Tihlabelelo 92 - Siswati 1996 Bible

Sekudvumisa tento taSimakadze

Sihlabelelo lesiliculo lekufanele sihlatjelwe ngelilanga leSabatha.

¹ Kuhle kubonga wena, Simakadze, nekuhlabelela egameni lakho, wena Losetikwako Konkhe,

² nekuvakalisa umusa wakho ekuseni, nekwetsembeka kwakho ebusuku,

³ nakushaywa ihabhu lenetintsambo letilishumi, nelugitali, netintsambo telire.

⁴ Ngobe nguwe, Simakadze, longente ngatfokota ngaloko lokwentile, imisebenti yetandla takho ingente ngahlabelela ngekujabula.

⁵ Maye, mikhulu imisebenti yakho, Simakadze! Imicabango yakho ijule kakhulu.

⁶ Sihhundzahhundza singeke sikwati loko, umuntfu losilima angeke acondze

⁷ kutsi nome lababi bangahluma njengetjani, nato tonkhe tigilamkhuba tichuma, noko tiyawubhujiswa phakadze naphakadze.

⁸ Kodvwa wena, Simakadze, uphakeme phakadze naphakadze.

⁹ Ngobe nato titsa takho, tiyawubhubha; bonkhe lababi bayawusakatwa.

¹⁰ Kodvwa luphondvo lwami uluphakamisile njengeluphondvo lwenkhabi lengumlalandle, ungigcobe ngemafutsa lamasha.

¹¹ Titsa tami ngitibuke emehlweni, netindlebe tami titivile tinsongo talabo lababi labemelene nami.

¹² Lolungile uhluma njengelisundvu, akhule njengemsedari waseLebanoni.

¹³ Labo-ke banjengetihlahla letihlanyelwe endlini yaSimakadze, bachuma etibuyeni taNkulunkulu wetfu.

¹⁴ Ebudzaleni babo bayawuchubeka batsele titselo, bafanane netihlahla letihlala tiluhlata, ngobe tona tihlala ticinile,

¹⁵ kuze kubonakale kutsi Somandla ulungile, yena ulidvwala lami, yena unguSokulunga.