Tihlabelelo 88 - Siswati 1996 Bible

Umthandazo wekucela kwephulwa ekufeni

Sihlabelelo sentalelwane yaKhora, lesetfulwe kumhlabelisi kutsi sihlatjelwe ngendlela letsi: “Sifo lesiluhlupho.” Imaskili yaHemani um-Ezra.

¹ Simakadze, Nkulunkulu wensindziso yami. Ngikhala kuwe imini nebusuku.

² Shangatsi umkhuleko wami ungefikela kuwe, beka indlebe yakho, uve kukhala kwami.

³ Ngobe umphefumulo wami ugcwele tinsizi, nekuphila kwami sekusondzele ethuneni.

⁴ Ngibalwa kanye nalabacondze emgodzini, nginjengendvodza lete emandla.

⁵ Sengibalelwa kulabafile njengalababulewe, lese balala emathuneni, bona labo longasabakhumbuli, yebo, lese bancunywa kuwe.

⁶ Ungifake emgodzini lojule kunayo yonkhe, etindzaweni letimnyama nasetingungwini.

⁷ Lulaka lwakho luyangisindza. Emagagasi akho ayangicindzetela. Cabanga.

⁸ Bangani bami ubakhweshisile kimi, wangenta ngaba sinengiso kubo. Ngivalelekile, angikhoni kuphuma.

⁹ Liso lami liyafa ngenca yelusizi, ngikhala kuwe, Simakadze, imini nebusuku ngiphakamisa tandla tami, ngikhuleka kuwe.

¹⁰ Labafile uyabentela yini timanga? Bayavuka yini emathuneni bakudvumise? Cabanga.

¹¹ Umusa wakho kungakhulunywa yini ngawo ethuneni? Kwetsembeka kwakho kungakhulunywa yini ngako ekubhujisweni?

¹² Timangaliso takho tingatiwa yini ebumnyameni? Kulunga kwakho kuyatiwa yini eveni lalabo labangasakhumbuli?

¹³ Kodvwa mine, Simakadze, ngikhala kuwe, ngicela lusito, kutsi kusa ube uhlangabetana nemkhuleko wami.

¹⁴ Awu, Simakadze! Ungilahlelani? Ungifihlelelani buso bakho?

¹⁵ Ngihlupheke kakhulu ngabasengotini yekufa, kwasebusheni bami; ngashaywa luvalo, ngasangana.

¹⁶ Lulaka lwakho loluvutsako lungehlele, kwesabisa kwakho kungicedzile.

¹⁷ Kungitungeleta njengemanti onkhe emalanga, kungitungeleta kanyekanye.

¹⁸ Sihlobo sami nemngani wami ubacoshile, bakhashane nami; bumnyama sebungumngani wami.