Tihlabelelo 86 - Siswati 1996 Bible

Umthandazo wekucela lusito

Umthandazo waDavide.

¹ Awu, Simakadze! Beka indlebe yakho, ungiphendvule, ngobe ngiselusizini nginguloweswele.

² Londvolota kuphila kwami, ngobe nginamatsele kuwe. Sindzisa inceku yakho lekwetsembako, ngobe wena unguNkulunkulu wami.

³ Bani nemusa kimi, Nkulunkulu, ngobe ngikhala kuwe lonkhe lilanga.

⁴ Tfokotisa umphefumulo wenceku yakho, ngobe umphefumulo wami ngiwuphakamisela kuwe, Simakadze.

⁵ Ngobe wena, Nkhosi, ulungile futsi ulungele kutsetselela, umusa wakho uyabaphuphumela labo labakhala kuwe.

⁶ Awu, Simakadze! Beka indlebe yakho ekukhulekeni kwami, uve livi lekuncusa kwami.

⁷ Ngelilanga lekuhlupheka kwami ngikhala kuwe, ngobe wena uyangiphendvula.

⁸ Kubo bonkhe bonkulunkulu kute lofanana nawe, Simakadze; kute nalokufanana nemisebenti yakho.

⁹ Tonkhe tive lotentile tiyawuta kuwe, tikhotsame embikwakho, Nkhosi yami, tibabate libito lakho.

¹⁰ Ngobe wena umkhulu, ungumenti wetimangaliso, nguwe wedvwa longuNkulunkulu.

¹¹ Ngifundzise indlela yakho, Simakadze, ngiyawuhamba ecinisweni lakho; yenta inhlitiyo yami ihlose intfo yinye: kutsi ilesabe libito lakho.

¹² Ngiyawukubonga, Simakadze, Nkulunkulu wami, ngikudvumise ngenhlitiyo yami yonkhe, ngidvumise libito lakho kuze kube phakadze.

¹³ Ngobe umusa wakho mkhulu kimi, uwephulile umphefumulo wami ekujuleni kwekufa.

¹⁴ Awu, Nkulunkulu! Tihlangananhloko tingivukele; lesishoshomane setidlova sifuna kungibulala, tona atikwati nekutsi uyini.

¹⁵ Kodvwa wena, Simakadze, unguNkulunkulu lonesihawu, nebubele, nekubeketela, uphuphuma umusa nekwetsembeka.

¹⁶ Gucukela ngakimi, ube nemusa kimi inceku yakho uyiphe emandla akho, usindzise indvodzana yencekukati yakho.

¹⁷ Ngente sibonakaliso sebuhle bakho, kuze labo labangitondzako basibone, badliwe ngemahloni, ngobe wena, Simakadze, uyangisita, ungidvudvute.