DUNGWVNC 30 - ASII LAKDAP Bible (BSI)

Homseng Honglu Chaq Chang Berong-wacha

¹ Tatiwe raq Mosheq ma nguto, “Akasia pe maq homseng honglu kechang berong-wacha ashi hailaq.

² Kriika tsingblai riichang. Alu nü na 45 sentimitar. Kiimaq ajong nü niimin 45 sentimitar riichang. Kiimaq adii lu nü niika 90 sentimitar riichang. Kiimaq akhupo na arong blai ka ashok blai na tiihong chang. Kriika pe ka bushi kriiwa haidamtlii haichang.

³ Akhupo, asiim siimblai wiita, kiimaq arongblai wiita ka chiisan chaq maq kopbaiqlaq. Laüta akii tro kiimin chaq maq kong baiqlaq.

⁴ Kiimaq ara pichang chaq maq awa kom nai tiiqlaq. Laüta kra komnai ka siimhap ri na akii kriimaq diikiq lin lin na apichang pum wiinai kra awa mong na rehihi riichang tiikoplaq.

⁵ Kiimaq ara api chang pepum wiinai kriimin akasia pe maq hailaq. Laüta kra pum nai wiita chaq maq lobaiqlaq.

⁶ Laüta ara berong-wacha arka Tongshong Tek tukchang kheathum chantlaq kriima kinphai nü na thülaq. Arba arjaq Ngi ka ümniirai mirhumha.

⁷ Wranaptek Aron ka lem tsrup riiqwa watlaq akhingtek na, apaiq raq ara berong-wacha arjaq ahomwiq-homseng honglu ka chaqho lili riichang.

⁸ Kiimaq apaiq raq raji ko na lem tiinyaitlaq akhing niimin akhiisii homseng honglu kra chaqho lili riichang. Ara homseng honglu ke arka pattup pat-sa atsaq kai maiq mak kuq wan ruqli riichang.

⁹ Ara berong-wacha arjiika laihin kuqmai chang phan homseng honglu ka keho maimak. Kiimaq jamlai phan nyamse honglu jiimin, lo kiimaq jamlai phan wong-honglu jiimin arjaq keho maimak. Kiimaq jamlai phan spiqtai honglu li jiimin arjaq nyuk ka maimak.

¹⁰ Wiishi na jangshi Aron raq berong-wacha ara tiisii wan miitu ngarai miitu honglu na ataakuq ngam tiijai ka arongblai kiijaq nyatlili riichang. Arka rawiitek pattup pat-sa miitu klo wanruq riichang. Ara berong-wacha arka pinthum asii, Ngi, Tatiwe ma akiinong kuq.”

Tatiwe Asi Tombutiip Phunta

¹¹ Tatiwe raq Mosheq ma nguto,

¹² “Ümtiikiiwa ümniiraq Israilnok mung maiqse ka weatlaü akhing na, maiqwere khumtek raq apaiq rilung tri ka Ngi ma ke ratlo. Kra raüla maiqwea akhing bala apaiq khuthaq na tsaimiq khusiq saümak miraq.

¹³ Maiqwea na tlomdamtlaqti maiq loweatek raq mung raq langtlaq tok maq shin raüta apaiq tri kampho ka ke ratlo. Maiq loweatek raq ara apaiq tri ka Ngi ma honglu na ke ratlo.

¹⁴ Maiqwere loweatek ara maiqwea na tlomdamtlaqti, maiq loweatek arawii wiiroq nai sheti nai kriima maiqlati thun raq, Ngi ma ara kampho ka ke ratlo.

¹⁵ Ümtiikiiwa ara tsangshiq raq tsangshiq rilung tri kampho ka kuqtlaq, kiitiikaq chiithewe raq apalin ke min maimak, kiimaq miitsanwe raq arma atsaplin ke min maimak.

¹⁶ Ara tri kampho ka Israilnok jaq wa riichom jaülaq. Laüta ara kampho ka Ngi asi Tombutiip kra shiililii ma langlaq. Ara phunta arka tsangshiq rilung tri ma miraq. Kiimaq Ngi raq tsangshiq ka itsan na thüshat maq mitiikhup wong kuqha.”

Jaqhe Chang Nüchhong Miiki Pin

¹⁷ Tatiwe raq Mosheq ma nguto,

¹⁸ “Miiki nüchhong jaqhe chang pin ka ajichong min miiki maq hailaq. Laüta kra Tombutiip nai berong-wacha heawea na tolaq. Laüta kra mong na kham thiilaq.

¹⁹ Aron nai asetiim raq kiiwa kham kra lam raüta tsangshiq jaq nai hok ka hechang.

²⁰ Arka tsangshiq ka Tombutiip mong na nyap wa ma hechang. Riimakla berong-wacha na phaqsea honglu kewa ma hechang. Kra raütiq tsangshiq ka tsat baiq mak miraq.

²¹ Tsangshiq raq tsangshiq jaq nai hok ka heraa dongdii. Kra raütiq tsangshiq ka tsaimak miraq. Ara tri arka tsangshiq nai tsangsaütiim raq pattup pat-sa lang wan chang.”

Ramtiibok Chang Tel

²² Tatiwe raq Mosheq ma nguto,

²³ “Ahea pinthum süse tapan homseng kham ka kilogram trok, kiimaq ahomwiq phan tsangkürang tsai ka kilogram atsam lam laq, kiimaq ahomwiq phan homkii tsai ka kilogram atsam lamlaq,

²⁴ kiimaq ahomwiq phan kassia ngutlaq ka kilogram trok lamlaq (arthun tlotli ka mung tok maq riikhaqli shinchang). Kriithaq na kilogram blai olip tai kra tiitsuqlaq,

²⁵ kiimaq kra laüta asii ramram chang tel kra klolaq, laüta homseng ikha triishot laq.

²⁶ Laüta armaq Ngi asi Tombutiip nai Tongshong Tek kra tiiboklaq,

²⁷ kiimaq chamrii nai kra miirii laihin hupsam thun kra, lem-kham kra kiimaq kra miirii laihin hupsam thun kra, homseng honglu chaq chang berong-wacha kra,

²⁸ honglu thun chaq chang berong-wacha kra, kriirai apaiq miirii hupsam thun kra nong nong, kiimaq jaqhechang nüchhong-pin nai ajichong kham kra tiiboklaq.

²⁹ Arthun hupsam ka akha kiinong kuqlaq. Raüla arthun ka pinthum siirairai she miraq, kiimaq maiq ashi ra raq riimakla phanshi ra hupsam raq arthun ara than raüla, kriiti nai kriithun hupsam ka arthun arjaq asi ningkun sitlaq kriiraq kra tiithantaq thun ka wiita mitiithenbaiq.

³⁰ Kra laütiishe Aron nai asetiim khum na ramkham kiimaq tiibok nyat laq. Laüta tsangshiq ka Ngi shiikumpan ma ramwebi ma shonglaq.

³¹ Kiimaq Israilnok ma akha chonglaq, ‘Ara asii ram kham tel arka Ngi shiikumpan jaqsham miitu pattup pat-sa lang chang.

³² Arka miinan joli maiqse khum na nyuk maimak. Kiimaq ümniiraq ara jamkho klo laü kra lang laüta, laihin na lang wan miitu tel ka phoq maimak. Arka asii, kiimaq ümniiraq arka asii hupsam nguta pinthum shreng ratlo.

³³ Kiimaq jurwa akha tel ka phoq tlaq, riimakla arwa maiq ahinti juwa ramwe riimakti khum na nyat kuq raüla, kriiti ka isengi nguta weamak she miraq.’”

Homseng

³⁴ Tatiwe raq Mosheq ma nguto, “Ara ahomwiq tapan thun arwa riingea riingea chhaq maq thap laüta lamlaq: stekte homseng wa, onicha homseng wa, galbanum homseng wa, kiimaq chiisan pechong mong wa alam homsengtsai wa.

³⁵ Laüta arthun armaq homseng honglu kra klolaq. Arthun arka homseng ikha adam na riishot laüta phoqlaq. Laüta chiisan kiimaq asii maq thü miitu shum ri shot damlaq.

³⁶ Arwa phanshi lam laüta awin müsaisai ma tiija buklaq. Laüta arka Ngi asi Tombutiip mong na lam wanlaq. Laüta Tongshong Tek khaki kiijaq wanlaq. Ara homseng arka chiisan asii pinthum nguta langlaq.

³⁷ Ara niqri ri triishot laüta maiqmii raq lang miitu ahin homseng klo maimak. Arka asii phan hupsam Ngi ma akiinongkuq ngam rea ma akuq nguta tiimalaq.

³⁸ Maiq ashi ra raq maiqmii raq lang miitu ara niq riri homseng klo raüla, apaiq ka isengi nguta weamak she miraq.”