Matthew INTRO1 - ASII LAKDAP Bible (BSI)BOMPHAHO Mothiq Raq Awaiq Tsütsa Ahea Lakdap na tsütsa ahea bomtsi chongtlaq arka man na Tongshong Chü pat na Shiikeawe raq asenginok ma jai maq Chhiiwantiwe ashi mitiikikang nguta kiqkham kongphiq raütu khakuq wantaq kra tiikupi wan miitu Jesuq tiikitaq kra nguta chongkuqtlo. Riita ara tsütsa ahea Jesuq rawii chhiwantaq nai apaiq jonglu wantaq arka anok ahiq Jehudinok miitu lam lam li ka riimak. Arka mangjong hiq na maiqse angu ümchuwa diim wantlaq kra wiitarü miitu. Ara Mothiq Lakdap arka tiitho tiipha aheawiq maq awaiqthü. Ara lakdap arka Jesuq rawüchhi maq tiichap pha wanto. Raütiishe apaiq raq kham lam wantaq kra chongtlo. Raütiishe, tha raq apaiq maitai wantaq kra chongtlo ahata. Kiimaq kra chonglot raütiishe apaiq raq jaqsham wantaq traho bom chongke wan, asii bomtsi shrinke wan, kiimaq atsi asiti thun Gelili hong maq tiiheakuq wantaq jaqsham thun kriishe phanchan wantlo. Arthun jaqsham kaiwa ara chongke wan lot jai shetiq, ara Tsütsa Ahea lakdap na Jesuq ka Gelili hong maq riita Jerusalem chela na kihoto nguta chongtlo. Raüta Jesuq raq apaiq traho atiisup wan chepat na jaqsham wantaq kra chongtlo. Raütiishe apaiq ka pumsongkham na tübaiq wantaq raüta kra jai maq apaiq ka amaa wiishe dong wan nongtaq bom kriishe chongtlo. Ara Tsütsa Ahea Lakdap na Jesuq ka Shiikeawe Tri Shrinketi we Shra Ajong Pinthum nguta chongtlo. Apaiq ka Shiikeawe Thungtri liichum chongke wanti arang hoti we nguta chongtlo. Apaiq ka Shiikeawe raq mangjong maiqse kunli ka asengi ma jamkho tiija wan tlaq kra lamphan kra chongke wanti we riito. Apaiq raq achongkuq wan bomtsi thun kra adam na riichom raüta liiwan raüla, tri raütu lam biingi na seng raüta chongkuqtlo. Ara chongtiikai bom raüchong lam biingi ngutiikai arka akha: Apha na Hiqlam maq Traho bomchong kuq wantaq raütu, kiijaq maiqse rong arai, minshiiq, maiqse kharü, kiimaq Ramungtan na siti maiqsetiim rilung lam phan kra chong kuq tlo, (ajong 5-7) na. Kiimaq raütu anai ngoja na, ajaqshisetiim roqshi ri wenai ma tsangshiq minshiiq lam na tsii chong kuq wantaq bomchong kra, (ajong 10) na chongtlo. Kiimaq raütu atsam ngoja na, Ramungtan na siti maiqse rilung shiiton manphansetiim thun kra, (ajong 13) na chongkuqtlo. Kiimaq bom raütu blai ngoja na, jaqshise ashi rilung ka jamkha siwan chang wa kra liichum, (ajong 18) na chongkuqtlo. Kiimaq bom raütu biingi ngoja na, ümchaü pat ara thum wan lamlu nai Shiikeawe Mungtan saüho lamlu bomtsi ka, (ajong 24-25) na chong kuqtlo. BOMKHUPO THUN Jesuq Khristo weraü mang nai apaiq rawüchhi 1.1—2.23 Khamlamketiwe Johan jaqsham 3.1-12 Jesuq khamlam nai apaiq maitai 3.13—4.11 Jesuq raq Gelili maq nokwe ma trahoke wan 4.12—18.35 Gelili maq riita Jerusalem na saüli traho jaqsham 19.1—20.34 Athum chepat Jerusalem nai kra tro na jaqsham 21.1—27.66 Tatiwe amaa wa dong wan nai asengi rai riihumkai 28.1-20 |
Tangsa Naga Bible - ASII LAKDAP
Copyright © 2015 by The Bible Society of India
Used by permission. All rights reserved worldwide.
Bible Society of India