Tihlabelelo 80 - Siswati 1996 Bible

Umthandazo wekucela kutsi ema-Israyeli abuyiselwe tinhlanhla tawo

Sihlabelelo sa-Asafa lesisifakazelo. Setfulwe kumhlabelisi kutsi sihlatjelwe ngendlela letsi: “Siphephane”.

¹ Sive, Melusi waka-Israyeli, wena lohola Josefa njengemhlambi wetimvu. Wena lohlala emkhatsini wemakherubhi, bonakala ngekukhatimula kwakho.

² Vusa emandla akho embikwa-Efrayimu, naBhenjamini, naManase, ute utewusisita.

³ Sibuyisele kuwe, Nkulunkulu. Khanyisa buso bakho bumengetele, kuze sisindziswe.

⁴ Awu, Simakadze, Nkulunkulu wemabandla! Kutawuze kube ngunini ucansulwa ngimithandazo yesive sakho?

⁵ Wabapha sinkhwa ngetinyembeti, wabanatsisa ngetinyembeti.

⁶ Wenta kutsi bomakhelwane betfu basibange, titsa tetfu tisihleke bulima.

⁷ Sibuyisele kuwe, Nkulunkulu wemabandla! Khanyisa buso bakho bumengetele, kuze sisindziswe.

⁸ Wazuphuna umvini eGibhithe, wacosha tive, wase uwuhlanyela eveni lato.

⁹ Wawulungisela umhlaba wekuhlanyela, wakhula, wajula, wenaba, wagcwala live.

¹⁰ Tintsaba tambonywa ngematfunti awo, imisedari yambonywa ngemagala awo,

¹¹ enabisa emagala awo adzimate efikela elwandle, ahluma adzimate efika eMfuleni.

¹² Pho, wena uludziliteleni lolutsango loluwutungeletile lomvini? Manje bonkhe labendlulako bangateba kalula letitselo tawo.

¹³ Tingulube tesiganga tiyawuvukuta, tonkhe tilwane tesiganga tiyawudla.

¹⁴ Awu, Nkulunkulu wemabandla! Phendvuka futsi! Buka phansi usetulu ezulwini, ubone lomvini wakho, uwunakelele,

¹⁵ wona lowo mvini lowawuhlanyela ngesandla sakho sangesekudla, naleligala lotikhulisele lona.

¹⁶ Labawujubile bawushisa ngemlilo, bayawubhujiswa kubhekwa buso bakho.

¹⁷ Kodvwa shangatsi sandla sakho singamlondvolota, lowo longasesandleni sakho sekudla. Ngiyo indvodzana lotikhulisele yona.

¹⁸ Singeke siphindze sikuhlamuke, siphe kuphila siphile, tsine-ke siyawube sesikhuleka egameni lakho.

¹⁹ Sibuyisele kuwe, Nkulunkulu wemabandla! Khanyisa buso bakho bumengetele, kuze sisindziswe.