወደ በረሃ ሄዱ።

³¹ በዳዊት ከተማም፥ ኢየሩሳሌም ለነበሩ ለንጉሡ ባለሥልጣኖችና ወታደሮች የንጉሡን ትእዛዝ አንቀበልም ያሉ በበረሃ ወደሚገኝ ያልታወቀ ስፍራ እንደ ሸሹ ተነገራቸው።

³² ብዙ ወታደሮች ተከታተሏቸውና ደረሱባቸው፤ የጦር ሰፈራቸውንም በእነርሱ ፊት ለፊት አደረጉ፤ በሰንበት ቀን ከእነርሱ ጋር ውጊያ ለመግጠምም ተዘጋጁ፤

³³ “አሁን እንግዲህ በቃ፤ ውጡና የንጉሡን ትእዛዝ ፈጽሙ፤ ሕይወታችሁም ይድናል” አሏቸው።

³⁴ እነርሱ ግን፥ “አንወጣም፥ ሰንበትን አፍርሰን ንጉሡ ያዘዘውን አንቀበልም” ብለው መለሱ።

³⁵ ወታደሮቹ ወዲያውኑ ውጊያ ገጠሙዋቸው፤

³⁶ እነዚያ ምንም አልመለሱለቸውም፤ ድንጋይም አልወረወሩባቸውም፤ መደበቂያቸውንም አልዘጉባቸውም።

³⁷ “ሕሊናችን ንጹሕ ሆኖ እንሙት፤ ያለ አግባብ እንደምትገድሉን ሰማይና ምድር ይታዘባሉ” ይሉ ነበር።

³⁸ እነዚህ ሰዎች በሰንበት ቀን ጦርነት ገጠሙዋቸው፤ ከነሚስቶቻቸው፥ ከነልጆቻቸው፥ ከነአባቶቻቸው አንድ ሺህ የሚያህሉቱ በዚህ ቀን አለቁ።

³⁹ ማታትያስና ጓደኞቹም ይህን በሰሙ ጊዜ እጅግ አዘኑ።

⁴⁰ እርስ በርሳቸውም እንዲህ ተባባሉ፦ “ሁላችንም እንደ ወንድሞቻችን አይሁዶች ብንሆን ኖሮ ሕይወታችንንና ሃይማኖታችንን ለመጠበቅ ከአሕዛብ ወገን የሆኑትን ስንዋጋ እንኑር ብንል፥ ከምድር ገጽ ፈጽመው ያጠፉናል።”

⁴¹ በዚያም ቀን በሰንበት ቀን አንድ ሰው ቢገድልባቸው፥ እነርሱም ራሳቸውን መከላከል እንዳለባቸውና ከዋሻቸው ውስጥ እንዳሉ ዐይኖቻቸው እያየ እንደሞቱ ወገኖቻቸው እንዳይጠፉ ወሰኑ።

⁴² በዚያን ጊዜ የእስራኤል ጀግኖች እና ተዋጊዎች ከሕጉ ጎን ለመቆም ፈቃደኛ የሆኑ ሰዎች በአሲዳውያን እየተመሩ ተቀላቀሉዋቸው።

⁴³ ከእነዚህ ከሚደርስባቸው ክትትል ለመሸሽ የመረጡት ሁሉ ከጐናቸው በመሰለፋቸው ኃይላቸው እየተጠናከረ ሄደ።

⁴⁴ ራሳቸውን በሠራዊት መልክ አደራጅተው ኃጢአተኞችንና ክፉዎቹን (ከሐዲዎቹን) በቁጣቸው መቷቸው፤ የቀሩት ወደ አረማውያን ሕዝብ ሸሽተው አመለጡ።

⁴⁵ ማታትያስና ጓደኞቹ እየዞሩ የአረማውያንን መሠዊዎች አፈራረሱ።

⁴⁶ በእስራኤል አገር የሚገኙትን ያልተገረዙ ልጆችንም በግድ ገረዙዋቸው፤

⁴⁷ ትዕቢተኞቹንም በታተኑዋቸው፥ ሥራቸውም ተቃናላቸው።

⁴⁸ ከአረማውያንና ከነገሥታት እጅ የሙሴን ሕግ ነጥቀው ወሰዱ፤ የኃጢአተኛቹንም ወኔ ሰለቡ።

የማታትያስ ምስክርነት እና ሞት

⁴⁹ የማታትያስ ቀኖች ወደ ፍጻሜአቸው እየተቃረቡ ሄዱ፤ ለልጆቹ እንዲህ አላቸው፥ “እነሆ አሁን ትዕቢትና በደል ወደ ላይ ከፍ ከፍ እያሉ ነው፤ ዘመኑም የብጥብጥና ጥላቻ ዘመን ነው፤

⁵⁰ ልጆቼ ሆይ የሙሴ ሕግ ፍቅር ይኑራችሁ፤ የአባቶቻችሁን ቃል ኪዳን ለመፈጸም ሕይወታችሁን አሳልፋችሁ የምትሰጡበት ወቅት አሁን ነው።

⁵¹ አባቶቻችን በጊዜአቸው የፈጸሟቸውን ሥራዎች አስታውሰ፤ ታላቅ ክብርና ዘላለማዊ ዝና ታገኛላችሁ፤

⁵² አብርሃም በፈተናው ጊዜ ታማኝ ሆኖ ስለ ተገኘ እንደ ጽድቅ ሆኖ አልተቆጠረለትምን?

⁵³ ዮሴፍ በመከራው ጊዜ ሕግን ጠብቆ የግብጽ አገር ጌታ ሆነ።

⁵⁴ አባታችን ፊንሃስ በተቃጠለ ፍቅሩ የዘላለማዊ ክህነት ቃል ኪዳንን ተቀበለ።

⁵⁵ ኢያሱ ግዳጁን በመፈጸሙ በእስራኤል ዳኛ ሆነ።

⁵⁶ ካሌብ ለእስራኤል ሕዝብ በሰጠው እውነተኛ ምስክርነቱ እርስት አገኘ።

⁵⁷ ዳዊት በመንፈሳዊነቱ ለዘለዓለም ንጉሣዊ ዜማን ወረሰ።

⁵⁸ ኤልያስ ስለ ሙሴ ሕግ በፍቅር በመቃጠሉ፤ ወደ ሰማይ ተወሰደ።

⁵⁹ አናንያ፥ አዛርያ፥ ሚሳኤል በእግዚአብሔር ስለተማመኑ፤ ከእሳት ነበልባል አመለጡ።

⁶⁰ ዳንኤል በቅንነቱ ከአንበሶች አፍ ዳነ።

⁶¹ በእርሱ በእግዚአብሔር ተስፋ የሚያደርጉ ሁሉ ከትውልድ እስከ ትውልድ ድክመት እንደማያገኛቸው ዕወቁ።

⁶² የኃጢአተኛን ሰው ዛቻ አትፍሩ፤ ምክንያቱ የእርሱ ክብር የሚሄደው ወደ መበስበስና ወደ ትል ነው።

⁶³ ዛሬ ክብርን ያገኛል፥ ነገ ግን አይገኝም፤ ምክንያቱም ወደ መጣበት ትቢያ ይመለሳል፤ ዕቅዱም እንዳልነበር ይሆናል።

⁶⁴ ልጆቼ ሆይ፥ የሙሴን ሕግ ጠንክራችሁ ያዙ፤ ምክንያቱም ትልቅ ክብር የሚያስገኝላችሁ እርሱ ነው።

⁶⁵ ወንድማችሁ ስምዖን መልካም ምክር ሊለግሳችሁ እንደሚችል አውቃለሁ፤ ሁልጊዜ ስሙት፥ አባት ይሆናችኋል።

⁶⁶ ገና በወጣትነቱ ጀግና የሆነው ይሁዳ መቃቢስ የጦር ሠራዊታችሁ መሪ ይሆናል፤ በአሕዛቦች ላይ በምታደርጉት ጦርነት ይመራችኋል።

⁶⁷ እናንተ ግን የሙሴን ሕግ የሚጠብቁትን ሁሉ ወደ እናንተ ሰብስቧቸው፤ የሕዝባችሁን በደል ተበቀሉ።

⁶⁸ አረማውያን ያደረጉባችሁን ክፉ ነገር መልሳችሁ አድርጉባቸው፤ የሙሴ ሕግ የሚያዘውን በጥብቅ ፈጽሙ”።

⁶⁹ ከዚህ በኋላ ባረካቸውና ሞተ።

⁷⁰ በመቶ አርባ ስድስት ዓመተ ዓለም ሞተ፤ በሞዲን በቤተሰብ መቃብ ተቀበረ፤ መላው እስራኤል በጥልቅ አዘነለት።