1ኛ መጽሐፈ መቃብያን 1 - መጽሐፍ ቅዱስ - (ካቶሊካዊ እትም - ኤማሁስ)

አንደኛ መቃብያን መግቢያ ታላቁ እስክንድር እና ተከታዮቹ

¹ የመቄዶንያዊው የፊሊጶስ ልጅ እስክንድር ኪትማውያን አገር (መቄዶንያ) ወጥቶ የፋርስና የሜዶን ንጉሥ የሆነው ዳርዮስን አሸንፎ በቦታው ለመጀመሪያ ጊዜ የግሪካውያን ንጉሥ ከሆነ በኋላ፤

² ብዙ ጦርነቶችን አደረገ፤ ብዙ ምሽጐችን ያዘ፤ የሀገሪቱን ነገሥታት ገደለ።

³ እስከ ዓለም ዳርቻ ድረስ ሄደ፤ የብዙ ሕዝቦችን ምርኮ ወሰደ። ምድር በፊቱ ዝም አለች፤ ልቡ ከፍ ከፍ አለና በትዕቢት ተነፋ።

⁴ እጅግ ብርቱ ጦር ሠራዊት አዘጋጀ፤ ለእርሱ ግብር መክፈል የሚገባቸውን አገሮች ገባሮቹ እንዲሆኑ አደረገ።

⁵ ከዚህ በኋላ ታመመ፤ ሊሞት መሆኑንም ተገነዘበ።

⁶ ታላላቅ የጦር መኰንኖችንና ከልጅነት ጀምሮ ከእርሱ ጋር ጦርነት ያደረጉትን ሰዎች ከመሞቱ በፊት መንግሥቱን አከፋፈላቸው።

⁷ እስክንድር የሞተው ዐሥራ ሁለት ዓመት ከነገሠ በኋላ ነው።

⁸ ታላላቅ የጦር መኰንኖቹ በየግዛታቸው ሥልጣን ያዙ፤

⁹ እርሱ ከሞተ በኋላ ሁሉም ዘውድ ደፉ፤ ልጆቻቸውም ከእነርሱ በኋላ ለብዙ ዓመታት እንዲሁ አደረጉ፤ በምድር ላይ ብዙ ክፋትን ሠሩ። አንጥዮኩስ ኤጲፋንዮስ፥ እስራኤል በግሪካዊ ሥርዓት ተፅዕኖ ሥር

¹⁰ ከእነርሱም አንድ ክፉ ዘር ወጣ፤ አንጥዮኩስ አጲፋንዮስ ይባላል፤ የንጉሥ አንጥዮኩስ ልጅ ነው። እርሱ በሮም አስረኛ ሆኖ ከተቀመጠ በኋላ በግሪካውያን መንግሥት ጊዜ በአንድ መቶ ሰባ ሰባተኛ ዓመት ላይ ንጉሥ ሆነ።

¹¹ በዚያን ጊዜ ከእስራኤል ውስጥ ሕግ አፈራሾች ወጡና ብዙ ሰዎችን አሳሳቱ፥ “ኑ እንሂድና በዙሪያችን ካሉት አሕዛብ ጋር እንስማማ፤ ምክንያቱም ብዙ ክፉ ነገሮች የመጣብን ከእነርሱ በመለየታችን ነው” አሉ።

¹² ይህ ሐሳብ ደስ ብሎአቸው

¹³ ከሕዝቡ መካከል ብዙዎች በፍጥነት ወደ ንጉሡ ሄዱ፤ እርሱም የአረማውያን ሕዝቦች የሚያደርጉትን እንዲያደርጉ ሥልጣን ሰጣቸው።

¹⁴ ስለዚህ እንደ አረማውያን ሕዝቦች ልማድ በኢየሩሳሌም አንድ የእስፖርት ማዘውተሪያ ስፍራ ሠሩ።

¹⁵ ግዛታቸውን ደበቁ፤ ከአረማውያን ጋር ለመስማማት ቅዱሱን ቃል ኪዳን ካዱ፤ ክፉ ነገርን ለማድረግ ራሳቸውን አሳልፈው ሸጡ። የመጀመሪያው የግብጻውያን ዘመቻና የቤተ መቅደሱ መዘረፍ

¹⁶ አንጥዮኩስ የመንግሥቱን ሥልጣን በሚገባ ካጠናከረና ካደራጀ በኋላ በራሱ ግዛት ላይና በምሥር (በግብጽ) ላይ ለመንገሥ ተነሣሣ።

¹⁷ ሠረገላዎች፥ ዝሆኖችና ብዙ የጦር ሠራዊት ይዞ ወደ ግብጽ አገር ገባ፤

¹⁸ ከግብጽ ንጉሥ ከጰጠሎሜዎስ ጋር ጦርነት ገጠመ፤ ጰጠሎሜዎስ ተሸነፈና ብዙ ቁስለኞችን ትቶ ሸሸ።

¹⁹ የግብጻውያን ምሽጐች ተያዙ፤ አንጥዮኩስ የግብጽን ምርካኞች ወሰደ።

²⁰ ግብጽን አሸንፎ በመቶ አርባ ሦስት ዓመተ ዓለም ተመለሰና ከባድ የጦር ሠራዊት ይዞ በእስራኤልና በኢየሩሳሌም ላይ ዘመተ፥

²¹ በትዕቢት ወደ ቤተ መቅደሱ ውስጥ ገብቶ የወርቅ መሠዊያውንና የመብራት መቅረዙን፥ ሌሎቹንም ዕቃዎች ሁሉ፥

²² የሕብስት ማቅረቢያ ጠረጴዛውን የመጠጥ ማቅረቢያ ዕቃዎችን፥ ጽዋዎችን፥ የዕጣን ማጨሻ የወርቅ ዕቃዎችን፥ መጋረጃዎችና ዘውዶችን ወሰደ፤ በቤተ መቅደሱ መግቢያ ላይ የነበረውን የወርቅ ጌጥ በሙሉ አንሥቶ ወሰደው።

²³ እንዲሁም ብሩንና ወርቁን፥ ክቡር ዕቃዎችን ወሰደ፤ ያገኛቸውን የቤተ መቅደሱን የሀብት ሥውር መዝገቦችንም ዘረፈ።

²⁴ ሁሉንም ይዞ ወደ ሀገሩ ሄደ። ብዙ የሰው ደም አፈሰሰ፤ በትዕቢት የተሞሉ የስድብ ቃሎች ተናገረ።

²⁵ በመላው የእስራኤል ሀገር ታላቅ ኀዘን ተደረገ።

²⁶ ሹማምንትና ሽማግሌዎች በኀዘን አለቀሱ፤ ወጣቶችና ልጃገረዶች ተጐሳቆሉ፤ የሴት ቁንጅና ደበዘዘ።

²⁷ ሙሽራው ዋይ ዋይ አለ፤ ሙሽሪትም በቤት ውስጥ በኀዘን ተኮራመተች።

²⁸ ምድር በነዋሪዎችዋ ምክንያት ተንቀጠቀጠች፤ የያዕቆብ (የእስራኤል ቤት) በሙሉ ኀፍረትን ተከናነበ። የአክራን ግንባታና የሚሳርክ ጣልቃ ገብነት

²⁹ ከሁለት ዓመት በኋላ ንጉሡ ወደ ይሁዳ ከተሞች አንድ የግብር ሹም ላከ እርሱም ከባድ ጦር ሠራዊት ይዞ ወደ ኢየሩሳሌም መጣ።

³⁰ ለሰዎቹ በውሸት የሰላም ቃል ተናገራቸውና አመኑት፤ ከዚያ በኋላ በድንገት ወደ ከተማዋ ገባ፤ ትልቅ አደጋ ጣለባት፤ በእስራኤል ውስጥ ብዙ ሰዎች ገደለ።

³¹ ከተማዋን ዘረፈ፤ አቃጠለ፤ ቤቶችንና ቅጥሩን አፈራረሰ።

³² ሴቶችንና ሕፃናትን ማርከው ወሰዱ፤ ከብቶችንም ወሰዱ።

³³ ከእዚህ በኋላ የዳዊትን ከተማ ደግሞ ገነቡ፤ በዙሪያዋም ረጅም መካበቢያና ጠንካራ ምሽጐች አደረጉ። ምሽጋቸውም እዚያው ሆነ።

³⁴ ሃይማኖትና ሕግ የሌላቸውን ክፉ ሰዎች ጠባቂዎች አደረጉባትና አጠናከሩዋት።

³⁵ የጦር መሣሪያና ስንቅ አከማቹባት፤ የሰበሰቧቸውን የኢየሩሳሌምን ምርኮዎች አስቀመጡባት፤ ትልቅ ማጥመጃም ሆነላቸው።

³⁶ ይህ ነገር ለቤተ መቅደሱ ወጥመድ ሆነ፤ ለእስራኤልም ሁልጊዜ መጥፎ ተቃራኒ ሆነበት።

³⁷ በመቅደሱ ዙሪያ የንጹሐን ደም አፈሰሱ፤ ቅዱሱን ቦታ አረከሱ።

³⁸ በእነርሱ ምክንያት የኢየሩሳሌም ነዋሪዎች ሸሽተው ሄዱ፤ ከተማዋ የጸጉረ ልውጦች መኖሪያ ሆነች፤ ለትውልዷ እንግዳ ሆነች፤ የገዛ ልጆችዋ ጥለዋት ሄዱ።

³⁹ የተበዘበዘው ቤተ መቅደስዋ ባዶውን ቀረ፤ በዓሎችዋ በኀዘን ተለወጡ፤ ሰንበቶችዋ ማላገጫ ሆኑ፤ ክብርዋም ተናቀ።

⁴⁰ የከበረችውን ያህል ተዋረደች፤ ታላቅነትዋም ለኀዘን ቦታውን ለቀቀ። የአሕዛብ አምልኮ መደራጀት

⁴¹ ንጉሡ በመላው መንግሥቱ የእርሱ የሆኑ ሕዝቦች ሁሉ አንድ እንዲሆነና ሁሉም የራሱን የተለየ ባህል እንዲተው አወጀ።

⁴² አሕዛቦች ሁሉ የንጉሡን ትእዛዝ እሺ ብለው ተቀበሉ።

⁴³ ብዙ እስራኤላውያን ለጣዖቶች መሥዋዕት በማቅረብና ሰንበትን በማርከስ አምልኮውን ተቀበሉ።

⁴⁴ እንዲሁም ንጉሡ በሀገራቸው እንግዳ የሆኑትን ልምዶች እንዲከተሉ በማዘዝ ወደ ኢየሩሳሌምና ወደ ይሁዳ ከተሞች በመልእክተኞች አድርጐ ደብዳቤዎችን ላከ፤

⁴⁵ ከቤተ መቅደሱ የሚቃጠሉ መባዎችን፥ መሠዋዕቶችንና መጠጦችን እንዲያስወግዱ፥ ሰንበትንና በዓላትን እንዲያረክሱ አዘዘ፥

⁴⁶ ቤተ መቅደሱንና የተቀደሱ ነገሮችን እንዲያረክሱ፤

⁴⁷ ለጣዖቶች የተቀደሱ ቦታዎችን መሠዊያዎችን፥ ቤተ መቅደሶችንም እንደሠሩና አሳማዎችንና ያልተፈቀዱ እንስሶችን እንዲሠዉ፤

⁴⁸ ልጆቻቸውን እንዳያስገርዙ፤ ሁሉን ዓይነት ርክሰት በመሥራት ነፍሳቸውን እንደያሳድፉ አዘዘ፤

⁴⁹ ይህን ሁሉ የሚያደርጉትም ሁሉ የሙሴን ሕግ በመርሳትና ትእዛዘቹንም በማፍረስ ነው።

⁵⁰ የንጉሡን ትእዛዝ አልፈምም ያለ ሁሉ ይገደላል።

⁵¹ በዚህ ዓይነት ነው ንጉሡ በእርሱ ሥር ለሚገኙ ዜጎች ሁሉ በጽሑፍ ትእዛዙን ያስተላለፈው፤ በሕዝቡ ሁሉ ላይ ተቆጣጣሪ አደረገበት፤ በየከተማው መሥዋዕቶች እንዲያቀርቡ ወደ ይሁዳ ከተሞች ትእዛዝ አስተላለፈ።

⁵² ከሕዝቡ ብዙ ሰዎች የሙሴን ሕግ በመተው ከአረማውያን ጋር ተስማሙ፤ በሀገሪቱ ላይ ክፉ ሥራ ሠሩ፤

⁵³ እስራኤላውያን በየመደበቂያ ቦታቸው እንዲሸሸጉ አስገደዱአቸው።

⁵⁴ ቄስለው ወር (ከኀዳር 15 እስከ ታኀሣሥ 15) በዓሥራ አምስተኛው ቀን ንጉሡ በሚቀጥለው መሥዋዕት መሠዊያ ላይ የጥፋት ርኩሰት ሠራ፤ በይሁዳ ከተሞች ዙሪያም መሠዊያዎች ተቋቋሙ።

⁵⁵ በቤቶች መዝጊያዎች አጠገብና በአደባባዮች ዕጣን ያጨሱ ነበር።

⁵⁶ የሙሴን ሕግ መጻሕፍት ሲያገኙዋቸውም ቀዳደው በእሳት ውስጥ ይጨምሩዋቸው ነበር።

⁵⁷ የብሉይ ኪዳን መጽሐፈ ይዞ የተገኘና የሙሴን ሕግ የሚያከብር ሰው በንጉሡ ውሳኔ መሠረት ይገደል ነበር።

⁵⁸ ውሳኔውን ሲያፈርሱ የሚያዙ እስራኤላውያን በየወሩ በጭካኔ ይቀጡ ነበር።

⁵⁹ በየወሩ በ 25ኛው ቀን በቤተ መቅደሱ መሠዊያ ላይ በተሠራው መሠዊያቸው ላይ ይሠዉ ነበር።

⁶⁰ ልጆቻቸውን ያስረገዙ ሴቶች በንጉሡ ውሳኔ መሠረት ይገደሉ ነበር። የተረገዙት ሕፃናትም በእናቶቻቸው አንገት ላይ እንዲሰቀሉ ይደረጉ ነበር።

⁶¹ ቤተሰቦቻቸውና የግርዘት ሥርዓቱን የፈጸሙ ሁሉ ከሞት አያመልጡም ነበር።

⁶² ይሁን እንጂ በእስራኤል ብዙዎች በእምነታቸው ጠንካሮች ሆነው ተገኝተዋል፤ እርኩስ ነገር ላለመብላትመ ኃይል አግኝተዋል።

⁶³ እርኩስ ምግብ ከመብላትና ቅዱሱን ቃል ኪዳን ከማርከስ ይልቅ ሞትን መርጠው ሞተዋል።

⁶⁴ በእስራኤል ላይ የወደቀው ቅጣት አስፈሪ ጥፋት ነበር።