Tihlabelelo 6 - Siswati 1996 Bible

Umthandazo wekucela kuhawukelwa ngesikhatsi setinhlupheko (Sihlabelelo sekucala sekutisola)

Sihlabelelo saDavide lesetfulwe kumhlabelisi kutsi sihlatjelwe ngetingubhu letinetintsambo nangesishiminithi.

¹ Awu, Simakadze, ungangijezisi ngentfukutselo yakho, ungangishayi ngelulaka lwakho.

² Ngihawukele, Simakadze, ngobe sengidzangele, sengikhatsele, ngiphilise, Simakadze, ngobe ematsambo ami ayatfutfumela.

³ Umphefumulo wami utfutfumela kakhulu. Pho, Simakadze, utawuze ungisite nini?

⁴ Buya, Simakadze, ungephule ekufeni, khulula umphefumulo wami, ngobe umusa wakho awupheli.

⁵ Kute lokukhumbulako ekufeni. Ngubani lokudvumisako nje ethuneni?

⁶ Ngikhatsele kububula kwami, ngimantisa umcamelo wami ebusuku, ngimantise nembhedze wami ngetinyembeti.

⁷ Liso lami liyadzikita ngenca yelusizi. Liso lami liyaguga ngenca yekukhaliswa titsa tami.

⁸ Khweshani kimi, nonkhe nine benti balokubi, ngobe Simakadze sewukuvile kukhala kwami.

⁹ Simakadze sewukuvile kuncusa kwami. Simakadze sewukwemukele kukhuleka kwami.

¹⁰ Tonkhe titsa tami tiyawuhlazeka titfutfumele kakhulu, tidliwe ngemahloni, tibaleke masinyane.