Tihlabelelo 97 - Siswati 1996 Bible

Kubusa nemandla aSimakadze

¹ Simakadze uyabusa, umhlaba awujabule netichingi tonkhe tijabule.

² Emafu lamnyama amtungeletile, kulunga nebucotfo sisekelo lamise kuso sihlalo sakhe sebukhosi.

³ Embikwakhe kuvutsa umlilo udle titsa ngala nangala.

⁴ Imibane yakhe ikhanyisa umhlaba, umhlaba ungayibona lemibono, uyatfutfumela.

⁵ Tintsaba tincibilika njengemtfwebeba embikwaSimakadze, yebo, tiyancibilika tiphele embikweNkhosi yemhlaba wonkhe.

⁶ Emazulu amemetela kulunga kwakhe, tonkhe tive tibubone bukhosi bakhe.

⁷ Bayahlazeka badliwe ngemahloni bonkhe labakhonta tithico, bachoshe ngetithico letingenamsebenti. Bonkhe bonkulunkulu bakhotsama kuSimakadze.

⁸ BaseSiyoni bayeva bajabule, yebo, netakhamiti takaJuda tiyatsakasa ngenca yetehlulelo takho, Simakadze.

⁹ Ngobe wena, Simakadze, unguLosetikwako Konkhe, ubusa umhlaba wonkhe, uphakeme ngetulu kwabonkulunkulu.

¹⁰ Nine lenitsandza Simakadze, tondzani konkhe lokubi, ngobe uyabelusa labametsembako, abephule etandleni talababi.

¹¹ Kukhanya kuhlanyelelwa labalungile, nekujabula kuhlanyelelwa labanetinhlitiyo letinhle.

¹² Tfokotani nijabule nine lenilungile, bongani libito lakhe lelingcwele.