JOSHUA 24 - ASII LAKDAP Bible (BSI)

Joshua Raq Israilnok Ma Kiimriiphea Bom Chongkuqto

¹ Joshua raq Israilnok kaüwa weraü maiqphan tlotli Shekhem chela na triitamto. Apaiq raq Irailnok wa phukhu welabi, ashun asheatibi, phowebi, kiimaq siihiipbi thun ka Shiikeawe man na tiichapto.

² Raüta Joshua raq mungmaiqse wiitarü ma, akha nguto. “Tatiwe Israilnok Shiikeawe raq akha ngutlo: ‘Man na rathup raphaji na, namtitiim ka Euphretis Rai reko nü wiiq na shongto. Kiimaq laihin shiikea thun noq raüta sito. Namtitiim phong wa weshi mang ka Tera. Apaiq ka Abraham nai Nahor ma awe.

³ Kiiwiishe ngi raq namti Abraham ka Euphretis Rai maq siimko nü mung kiiwa sheaho kang. Lata ngi raq apaiq ka Kanan mung arjaq kunli na sheaho kang. Ngi raq apaiq ma alai ala pahea kuqkang. Ngi raq apaiq ma ase Isak kuq kang,

⁴ kiimaq Isak ma ase nai wenai Jakob nai Esau kuqkang. Ngi raq Esau ma apaiq rii tachong hiqshong ku akin tonglong Edom mung ka kuqkang. Shatmaq namti Jakob nai asetiim ka Ejip mung na laühoto.

⁵ Kra jai miishe, ngi raq Mosheq nai Aron tiikikang. Kiimaq ngi raq Ejip mungti ma chamchao jonghea tiisaü kang. Shatmaq ngi raq namshiq ka Ejip mung wa tsuq wan kang;

⁶ Ngi raq namtitiim ka Ejip mung wa tiidong tsuq wan kang, kiimaq Ejip mungti raq kumrang leng na chao raüta nai kumrang raikhü na chao raüta tsangshiq ka jowanto. Shatmaq ümtiikiiwa namtitiim ka Khamshii Khamjong rai na saütaq,

⁷ tsangshiq raq ijaq wa khrum jaüjaü hoqsii trangto, krai mren, ngi raq tsangshiq nai Ejipnok liipan na rathup ranyaq tiisaü kang. Ngi raq Khamshii Khamjong rai kham ka Ejipnok thaq na jütso tiiblun lata wiita tiithap baiq kang. Ngi raq Ejip mungti ma jamlai wa riikang kriika namshiq raq asap han. “‘Namshiq ka kumtsaiphii binjü na rawii luhea silan.

⁸ Kra jai miishe, ngi raq namshiq ka Jordan rai maq shedong nü wang na shongti Amoraiq mung kiiniishe shea wan kang. Tsangshiq raq namshiq khatto. Shatmaq ngi raq tsangshiq ka namshiq ma tiitang kang. Krai mren, namshiq raq tsangshiqnok hiqshong thun ka jiiwan lan. Kiimaq ngi raq tsangshiq ka, namshiq raq khat wan tlan kra phan phan wiita shiithen baiq kang.

⁹ Kriimiishe, Mob mung hokhamwe Balak, Jippor se raq raq namshiq ka khatto. Apaiq raq Beor se Balaam ma bom tiichongkito. Kiimaq apaiq ma namshiq khuthaq na manson laq nguta chongto.

¹⁰ Shatmaq ngi raq Balaam bom ka tre mang riikang. Kra ningkhan she apaiq raq namshiq ma achu shiiman kuqto. Kiimaq ngi raq namshiq ka Balak jaq wa tiiwongkuq kang.

¹¹ Lanta namshiq raq Jordan rai ka jinlan. Lanta Jeriko niishe saülan. Jerikoti raq namshiq khatto. Kra niqriri sii hali Amoraiqnok, Perijaiqnok, Kanannok, Hitaiqnok, Girgashaiqnok, Hiwaiqnok, kiimaq Jebusaiqnok thun riimin namshiq khatto. Shatmaq ngi raq namshiq ma tsangshiq thun ka wiita tiitang kuqkang.

¹² Namshiq raq tsangshiq khat wan tlan krai mren, Amoraiqnok hokham wenai kra jobaiq miitu, ngi raq tsangshiq ka phiip ma tiitsaikang. Kriika namshiq nepjasai nai liqsin ma hai raüta riimak.

¹³ Ngi raq namshiq ma hiq namshiq raq ümtiikiimin shamsiq man kra kuqkang. Kiimaq chela thun namshiq jaq maq atei wan han riimak thun kra kuqkang. Ümchaü namshiq ka kiijiishe sitlan, lanta spiqtsi namshiq raq chhijang man kriiwa pansiq tlan, kiimaq olip tsi ka achong wa, namshiq raq achhi han riimak kiiwa pansiq tlan.’”

Joshua Raq Israilnok Ma Tatiwe Mishomnoq Hanshea Nguta Waito

¹⁴ Joshua raq bom ka akha chongkuqto, “Riita, ümchaü sanha, Tatiwe ka shreng ronglaq lanta apaiq ka tsan tiitsi lanta kiimaq tsapsaü kapse maq shiililii ronglaq. Kiimaq namtitiim raq Mesapotamia mung maq shomnoqtaq kiimaq Ejip mung maq shomnoqtaq phra thun ka wiita tiijobaiq ronglaq. Lanta Tatiwe kli she shiikum pan ronglaq.

¹⁵ Kiimaq namshiq raq apaiq ka shomnoq man ngochang jiila, ümchaü ranaiq namshiq raq thapthi ronglaq, ju wa mishomnoq han. Namtitiim raq Mesapotamia mung maq shomnoqtaq phra thun kriisha mishomnoq han, shea namshiq sitlan hiqshong wa Amoraiqnok phra thun kriiwa mishomnoq han. Shatmaq ijamtitiim nai ngi raq kla, Tatiwe kriili mishomnoq hai.”

¹⁶ Kiijiishe, mungmaiqse raq treto, “Naishiq raq Tatiwe baiq laita, ahin phra thun ka shomnoqki mai!

¹⁷ Tatiwe nashiq Shiikeawe raq nawetiim nai nashiq ka Ejip mung a maiqdi asi haiwa tiidong tsuq wanto. Kiimaq apaiq raq awang chang jaqsham wantaq thun kra chhi wankai. Kiimaq apaiq raq nashiq ka maiqmung ümtinkhan lam mo laü wan kai kiiwa khup wongkuq shat maq shea wanto.

¹⁸ Kiimaq nashiq ka armung niishe saü wan kaita, arjaq siti Amoraiqnok thun ka Tatiwe raq wiita jobaiq wanto. Kra ningkhan, naishiq riimin, Tatiwe kli mishlihai. Apaiq kli naishiq Shiikeawe.”

¹⁹ Kiijiishe Joshua raq mungmaiqse ma nguto, “Shatmaq namshiq raq Tatiwe ka shiili lot man mirhan sham. Apaiq ka asii Shiikeawe. Kiimaq apaiq raq namshiq ngarai thun ka diikuq mak miraq. Apaiq raq apaiq rai riilongti thun ka ninlot mak miraq.

²⁰ Kiimaq namshiq raq apaiq baiqthü lanta pongmungti phra thun shomnoq kai kiho hanla, apaiq ka ma wesang she mijaki. Raüta namshiq ma mo mitiiho. Apaiq ka man na namshiq rai ahea sito li jiimin, apaiq raq namshiq ka mishthen baiq.”

²¹ Kiijiishe mungmaiqse raq Joshua ma nguto, “Riimak! Naishiq riika Tatiwe kli mishli hai.”

²² Kiijiishe Joshua raq tsangshiq ma nguto, “Namshiq raq Tatiwe kli mishli rong i nguta thapthi wan lan kra saqsebi ka namshiq kli she sitlan.” “Tengto, kriili dea. Naishiq arlishe saqsebi ka.”

²³ “Ikhla, namshiq phong na pongmungti phra thun rümtlan kra wiita miimbaiq rong laq. Lanta namshiq ka Israilnok Tati Shiikeawe puk na nyap ronglaq,” nguta apaiq raq tsangshiq ka shiitepto.

²⁴ Kiijiishe mungmaiqse raq Joshua ma nguto, “Naishiq raq nashiq Tati Shiikeawe kli mishli hai. Naishiq raq apaiq aming thun kra milang hai.”

²⁵ Krai mren, Joshua raq kra ranaiq niili mungmaiqse miitu tongshong kuqto. Raüta apaiq raq kra Shekhem chela kiimaq tsangshiq ma thungtri raütu kiimaq aming raütu tsangshiq raq lang chang thun kra kuqto.

²⁶ Joshua raq ara aming raütu thun ka Shiikeawe Tri lakdap na waiqthüto. Raüta apaiq raq longkaü ajongwiq ashi kra lam raüta ok chongji na Tatiwe asii tiip rinkea na shongto.

²⁷ Raüta apaiq raq mungmaiqse tlotli ma akhiishe nguto, “Ara longkaü arka nashiq khuthaq na saqse miraq. Tatiwe raq nashiq ma ümchuwa bom chongkuqtaq ka ara longkaü raq taito she. Krai mren, arka namshiq raq Shiikeawe kiq khiiman chang miitu saqse miraq.”

²⁸ Raütiishe Joshua raq mungmaiqse ka tiiwa baiqto, Krai mren maiqthun ka loweatek maiqmiimii hiqshong niishe jang wanto.

Joshua Nai Eleajar Tsaito

²⁹ Kra jai maq, Tatiwe jaqshi, Nun se Joshua ka arawii shishi ri wiiroqshi na tsaito.

³⁰ Tsangshiq raq amaa ka ku akin tonglong Ephraim wang na, Gash Pum maq shekhu nü na, apaiq hiqshong Timnath Sera chela kiijaq lapto.

³¹ Joshua ka atra sishat wiiwii, Israilnok mungmaiqse raq Tatiwe ka shiilito. Kiimaq apaiq tsaijai min, Tatiwe raq Israilnok miitu ümchuwa jaqsham wantaq kra maiqmii mak maq chhiti welabi thun ka atra sishat wiiwii tsangshiq raq Tatiwe ka shiili shat riito.

³² Joseph maa, Israilnok raq Ejip mung wa api wan ka Shekhem chela na lapto. Kra hiq phu ka Jakob raq Hamor setiim jaq wa, Shekhem ka Hamor awe kra jaq wa kampho ngam shishi maq ari riito. Kra hiqphu ka Joseph setiim ma tachong hiqshong chumkuqto.

³³ Aron se Eleajar ka tsaito. Kiimaq amaa ka ku akin tonglong Ephraim wang na Gibea chela kiijaq lapto. Gibea chela ka Eleajar se Phinehas ma achumkuq tachong hiqshong.