Tihlabelelo 85 - Siswati 1996 Bible

Umthandazo wekucelela Israyeli umusa waNkulunkulu

Sihlabelelo sentalelwane yaKhora lesetfulwe kumhlabelisi.

¹ Awu, Simakadze! Ulitsandzile live lakho, wabuyisela tibusiso taJakobe.

² Watsetselela emacala esive sakho, wambombota tonkhe tono tabo. Cabanga.

³ Waluyekela lulaka lwakho, wabhodla ekutfukutseleni kwakho lokumatima.

⁴ Sibuyise, Nkulunkulu wensindziso yetfu! Lahla kucansuka kwakho ngatsi.

⁵ Utasitfukutselela kuze kube phakadze yini? Kantsi lulaka lwakho utalwelula titukulwane ngetitukulwane yini?

⁶ Ungeke yini usivuselele siphile, kuze kutsi sive sakho sijabule kuwe?

⁷ Simakadze, sivise umusa wakho, usiphe insindziso yakho.

⁸ Ase ngilalele loko lokutawukhulunywa nguNkulunkulu Simakadze, ngobe ukhuluma kuthula esiveni sakhe nakulabangcwele bakhe, nabangancandzeki babuyele ebubini.

⁹ Ngempela insindziso yakhe isedvute kulabo labamesabako, kuze live letfu libe neludvumo lwakhe,

¹⁰ bese kuhlangabetana umusa neliciniso, kwangane kulunga nekuthula.

¹¹ Kuyawuhluma liciniso emhlabatsini, kulunga kulungute emhlabeni kusezulwini.

¹² Yebo, Simakadze, uyawusipha lokuhle, live letfu liyawutsela titselo.

¹³ Kulunga kuyawuhamba embikwaSimakadze, kuphendle indlela latawuhamba kuyo.