JOSHUA 20 - ASII LAKDAP Bible (BSI)

Chiimjin Chang Chela Thun

¹ Kiitiikaq Tatiwe raq Joshua ma,

² Israilnok ma akha chonglaq nguta thaüto, “Ngi raq Mosheq ma atiipaükai chang chela thun tsea laüta thülaq nguta aming kuqkang kra miitu tsangshiq ma chongkuq laq.

³ Maiq weshi ra raq shaiqshuq shi maq, maiq tiitsailaq tsat raüla, kra matwe ka ajaqtiwe maklii wa achum jin chang miraq. Raüla apaiq ka kra chela kiijaq tiipaü juho chang miraq.

⁴ Apaiq ka ara chela thun kriijaq, chela ashi ra na tiipaü juchang miraq. Raüta apaiq ka chela kilamchong tho na khapho chang ba hiqthung ba kriijaq ngakai chang miraq. Raüta apaiq raq kra chelati shiilangbi ma apaiq kha kra jamkho dongtaq kra chongke chang miraq. Kiijiishetiq tsangshiq raq apaiq ka chela mong na mitiinyap. Raüta apaiq sichang hiq mikuq. Raüta apaiq ka kiijaq misi.

⁵ Kiimaq ümkhiimiiwa maseta jamti raq phuk lam kai, kiijaq joho raüla, kra chelati raq matwe ka ajaqtiwe jaq na jamkhii riitii jiimin lapke maimak. Tsangshiq raq apaiq ka tiiwongke raa dongdii. Jamkhano ngukla apaiq raq maiq tsattaq ka tsankhiq tsi ma atsea chaüchaü atsat riimak, shaiqshuqshi miili tsatto.

⁶ Apaiq kha ka kra chelati phowebi raq miphokuq shaq wiiwii, apaiq ka kiijaq misi lot. Kra akhing na tsanghiq wa Ramwe Ajong Pinthumwe kra mitsai shaq wiiwii, apaiq ka chiimjin chang chela kiijiili she misi. Ramwe Ajong Pinthumwe kra tsaikai jaishe riiwe kla, kra apaiq ka ahiqshong na jang wan nong mimai.”

⁷ Krai mren, Jordan rai maq shenyap nü binjü na Gelili wang wa Kedesh chela kra tseato. Arka ku akin tonglong mung na Naphtali wang na riito. Kiimahali ku akin tonglong Ephraim mung kiiwa Shekhem chela kra tseato. Kiimahali ku akin tonglong mung na Juda wang wa Hebron chela kriimin tseato.

⁸ Kiimahali, Jordan rai maq shedong nü mung wiika, Jeriko chela maq shedong nünü binjü kumtsaiphii wang kin thung hiq wa Bejar chela kra tseato. Bejar chela ka Reuben phan ma achumkuq hiqrai na riito. Kiimahali, Gad phan ma achumkuq Gilead wang wa Ramoth chela kra tseato. Kiimaq Manase phan nok hiq Bashan wang binjü wa Golan chela kriiri tseato.

⁹ Chiimjin chang chela thun tsea wantaq ka arthun ara riito. Arka Israilnok mungmaiqse kunli miitu kiimaq Israilnok rai pongmung maiqse sidam tlaq kra miitu riito. Jurwa shaiqshuqshi maq maiq lang tiipit raüla, kriiti miisaq ka ajaqtiwe maklii wa ara chela thun arjaq tiipaü raüta mitiichhii wan. Apaiq kha ka apha na phowebi raq phoke hü maq, ajaqtiwe raq apaiq ka tsatbaiq lot mak.