Tihlabelelo 73 - Siswati 1996 Bible

Sigaba sesitsatfu (Tihlabelelo 73 – 89) Nkulunkulu ungiko konkhe emphilweni

Sihlabelelo sa-Asafa.

¹ Ngempela, Nkulunkulu ubaphatsa kahle baka-Israyeli nalabo labamsulwa etinhlitiyweni.

² Kepha mine, tinyawo tami tacishe taphambuka, kwasala kancane kutsi tinyawo tami tishelele.

³ Ngobe nganginemona nalabatigcabhako, ngesikhatsi ngibona kuchuma kwalababi.

⁴ Abayiva iminjunju yebuhlungu nabafa, nemitimba yabo icinile, itinsakatja.

⁵ Tinhlupheko letehlela bantfu bona atisabehleli, abavelelwa ngemashwa njengabo bonkhe bantfu.

⁶ Ngako-ke kutigcabha bakwegabe entsanyeni njengeligcebesha. Budlova babembetse njengengubo.

⁷ Kukhuluphala kuwakhukhumukisile emehlo abo, imicabango yetinhlitiyo tabo iphuphuma bubi.

⁸ Bayaphukuta bakhulume lokubi; bakhuluma incindzetelo ekutiphakamiseni kwabo.

⁹ Ngemilomo yabo bahlambalata lizulu. Ngetilimi tabo bagcilata umhlaba.

¹⁰ Ngako-ke sive sakhe sijikela kubo, sibakholwe kuko konkhe labakushoko.

¹¹ Sitsi: “Nkulunkulu angati kanjani? Kukhona yini lokwatiwa nguLosetikwako Konkhe?”

¹² Lababi-ke banjalo, bakhomba ngalosekhatsi, bandzise ingcebo.

¹³ Impela ngiyihlantele lite inhlitiyo yami, ngageza tandla tami njengalote licala.

¹⁴ Ngihlushwa sonkhe sikhatsi, ngitsetsiswe onkhe emalanga.

¹⁵ Kube bengitsite: “Ngitawukhuluma njengabo,” ngabe ngihlubuke sive sakho, Simakadze.

¹⁶ Kodvwa kwatsi nase ngicabanga kutsi lendzaba ngingayiva njani, kwaba matima ngangete ngabona kahle.

¹⁷ Ngaze ngangena endlini lengcwele yaNkulunkulu, lapho ngevisisa khona ngesiphetfo sabo.

¹⁸ Ngempela, wena ubabeka endzaweni leshelelako, ubente bawe babhubhe.

¹⁹ Maye! Bacitfwa ngekucwabita kweliso, bakhukhulwe tinhlupheko letesabekako.

²⁰ Simakadze, njengekuphela kweliphupho ekuphaphameni, utawulahla titfunti tabo, nawuvuka.

²¹ Kwatsi ngesikhatsi umphefumulo wami umunyu ngatsi nangihlabeka enhlitiyweni,

²² kwakhandzaniseka kutsi angicondzisisi, nginebulima; mine ngaba nebulwane embikwakho.

²³ Noko-ke mine ngihlala nawe onkhe emalanga, ungibambe ngesandla sami sekudla,

²⁴ uyawungihola ungicondzise ngeteluleko takho, ekugcineni uyawungikhatimulisa ebukhosini.

²⁵ Ngubani lenginaye ezulwini ngaphandle kwakho? Nanginawe, kute lengikufunako la emhlabeni.

²⁶ Nome umtimba nemphefumulo wami kwehluleka, kodvwa Nkulunkulu ulidvwala lenhlitiyo yami, nesabelo selifa lami ingunaphakadze.

²⁷ Ngobe labakhashane nawe bayawubhubha, ubacitsa ubacedze labahlubuka kuwe ngekona.

²⁸ Kodvwa mine kungilungele kusondzela kuNkulunkulu, Simakadze, iNkhosi, ngimente waba siphephelo sami, kuze ngishumayele ngako konkhe lakwentile.