DUNGWVNC 40 - ASII LAKDAP Bible (BSI)

Tatiwe Asi Tombutiip Shong Nai Akiinongke

¹ Tatiwe raq Mosheq ma nguto,

² “Apha wan jipi wa jiha ranaiqshi na Tatiwe asi Tombutiip ka shonglaq.

³ Laüta kra mong na Aming Roqshi thüchang Tongshong Tek ka tothülaq. Kiimaq kra khaki na khok tuk chang kheathum kra chanlaq.

⁴ Kiimaq chamrii ka do wanlaq laüta apaiq miirii hupsam thun ka kriithaq na thülaq. Kiimaq lem-khamchong kiimin jam mong na lam wanlaq. Laüta lemsetiim thun ka kriithaq na tiihong thülaq.

⁵ Kiimaq chaq berong-wacha homseng honglu chaq chang ka Tongshong Tek khaki na tolaq. Kiimaq Tombutiip na nyap wachang kilü kheathum kra chanlaq.

⁶ Laüta Tombutiip rinkea na honglu thun chaq chang berong-wacha kra tiihonglaq.

⁷ Kiimaq jaqhe chang nüchhong-win pin ka Tombutiip nai berong-wacha liipan na tiihonglaq. Laüta kiijaq kham tiimali thiilaq.

⁸ Kiimaq Tombutiip keathung tro ka kheathum maq ruklaq. Laüta anyap wa chang kilamchong na kheathum ka chanlaq.

⁹ “Kra laütiishe Tombutiip nai kiijaq lang chang hupsam thun tlotli ka asii ramkham tel maq nei laüta kiinong kuqlaq. Raüla kriika asii she miraq.

¹⁰ Kra jai miishe, berong-wacha nai kra miirii hupsam thun ka asii ramkham tel maq nyat laüta kiinong kuqlaq. Raüla kriika wiita siirairai she miraq.

¹¹ Kiimahali ahechang-nüchhong winpin nai kra tiichapchang ahokphi diim kra akhiisii hali kiinong kuqlaq.

¹² “Laüta Aron nai asetiim ka Tombutiip kilamchong tho na shea wanlaq. Laüta tsangshiq ma pü tiishi jühe ronglaq nguta chonglaq.

¹³ Laüta Aron ma ramwe rohun thun kra tiisam kuqlaq. Laüta akhum na asii tel ma nyat laüta ramkuqlaq. Akha klo laüta apaiq ka kiinong kuqlaq. Kra raüla apaiq raq iramwe jaq sham raüta Ngi mishkumpan milot.

¹⁴ Laütiishe asetiim kra shea wanlaq. Laüta samtong thun ka tsangshiq ma tiisam kuqlaq.

¹⁵ Kra laüta tsangshiq ka awe jamkho asii ramkham tel ma nyat laüta kiinong kuqlaü kiikhiisii, tsangshiq kiimin ramkham tel maq nyat laüta kiinong kuqlaq. Kra riihaüla tsangshiq ka ramwebi ja raüta Ngi shiikumpan jaqsham milot. Ara ramkham tel maq nyattlaü ariiraq tsangshiq ka pattup pat-sa ramwebi ma mitiija wan.”

¹⁶ Kiimaq Tatiwe raq aming kuqtaq kra phan phan Mosheq raq wiita kloto.

¹⁷ Krai mren tsangshiq raq Ejip mung ka baiqthü li maq rawii wiinai she angu na kra rawii wa apha wan jipi lüwa jiha ranaiqshi na Tatiwe asi Tombutiip ka shongto.

¹⁸ Kiimaq Mosheq kra Tombutiip khamchong hokphi diim thun kra tiihongto. Raüta ariikom thun kra tiihongto. Raüta khetuk chang riiqpum kii thun kra tiihongto. Raütiishe khamchong thun kra shongto.

¹⁹ Raüta apaiq raq Tombutiip shap chang kheathum thun kriimaq shapto. Raüta kriithaq na raliipti kriimiishe shap nongto. Arka Tatiwe raq aming kuqtaq kra phan phan kloto.

²⁰ Kra raütiishe apaiq raq longpen wiinai kra lamto. Raüta Tongshong Tek mong niishe thiito. Raüta apaiq raq tek pichang pepum wiinai ka awakom mong na tlea reto. Raüta apang chang ahap kiimaq pangto.

²¹ Raütiishe apaiq raq tek ka Tombutiip mong niishe thüto. Raüta atuk chang kheathum kriishe chanto. Akha klo raüta apaiq raq Tongshong Tek ka Tatiwe raq aming kuqtaq kra phan phan khetuk maq rai thüto.

²² Kiimaq apaiq raq chamrii ka Tombutiip mong na khetuk kilü chantaq kriimaq kinphai na shekhu nü siim na tothüto.

²³ Raütiishe kra chamrii na Tatiwe ma honglu na akuq winsii thun kriishe thüto. Arka Tatiwe raq aming kuqtaq kra phan phan kloto.

²⁴ Raüta apaiq raq Tombutiip mong na lem-khamchong kriishe toto. Kriika shemai nü siim na, chamrii rai khariire na tiihong toto.

²⁵ Kra raütiishe apaiq raq kiijaq Tatiwe makki na lemsetiim thun ka Tatiwe raq aming kuqtaq kra phan phan tiiniito.

²⁶ Kiimaq apaiq raq chaq berong-wacha kriishe Tombutiip mong na thüto. Kriika atuk chang khea chantlaq kra khaki na tothüto.

²⁷ Raütiishe ahomwiq-homseng honglu kra Tatiwe raq aming kuqtaq kra phan phan wa na chaqto.

²⁸ Raüta apaiq raq Tombutiip kilamchong na chan chang kheathum kriishe chanto.

²⁹ Raüta kiijaq kra kilamchong kheathum chantaq khaki na honglu thun chaq chang berong-wacha kriishe tiihong thüto. Raüta kriijaq apaiq raq wiipumtam-chaqtlii honglu kra takuqto kiimaq rai-awong honglu kra kuqto. Arka Tatiwe raq aming kuqtaq kra phan phan kloto.

³⁰ Kiimaq apaiq raq ahechang-nüchhong winpin ka Tombutiip nai berong-wacha liipan na tiihong thüto. Raüta kra kham maq tiima thüto.

³¹ Kiimaq Mosheq, Aron, kiimaq asetiim raq tsangshiq jaq nai hokphi ka kiijaq heto.

³² Kriika ümtiikiiwa tsangshiq ka Tombutiip mong na watlaq riimakla berong-wacha na watlaq akhing na, Tatiwe raq aming kuqtaq kra phan phan tsangshiq jaq nai hokphi ka kiijaq hetlo.

³³ Kiimaq Mosheq raq Tombutiip tro keathung nai berong-wacha tro ka kheathum chan raüta ruk thüto. Raüta kra keathung ruk kilamchong ba ka kheathum chan raüta shaqto. Akha apaiq raq phanrap jaqsham ka kunli tlotto.

Tatiwe Asi Tombutiip Thaq Na Phumda Sitlo

³⁴ Kiijiishe Tombutiip ka phumda raq pang wanto. Kiimaq Tatiwe asi makse chathit chhainyii liliim raq Tombutiip ka mong wanto.

³⁵ Atinkhan chhainyii rai kha na Mosheq ka Tombutiip mong na nyap walot mak riito.

³⁶ Kra phumda ka Tombutiip kiiwa ra na lambaiq wan lili raütiq, Israilnok raq tsangshiq piitiip ka ahin na laü wan lili riitlo.

³⁷ Kra phumda kiijaq siruq wiiwii, tsangshiq raq tsangshiq piitiip ka ahin na tiisot wan mak phan riito.

³⁸ Tsangshiq ka bintang jüngi mung na manglaü wawantlaq akhing tlotli na, tsangshiq raq Tatiwe asi dea nguta phumda ka Tombutiip thaq na ranaiq na chhitlo kiimaq rawa niika walütu kaü ka Tombutiip thaq na nyai raitlaq kra chhitlo.