Tihlabelelo 89 - Siswati 1996 Bible

Sivumelwane saNkulunkulu kuDavide. Kute lonjengaNkulunkulu

Imaskili ya-Ethani, um-Ezra.

¹ Yebo, Simakadze! Ngiyawuhlabela kuze kube phakadze ngemisebenti yemusa wakho. Kwetsembeka kwakho ngiyawukumemetela ngemlomo wami etitukulwaneni nasetitukulwaneni.

² Ngobe ngitsite: Umusa wakho utawuma kuze kube phakadze, nekwetsembeka kwakho utakumisa ezulwini.

³ Wena ukhulume watsi: “Sengente sivumelwane nalokhetsiwe wami, ngafunga kuDavide inceku yami ngatsi:

⁴ ‘Ngiyawumisa intalo yakho phakadze naphakadze, ngikwakhele sihlalo sakho sebukhosi etitukulwaneni ngetitukulwane.’ ” Cabanga.

⁵ Yebo, Simakadze! Shangatsi emazulu angadvumisa timanga takho nekwetsembeka kwakho enhlanganweni yalabangcwele!

⁶ Ngubani nje losesibhakabhakeni longalinganiswa nawe, Simakadze? Ngubani nje, emkhatsini wemadvodzana aNkulunkulu, longafananiswa naSimakadze?

⁷ UnguNkulunkulu lowesatjwa emikhandlwini yalabangcwele. Umkhulu, futsi wesabeka ngetulu kwabo bonkhe labakuhacile.

⁸ Yebo, Simakadze! Nkulunkulu wemabandla! Ngubani nje lofanana nawe, wena lonemandla, Simakadze? Kwetsembeka kwakho kuyakuhaca.

⁹ Nguwe lobusa kutichenya kwelwandle nakaphakama emagagasi alo, wena uyawabindzisa.

¹⁰ Nguwe lowapitjita Rahabi, wambulala. Titsa takho watisakata ngesandla sakho lesinemandla.

¹¹ Emazulu ngewakho, nemhlaba wakho, umhlaba nako konkhe lokukuwo kwadalwa nguwe.

¹² Inyakatfo neningizimu kwadalwa nguwe. Intsaba iThabhori nentsaba iHemoni kudvumisa libito lakho ngenjabulo.

¹³ Unengalo lenemandla, nesandla sakho sinemandla, nesandla sakho sekudla siphakeme.

¹⁴ Kulunga nebucotfo tisekelo tesihlalo sakho sebukhosi, umusa nekwetsembeka kungemavulandlela lahamba embikwakho.

¹⁵ Yebo, Simakadze! Sibusisiwe sive lesati kahle kutsi kuyini kumpompoloza ngenjabulo, sihambe ekukhanyeni kwebuso bakho.

¹⁶ Lesive sijabula njalo nje egameni lakho, siphakanyiswe ngenca yekulunga kwakho.

¹⁷ Ngobe wena uludvumo lwemandla aso, ngekusikhetsa kwakho luphondvo lwemandla etfu luyaphakanyiswa.

¹⁸ Sihlangu setfu sakho, Simakadze, siyinkhosi yetfu lesayinikwa nguLongcwele waka-Israyeli.

Setsembiso saNkulunkulu kuDavide

¹⁹ Endvulo wase wakhuluma embonweni, kuye lowetsembekile wakho, watsi: “Ngimsitile, ngambeka lolichawe, ngamphakamisa lotsandzekako wami.

²⁰ Ngimtfolile Davide, inceku yami, sengimgcobe ngemafutsa ami langcwele.

²¹ Sandla sami siyawuma naye njalo simcinise, ngempela ingalo yami iyawumcinisa.

²² Sitsa singeke simphocelele kutsi etfule kuso, nalomubi angeke amhluphe.

²³ Ngiyawupitjita titsa takhe embikwakhe, ngibacitse labo labamtondzako.

²⁴ Kwetsembeka kwami nemusa wami kuyawuhlala naye; ngelibito lami kuyawuphakanyiswa luphondvo lwakhe.

²⁵ Ngiyawumenta abuse etikwelwandle nasetikwemifula kanyekanye.

²⁶ Uyawukhala kimi atsi: ‘Wena unguBabe, unguNkulunkulu wami, nelidvwala lensindziso yami.’

²⁷ Ngiyawumenta abe litubulo, abe yinkhosi lephakeme kunemakhosi emhlaba.

²⁸ Ngiyawumgcinela umusa wami kuze kube phakadze. Sivumelwane sami naye siyawuhlala simile.

²⁹ Ngiyawumisa intalo yakhe, kuze kube phakadze, nesihlalo sakhe sebukhosi sisime, yingci nakusekhona sibhakabhaka etulu.

³⁰ “Nangabe bantfwabakhe bawulahla umtsetfo wami, bangahambi ngendlela yetincumo tami,

³¹ bedzelela timiso tami, bangayigcini imiyalo yami,

³² ngiyawube sengibafaka luswati, ngibajezise ngenca yekona kwabo, ngibanike imivimba ngenca yebubi babo.

³³ Kodvwa ngingeke ngiwususe umusa wami kuye, ngingeke futsi ngikuphikise kwetsembeka kwami.

³⁴ Sivumelwane sami ngingeke ngisephule; nemavi lese ngiwakhulumile ngingeke ngiwagucule.

³⁵ “Ngifunge kwaba kanye ebungcweleni bami, ngingeke ngiwacale emanga kuDavide.

³⁶ Intalo yakhe iyawuma kuze kube phakadze, nesihlalo sakhe sebukhosi asiyiwugucuka, siyawuma njengelilanga lelisembikwami.

³⁷ Uyawumiswa siphelane, njengenyanga, ngobe yona ingufakazi lowetsembekile losemafini.” Cabanga.

Sililo sekwehlulwa kwenkhosi

³⁸ Kodvwa manje sewumlahlile wamala, wamtfukutselela logcotjiwe wakho.

³⁹ Sewusicitsile sivumelwane senceku yakho, umchele wayo uwutsele ngelihlazo, wawudzicela phansi.

⁴⁰ Utidzilitele phansi tonkhe tindvonga, tinqaba tasala titindvundvuma.

⁴¹ Bonkhe labendlula ngendlela bayatikhwanyela kuyo. Seyigucuke yaba yinhlekisa kubomakhelwane bayo.

⁴² Uyente yancotjwa ngulabamelene nayo, wajabulisa tonkhe titsa tayo.

⁴³ Nenkemba yayo ayikadli enyameni, wayenta yehluleka ngisho nekubhekana nemphi.

⁴⁴ Uyemuke indvuku yebukhosi esandleni sayo, wasidzaceka phansi sihlalo sayo sebukhosi.

⁴⁵ Uwafinyetile emalanga ebusha bayo, wayembesa ngemahloni. Cabanga.

Umkhuleko wekukhululwa

⁴⁶ Kuyawuze kube ngunini, Simakadze, utifihla siphelane ngingakuboni? Kuyawuze kube ngunini lulaka lwakho luvutsa njengemalangabi emlilo?

⁴⁷ Khumbula-ke kutsi sikhatsi sami singakanani emhlabeni. Bonkhe bantfu lowabadala bendlula njengemoya kulomhlaba.

⁴⁸ Ngubani nje umuntfu loyawuphila angafi? Ngubani nje longatigodla yena angayi ethuneni? Cabanga.

⁴⁹ Awu, Nkhosi yami! Uphi kantsi umusa wakho lomkhulu lowawubonakalisa endvulo, wenta sifungo ngawo kuDavide ngekwetsembeka kwakho?

⁵⁰ Awu, Nkhosi yami! Khumbula kuphukutwa kwenceku yakho, nekutsi tive tingibhaceka ngetinhlamba.

⁵¹ Awu, Simakadze! Titsa takho tiyayihhalatisa lenkhosi loyigcobile, tiyayilandzela tiyibambe, tiyibhaceke ngetinhlamba.

⁵² Simakadze akabongwe nini nanini! Amen! Yebo, Amen!