Tihlabelelo 57 - Siswati 1996 Bible

Umthandazo wekucela kusindziswa ekuhlushweni

Sihlabelelo saDavide lesiyimiktamu leligugu njengegolide kuye. Wasihlabela asemgedzeni ngesikhatsi abalekele Sawula; setfulwe kumhlabelisi kutsi sihlatjelwe ngendlela letsi: “Ungabhubhisi.”

¹ Ngihawukele, Nkulunkulu, ngihawukele, ngobe wena usiphephelo semphefumulo wami, ngiyawukhosela emtfuntini wemaphiko akho, kuze kwendlule tivunguvungu temashwa.

² Ngikhala kuNkulunkulu Losetikwako Konkhe, kuNkulunkulu longifezela tinjongo takhe.

³ Uyawutfumela asezulwini, angisindzise, ahlazise labo labangigcobagcobako. Cabanga. Nkulunkulu uyawubonakalisa umusa wakhe nekwetsembeka kwakhe.

⁴ Ngisemkhatsini wemabhubesi, labantfu labashwabudzelanako. Ematinyo awo atikhali nemicibisholo, tilwimi tawo tinkemba letikhaliphako.

⁵ Nkulunkulu, phakama ube ngetulu kwemazulu, inkhatimulo yakho yengamele umhlaba wonkhe.

⁶ Tinyatselo tami batibekele lugibe, umphefumulo wami ushone phansi. Bembe umgodzi wekungihholokoshisela endleleni yami, kodvwa sekuhholokoshele bona. Cabanga.

⁷ Inhlitiyo yami ime sibindzi, Nkulunkulu, inhlitiyo yami ime sibindzi, ngiyawuhlabela ngibonge ludvumo lwakho.

⁸ Vuka, mphefumulo wami, vuka habhu yami, nawe lugubhu lwami. Ngiyawuphaphamisa intsatsakusa.

⁹ Ngiyawukubonga emkhatsini wetive, Simakadze, ngikudvumise emkhatsini wetive.

¹⁰ Ngobe umusa wakho mukhulu, ufikela etulu emazulwini, nekwetsembeka kwakho kufikela emafini.

¹¹ Nkulunkulu, phakama ube ngetulu kwemazulu, inkhatimulo yakho yengamele umhlaba wonkhe.