Tihlabelelo 9 - Siswati 1996 Bible

Akabongwe Nkulunkulu Sokulunga

Sihlabelelo saDavide lesetfulwe kumhlabelisi kutsi sihlatjelwe ngendlela letsi: “Kufa kwendvodzana.”

¹ Simakadze, ngiyawukubonga ngenhlitiyo yami yonkhe, ngilandze ngayo yonkhe imisebenti yakho lemangalisako.

² Ngiyawujabula ngitfokote kuwe ngidvumise libito lakho, wena Losetikwako Konkhe.

³ Nakuchamuka wena, titsa tami tiyancandzeka; nawutibuka, tiyawa, tiphele.

⁴ Ngobe wena ulimele lilungelo lami nendzaba yami; uhleti esihlalweni sakho sekwehlulela wakhipha sigwebo lesilungile.

⁵ Emahedeni uwatsetsisile, lababi wababhubhisa, wesula libito labo phakadze naphakadze.

⁶ Sitsa sibhujiswe phakadze naphakadze, emadolobha aso uwabhidlitile, angeke asaphushwa nakuphushwa.

⁷ Kodvwa Simakadze uhleti esihlalweni sakhe sebukhosi baphakadze; lesihlalo sakhe sebukhosi usimisele kwehlulela.

⁸ Yena uyawukwehlulela umhlaba ngekulunga, nguye futsi loyakwehlulela tive, yebo, uyawutehlulela ngebucotfo, angakhetsi.

⁹ Simakadze usiphephelo sebantfu labacindzetelwe. Uyinqaba ngetikhatsi tekweswela.

¹⁰ Labati libito lakho bayawukwetsembela kuwe, ngobe wena, Simakadze, awubafulatseli labakufunako.

¹¹ Dvumisani Simakadze lohlala eSiyoni! Tjelani tive ngetento takhe!

¹² Yena ungumenaneli kulabacitsa ingati, uyabakhumbula labahluphekile, akakukhohlwa kukhala kwalabasenhluphekweni.

¹³ Ngihawukele, Simakadze! Bona kuhlupheka kwami lengikubangelwe titsa tami. Nguwe longephula emasangweni ekufa,

¹⁴ kuze ngilandze ngalo lonkhe ludvumo lwakho emasangweni elidolobha laseSiyoni ngijabulele kungikhulula kwakho.

¹⁵ Emahedeni asahholokoshele emgodzini labewumbile; asabanjwe elugibeni lolwetsiywe ngawo.

¹⁶ Simakadze sewutibonakalisile, wakhipha sigwebo sakhe, lababi babanjwa ngumsebenti wetandla tabo. Cabanga.

¹⁷ Lababi baya ekufeni, yebo, bonkhe labafulatsela Nkulunkulu.

¹⁸ Kodvwa labandzindzako bangeke bakhohlakale phakadze naphakadze; litsemba lalabahluphekako lingeke linyamalale siphelane.

¹⁹ Vuka, Simakadze! Ungavumi kutsi umuntfu akwedzelele, betive abehlulelwe embikwakho!

²⁰ Bente bakwesabe, Simakadze, kuze bati kutsi babantfu nje. Cabanga.