Tihlabelelo 83 - Siswati 1996 Bible

Umthandazo wekucela kubhujiswa kwetitsa tebaka-Israyeli

Sihlabelelo sa-Asafa.

¹ Awu, Nkulunkulu! Ungathuli, utente simungulu. Ungatsalalisi, Nkulunkulu.

² Ase ubuke nje, titsa takho tiyaphitsitela, nalabo labakutondzako bayakucoloshela.

³ Benta sigungu, bahlangane ngebantfu bakho, bafakane imilomo ngalabo labeluswe nguwe.

⁴ Batsi: “Wotani sibacotfule bangabe basaba ngiso sive, kuze libito laka-Israyeli lingaphindze likhunjulwe.”

⁵ Bacebisana ngawe nganhlitiyo yinye, bente sivumelwane ngawe.

⁶ Kuhlangene bonkhe baka-Edomu labasemathendeni, nebaka-Ishmayeli, nebakaMowabi, nebakaHagari,

⁷ nebakaGebali, nebaka-Amoni, nebaka-Amaleki, nemaFilisti, kanye netakhamiti taseThire.

⁸ Ngisho nebase-Asiriya bahlangene kanye nabo, babalekeleli bebatukulu baLoti. Cabanga.

⁹ Baphatse ngesandla lowaphatsa ngaso emaMidiyani, naSisera, naJabini ngasemfuleni iKhishoni,

¹⁰ labo lababhubha ngasemtini wase-Eni Dori; bawa njengebulongo, babola baze baba ngumcuba.

¹¹ Emakhosana abo wente abe njengabo-Orebi naZebi, babusi babe njengaboZeba naSalmuna.

¹² Batsi: “Asidle lelive libe lifa letfu, lelive lelingemadlelo aNkulunkulu!”

¹³ Awu, Nkulunkulu wami! Bente babe njengesiwunguwungwana, nanjengemakhoba wona apheshulwa ngumoya.

¹⁴ Njengemlilo ushisa lihlatsi, nanjengemalangabi ababela tintsaba,

¹⁵ nawe badvungulule ngesivunguvungu sakho, ubetfuse ngesiphepho sakho.

¹⁶ Yebo, Simakadze! Tsela buso babo ngelihlazo, badzimate balifune libito lakho.

¹⁷ Shangatsi bangahlazeka baphele emandla kuze kube phakadze, shangatsi bangehluleka babhubhe.

¹⁸ Shangatsi bangati kutsi nguwe wedvwa lolibito lakhe linguSimakadze, nguwe Losetikwako Konkhe, lophakeme abuse umhlaba wonkhe.