YaJakobe 5 - Siswati 1996 Bible

Secwayiso kulabacebile

¹ Nine-ke tinjinga, lalelani emavi ami. Khalani, nilile ngenca yetinhlupheko letitawunehlela.

² Lengcebo yenu seyiyabola, netingubo tenu setidliwa ngumvunya.

³ Igolide nesiliva yenu sekuyatfomba, nalokutfomba kwako kutawunilahla ngelicala kudle imitimba yenu njengemlilo. Nisacongelela ingcebo nakulamalanga ekugcina.

⁴ Ase nibuke la, emaholo etisebenti letavuna emasimi enu leniwagodlile ayanimangalela anilahle ngelicala; nekukhala kwebavuni sekungenile etindlebeni teNkhosi Sebawothi.

⁵ La emhlabeni niphile ngekutamasa nangekutijabulisa, nakhuluphalisa tinhlitiyo tenu ngelilanga lekuhlatjwa.

⁶ Nimlahlile nambulala umuntfu lolungile; kantsi akamelani nani.

Kubeketela

⁷ Ngako-ke, bazalwane, beketelani kuze kufike iNkhosi. Ase nibuke umlimi lolindzela sitselo semhlaba lesiligugu; usibeketelela size sitfole imvula yekucala neyekugcina.

⁸ Nani-ke beketelani. Cinisani tinhlitiyo tenu, ngobe kubuya kweNkhosi sekusondzele.

⁹ Bazalwane, ningasolani, khona ningetikwehlulelwa; nangu uMgwebi aseme emnyango.

¹⁰ Bazalwane, tsatsani sibonelo sekuhlupheka nekubeketela kwebaphrofethi labebakhuluma egameni leNkhosi.

¹¹ Khumbulani phela kutsi ngulabo labaciniselako lesitsi babusisiwe. Nake neva ngekukhutsatela kwaJobe, niyati-ke nekutsi iNkhosi yaletsa siphetfo sini kuye; ngobe iNkhosi inebubele nesihawu lesikhulu.

Kufunga

¹² Kepha, bazalwane bami, etikwako konkhe ningafungi, nome ngelizulu, nome ngemhlaba, nome ngangusiphi sifungo; kodvwa nanivuma nibotsi: “Yebo” nome-ke nitsi: “Cha” nangabe niyala, kuze ningangeni ekwehlulelweni.

Kukhuleka

¹³ Ukhona yini lohluphekako emkhatsini wenu? Akathandaze. Ukhona yini lojabulile? Akadvumise ngekuhlabela.

¹⁴ Ukhona yini logulako emkhatsini wenu? Akabite babonisi belibandla, bamthandazele ngekumgcobisa ngemafutsa egameni leNkhosi.

¹⁵ Umthandazo wekukholwa uyawumphilisa logulako, iNkhosi imvuse, nome entile tono uyawutsetselelwa tona.

¹⁶ Ngako-ke vumani tono tenu lomunye kulomunye, nithandazelane, kuze nitewuphiliswa. Kuncusa kwemuntfu lolungile kunemandla kakhulu.

¹⁷ Elija labengumuntfu afana natsi, wakhuleka ngekuncusa kutsi lingani, langete lana emhlabeni iminyaka lemitsatfu netinyanga letisitfupha.

¹⁸ Waphindze wathandaza, lase liyana futsi litulu, nemhlaba waphindze watsela titselo tawo.

Labedukako

¹⁹ Bazalwane bami, nangabe lomunye emkhatsini wenu eduka ecinisweni, bese lomunye uyambuyisa,

²⁰ yatini kutsi lowo lobuyise soni ekwedukeni kwaso, uyawusindzisa umphefumulo waso ekufeni, asibekele tono letinyenti.