Tihlabelelo 7 - Siswati 1996 Bible

Umkhuleko walowo locela kutsi enanelwe

Sihlabelelo saDavide, ishikayoni, lasihlabelela Simakadze ngenca yaKushe, intalelwane yaBhenjamini.

¹ Yebo, Simakadze, Nkulunkulu wami, sengiphephele kuwe, ngisindzise ungiphephise kubo bonkhe labangitingelako,

² kuze umphefumulo wami bangawudzabudzabuli njengelibhubesi lelidzabudzabula kubete nalolamulako.

³ Simakadze, Nkulunkulu wami, nangabe kukhona lokubi etandleni tami,

⁴ nangiphindzisele ngalokubi kumnganami, nome ngaphanga sitsa sami ngaphandle kwesono,

⁵ nakunjalo-ke: Sitsa sami asingitingele size singibambe, siyigcobagcobe emhlabatsini imphilo yami, ludvumo lwami luphelele elutfulini. Cabanga.

⁶ Simakadze! Sukuma ngentfukutselo yakho. Vuka ungimele elulakeni lwetitsa tami. Nkulunkulu wami, vuka ungisite. Nguwe wedvwa lonesehlulelo lesimsulwa.

⁷ Inhlangano yetive ayisondzele ikuhace, bese uyayibusa usesihlalweni sakho sebukhosi.

⁸ Simakadze akehlulele tive. Simakadze, ngehlulele ngekulunga kwami, uhlole nebucotfo bami.

⁹ Ncandza bubi balababi, wakha lolungile, ngobe nguwe Nkulunkulu wekulunga lohlola tingcondvo netinhlitiyo.

¹⁰ Nkulunkulu usihlangu sami, yena usindzisa labacotfo ngenhlitiyo.

¹¹ Nkulunkulu ungumehluleli lolungile, yena unguNkulunkulu lophambana nebubi onkhe emalanga.

¹² Nangabe umuntfu angaphendvuki, Nkulunkulu ulola inkemba yakhe, antsalele kunemba ngebutjoki bakhe,

¹³ ulungisa tikhali takhe letinebutsi, ente imicibisholo yakhe ivutse umlilo.

¹⁴ Asubuke nje kutsi lomubi unemhelo webubi, wemitsa kuganga, atale emanga.

¹⁵ Umba umgodzi wekuhholokoshisela labanye, bese kuhholokoshela yena kulomgodzi lawumbile.

¹⁶ Kuganga kwakhe kubuyela enhloko yakhe, buhlophoyi bakhe behlele ebuntini lakhe.

¹⁷ Simakadze ngiyawumbonga ngekulunga kwakhe, ngihlabelele ngekudvumisa libito laSimakadze Losetikwako Konkhe.