DUNGWVNC 36 - ASII LAKDAP Bible (BSI)

¹ “Bejalel, Oholiab kiimaq nanok ahinti tsiimwe khiiqwebi, ju miiwa Tatiwe raq jaqsham sma phaqchi kiimaq asap atsin phaqchi kuqtaq, jurwa asii Tombutiip hai wan miitu phanrap hupsam thun rong ratlaq kra klo asapti thun raq, Tatiwe raq aming kuqtaq kra phan phan kunli miklolaq.”

Mungmaiqse Raq Kongphiq Pahea Kuqto

² Kiimaq Mosheq raq Bejalel, Oholiab, kiimaq jaqsham smabi ahinti thun wiita Tatiwe raq asap atsin phaqchi kuqtaqti thun kra, kiimaq juju riiwa jaqsham khrumke lungwiitibi thun kra heato. Raüta Mosheq raq tsangshiq ma jaqsham ka phaho rongliishe nguta chongkuqto.

³ Tsangshiq raq Mosheq jaqwa Israilnok raq asii Tombutiip hai miitu ümchuwa honglu kuq wantaq hupsam thun kra jaüto. Shatmaq Israilnok mungmaiqse riika tsangshiq honglu ka Mosheq ma wranap tek kuq wan ruqli kuqto.

⁴ Kiijiishe jaqsham smabi kra jaqshamtibi thun ka Mosheq phana kito.

⁵ Raüta Mosheq ma tiitaito, “Tatiwe raq jaqsham chang aming kuqtaq kra klo miitu hupsam ümchuwa rong ratlaq kriithaq niimin mungmaiqse riika pahea achan ana she kuq wantlo.”

⁶ Kra ningkhan Mosheq raq mungmaiqse ma piitiip kunli na asii Tombutiip hai miitu jurmin honglu kewan raa mak she nguta aming tatto. Krai mren Mungmaiqse raq honglu ka kuq wan mak she riito.

⁷ Hupsam ümchuwa honglu na ake wan kun she kra dongdii min jaqsham tlot raütiimin achan anashe riito.

Tatiwe Asi Tombutiip Ka Haito

⁸ Kra jaqshamtibi phong na pinthum jaqsham smabi thun raq Tatiwe Asi Tombutiip ka haito. Tsangshiq raq kra tiip ka müsaisai raihi-nairai khea ka raiwai, mintiitii rai, kiimaq unirai raishii ka riishot riishaq raüta ataq kiimaq cherubim sumla phong ka khea kiijaq achhang raüta awaiq khea thum thun roqshi ka adam na triiche raüta haito.

⁹ Kheathum thumshi kriika ajong alu na mren mren siisaq riito. Alu nü na mitar roqshi ri anai, ajong nü na mitar nai nai siisaq riito.

¹⁰ Tsangshiq raq kheathum thumbiingi ka adam na thumshi maq tiijasaq triiche chhangto. Kiikhiisii hali thumbiingi kiimin adam na thumshi ma tiijasaq chhangto.

¹¹ Kiimaq tsangshiq raq awakom setiim ka khea wai phusetiim maq chhangto. Raüta kheathum jong kaü nai ri kinphai nü siim na tiikop chhangto. Tsangshiq raq apha thum kaü kiijaq kra awakom thun ka roqbiingi tiikop chhangto.

¹² Tsangshiq raq apha kheathum diim kaü kiijaq awakom ka roqbiingi tiikop chhangto. Kiimaq thumnai ngojati kiijii min awakom ka roqbiingi hali apha thumti krai adam na triichesaq chang tiihong chhangto.

¹³ Kiimaq tsangshiq raq chaq maq khaiq thun ka roqbiingi kloto. Ara khaiq thun armaq kheathum kaü wiinai ka adam na triichesaq saq bat chang tiihongto.

¹⁴ Kra raütiishe tsangshiq raq Tombutiip pangchang ka, chhechhi bin maq ataq kheathum kaütiim ka roqshi ri thumshi kloto.

¹⁵ Tsangshiq kra kheathum kaütiim ka ajong alu na mren mren siisaq taqto. Alu nü na mitar roqshi ri atsam kiimaq ajong nü na mitarnai nai siisaq kloto.

¹⁶ Raüta tsangshiq raq thum biingi ka adam na asiim nü maq triiche saqsaq thumjong kaü ashi ma tiijatlii chhangto. Kiimaq kriiwa thumtrok kra hali thum jong kaü ashi ma tiijatlii chhangto.

¹⁷ Kra raütiishe tsangshiq raq kra kheathum kaü ashi atiisup wanti siim kriijaq awakom ka roq biingi tiikop chhangto. Kiimaq kheathum kaü nai ngojati siim kra jiimin kiikhiisii hali, awakom ka roq biingi hali tiikap chhangto.

¹⁸ Raüta tsangshiq raq miiki maq khaiq ka roq biingi kloto. Arka ara kheathum kaü wiinai ka adam na triichesaq saq apang chang dum ka diimshi ma tiijatlii chang tiihongto.

¹⁹ Kiimaq tsangshiq raq apang chang ka diimnai ri hali tiihong nongto. Diimshi ka sku pongsetiim khü ka rongshii maq loto. Kiimaq diimshiti kriika nintata ngamkhü maq kloto. Arti ka akhuthaq na pang miitu.

²⁰ Kiimaq tsangshiq raq Tombutiip haichang ariikom ka akasia pe maq rusansan tiichap raq raq kloto.

²¹ Kra ariikom ashi ka adü lu nü na mitar blai kiimaq ajong nü na sentimitar roqtrok ri trok.

²² Raüta ariikom wiinai niika arong ka rusansan tipi ikha wanghap ri na anai nai chhaq tiihongto. Raüta ariikom wiinai ka adam na triiche saqsaq riichang tiihongto. Ariikom thun wiita ka ara arong ka rusansan tipi ikha siisaq tiihongto.

²³ Tsangshiq raq shemai siim miitu ariikom thun ka roqnai kloto.

²⁴ Kiimaq kra ariikom thun ka tiichap hi hi riichang ahokphi diimliim ka kampho maq roqblai kloto. Ariikom ashi miitu arong wiinai kra tiichap chang hokphi ka diim nai nai riito.

²⁵ Kiimaq tsangshiq raq Tombutiip shekhu nü siim na shongchang ariikom thun ka roqnai hali kloto.

²⁶ Kiimaq kampho maq ahokphi diim ka roqblai kloto. Ariikom ashi miitu ahokphi diim ka anai nai kloto.

²⁷ Kiimaq Tombutiip tiipjai nü siim na shenyap nü siim na shongchang ka, tsangshiq ariikom ka trok kloto.

²⁸ Kiimaq ashok wiinai na shongchang ariikom anai kloto.

²⁹ Riita ara tiipshok na shongchang ariikom wiinai ka ajichong maq adam na ra na saülili triichhop saq saq chang kloto. Kra ashok wiinai ri na shong chang ariikom wiinai ka akhiisii kloto.

³⁰ Krai mren ariikom thun tlotli ka tiichat riito. Kiimaq ahokphi kampho maq aklo diim ka roqshi ri trok riito. Ariikom ashi hokphi na anai nai chhaq riito.

³¹ Kiimaq tsangshiq raq akasia pe maq atuk chang pumpat thun ka roqshiri biingi kloto. Tombutiip siimko na tiihong miitu pumpat kii ka pumbiingi tiihongto.

³² Kiimaq siimko nü na shongchang ariikom thun miitu ka pumpat kii ka pumbiingi hali tiihongto. Kiimaq shemai siim na shongchang ariikom thun kra miitu pumpat kii ka biingi kloto.

³³ Khetuk wiijam riingea tiithiba wa pumpat kii ka ariikom thun among jam ba maq riita konü siim maq riita konü siim na nyilili riichang.

³⁴ Tsangshiq raq ariikom thun ka chaq maq job loto. Raüta ariikom thun kiijaq chaq maq alo awakom thun ka tiihongto. Arka pumpat pum kra akom mong na tlat hihi re raüta khetuk miitu kloto. Ara pumpat pum thun armin chaq maq job hihi na loto.

³⁵ Kiimaq tsangshiq raq achan chang khea thum ka müsaisai raihi-nairai maq, raiwai, mintiitii, kiimaq uniraishii maq trai trai raüta taqto. Raüta kiijaq awaiq angon rai maq cherubim sumla thun kra chhangto.

³⁶ Raüta tsangshiq raq ara kheathum ara chanchang kham ka blai akasia pe maq haito. Raüta ara kham blai ka chaq maq loto. Raüta kham blai kiijaq chaq maq atiiq khaiq thun kra tiikop hihiq tiihongto. Kiimaq tsangshiq raq ara kham thun ara tiinga hihi shongchang ajichong diim ka kampho maq blai kloto.

³⁷ Kiimaq Tombutiip mong na nyap wa chang kilü na chan chang khea thum ka tsangshiq raq müsaisai raihi-nairai maq, raiwai, mintiitii, kiimaq uniraishii maq traihihi raüta taqto. Raüta sumla awaiq angon rai maq kiijaq chhang raüta tiimii khiiqto.

³⁸ Tsangshiq raq ara kheathum ara chanchang ka kham biingi kloto. Raüta kham thun arjaq tiikophihi khaiq thun kloto. Kiimaq kham khupo thun ka chaq maq joptlii loto. Kiimaq kiijaq tiihong chang pumpat kiisetiim kriimin chaq maq loto. Kiimaq kham thun tiichap chang ahokphi diim thun biingi ka miiki maq kloto.