Tihlabelelo 71 - Siswati 1996 Bible

Umthandazo wemuntfu lomdzala

¹ Awu, Simakadze! Ngikhosela kuwe, ungavumi ngijabhiswe nakanye.

² Ngisindzise ngekulunga kwakho, ungihlenge, beka indlebe yakho ngakimi, ungisindzise.

³ Bani lidvwala lesiphephelo kimi, lengingaphephela kulo nome nini, wena lowayala kutsi ngisindziswe, ngobe nguwe lidvwala lami nesiphephelo sami.

⁴ Awu, Nkulunkulu wami! Ngephule emandleni alomubi, esandleni sesidlova lesite bucotfo, kanye nakumuntfu lonelulaka.

⁵ Ngobe nguwe, Simakadze, lolitsemba lami, Simakadze ulitsemba lami, kwasebusheni bami.

⁶ Seloku ngatalwa ngeyeme kuwe, nguwe lowangenta ngatalwa, ngiyawukudvumisa ngingakhawuli.

⁷ Kulabanyenti ngajika ngaba simanga, kepha wena usiphephelo sami lesicinile.

⁸ Umlomo wami uyawugcwala kukubonga, ngimemetele bukhosi bakho imihla ngemihla.

⁹ Ungangilahli esikhatsini sebudzala bami, ungangikhohlwa nase ngiphelelwa ngemandla.

¹⁰ Ngobe titsa tami tikhuluma kabi ngami, nalabo labafuna kungibulala bahlangene ngami bayangisongela,

¹¹ batsi: “Nkulunkulu umlahlile, asimtingele size simbambe, ngobe kute longaphindze amsindzise.”

¹² Hhawu, Nkulunkulu! Ungakhweshi kimi! Hhawu, Nkulunkulu wami! Phutfuma ungihlenge!

¹³ Shangatsi labo labafuna kuphila kwami bangadliwa ngemahloni babhubhe; shangatsi bangasibekelwa bubi nelihlazo labo labacondze kungilimata.

¹⁴ Kepha mine ngiyawukwetsembela kuwe njalonjalo, ngengete kukudvumisa ekukudvumiseni kwami.

¹⁵ Umlomo wami uyawulandza ngekulunga kwakho, uvakalise insindziso yakho onkhe emalanga, ngobe yinyenti ngehluleka nekuyikala.

¹⁶ Yebo, Simakadze, Nkulunkulu wami, imisebenti yakho lemikhulu ngiyawuyiveta ebaleni, ngibabate kulunga kwakho, wena wedvwa.

¹⁷ Yebo, Nkulunkulu, wangifundzisa kusukela ebusheni bami, kuze kube ngunyalo ngisayimemetela imisebenti yakho lemangalisako.

¹⁸ Nanyalo-ke nome sengigugile sengimphunga, ungangishiyi, Nkulunkulu, kuze ngishumayele ingalo yakho kuso situkulwane, nemandla akho kubo bonkhe labefikako.

¹⁹ Yebo, Nkulunkulu! Kulunga kwakho kukhulu kufikela etulu. Nguwe lowente tintfo letinkhulu. Empeleni, Nkulunkulu, ngubani lofana nawe?

²⁰ Nguwe lowentile kutsi ngibone tinsizi letinyenti naletibuhlungu, wangihlumelelisa futsi; wabuye wangimonyula ekujuleni kwemhlaba, wangikhiphela ngetulu kwawo.

²¹ Shangatsi ungandzisa bukhulu bami, uphindze ungidvudvute.

²² Ngiyawuphindze ngikudvumise ngehabhu, ngibonge kwetsembeka kwakho, Nkulunkulu wami, ngihlabele ngekukushayela lugubhu, ngibonge wena Longcwele waka-Israyeli.

²³ Tindzebe temlomo wami tiyawujabula, ngobe ngiyawudvumisa wena, nemphefumulo wami lowuhlengile uyawukudvumisa.

²⁴ Lulwimi lwami luyawukhuluma ngekulunga kwakho lonkhe lilanga. Ngobe labo bebafuna kungilimata bahlazekile bajabhiswa.