YaJakobe 2 - Siswati 1996 Bible

Becwayiswa ngekutsi bangakhetsi muntfu

¹ Bazalwane bami, nine lenikholwa yiNkhosi yetfu yenkhatimulo, Jesu Khristu, ningabobakhetsa bantfu.

² Nangabe emhlanganweni wenu kungena umuntfu lofake indandatho yegolide, agcoke kahle, kuphindze kungene nalomunye lophuyile, agcoke kabi,

³ bese-ke nine ninaka lona logcoke tingubo leticwebetelako ngekutsi: “Hlala lapha, kunasi situlo,” kulona lophuyile nitsi: “Mani lapho,” nome: “Hlala lapha, entinyaweni tami,”

⁴ ngekwenta njalo anikhetsi yini ngekutsi nibe behluleli ngemicabango lemibi?

⁵ Ase nilalele, bazalwane bami labatsandzekako! Nkulunkulu akabakhetsanga yini labaphuyile lapha emhlabeni kutsi babe ngulabacebile ekukholweni, netindlalifa embusweni lawetsembisa labo labamtsandzako?

⁶ Kepha nine nimdvumatile lona lophuyile. Akusibo labacebile yini labanicindzetelako? Akusibo yini labo labanimangalela etinkantolo?

⁷ Akusibo yini labo labahlambalata lelibito laKhristu lelihloniphekile lenibitwa ngalo?

⁸ Kepha nanigcina umtsetfo webukhosi ngekwemBhalo lotsi: “Tsandza makhelwane wakho njengobe utitsandza wena,” nenta kahle.

⁹ Kodvwa nanikhetsa bantfu, nenta sono, nemtsetfo uyanilahla ngekutsi nitephulamtsetfo.

¹⁰ Ngobe lowo logcina yonkhe imitsetfo, kodvwa ephule munye, unelicala layo yonkhe.

¹¹ Ngobe lona lowatsi: “Ungaphingi,” waphindze watsi: “Ungabulali.” Nangabe ungaphingi kodvwa ubulale, usephulamtsetfo.

¹² Ngako khulumani, nente njengalabo labayakwehlulelwa ngemtsetfo wenkhululeko.

¹³ Ngobe kwehlulela akunabo bubele kulowo longenabo bubele; kodvwa bubele buyawucoloshela kwehlulela.

Kukholwa netento

¹⁴ Bazalwane bami, kusitani kutsi umuntfu atsi uyakholwa kodvwa abe angenayo imisebenti? Kungamsindzisa yini lokukholwa kwakhe?

¹⁵ Nangabe umzalwane nome umzalwanekati bahlubulile beswele nekudla kwemalanga onkhe,

¹⁶ bese-ke lomunye emkhatsini wenu utsi kubo: “Hambani ngekuthula, nifutfumale, nesutse,” ngaphandle kwekubapha loko labakudzingako emtimbeni, kusitani loko?

¹⁷ Ngako-ke nangabe kukholwa, kona ngekwako, kungenayo imisebenti, kufile.

¹⁸ Kepha lomunye angatsi: “Wena unekukholwa, mine nginemisebenti. Ngikhombise kukholwa kwakho ngaphandle kwemisebenti, nami ngitakukhombisa kukholwa kwami ngemisebenti yami.”

¹⁹ Uyakholwa kutsi Nkulunkulu munye? Wenta kahle; nemadimoni ayakukholwa loko, atfutfumele.

²⁰ Wena silima-ndzini, uyafuna yini kukhonjiswa kutsi kukholwa lokungenamisebenti kulite?

²¹ Khokho wetfu Abrahama ngesikhatsi anikela nga-Isaka, umsa wakhe, elatini, akazange yini emukelwe nguNkulunkulu ngekutsi ulungile ngemisebenti?

²² Uyabona-ke kutsi kukholwa kwasebenta kanye nemisebenti yakhe, nekutsi kukholwa kwakhe kwapheleliswa ngimisebenti yakhe.

²³ Ngako kwagcwaliseka umBhalo lotsi: “Abrahama wakholwa Nkulunkulu; ngenca yekukholwa kwakhe Nkulunkulu wamemukela njengemuntfu lolungile,” wase ubitwa ngekutsi: “Ungumngani waNkulunkulu.”

²⁴ Niyabona-ke kutsi umuntfu wemukeleka kuNkulunkulu ngekutsi ulungile ngisho nangemisebenti, hhayi ngekukholwa kuphela.

²⁵ Kanjalo-ke naRahabi, ingwadla, akazange yini emukelwe nguNkulunkulu kutsi ulungile ngemisebenti yekwemukela titfunywa wabuye watikhipha ngalenye indlela?

²⁶ Njengobe umtimba ufile nawute umoya, ngalokufananako nekukholwa nakute imisebenti kufile.