Tihlabelelo 53 - Siswati 1996 Bible

Bulima nekukhohlakala kwemuntfu

Sihlabelelo saDavide lesiyimaskili; setfulwe kumhlabelisi kutsi sihlatjelwe ngendlela letsi: “Mahalathi.”

¹ Silima sikhuluma enhlitiyweni yaso sitsi: “Kute Nkulunkulu la.” Babi, benta emanyala, kute nome munye lowenta lokulungile.

² Nkulunkulu utsi asezulwini abe abuka bonkhe bantfu, kuze atewubona kutsi ukhona yini umuntfu lohlakaniphile, nome munye nje, lofuna Nkulunkulu.

³ Bonkhe bedukile, bonkhe bonakele, kute lowenta lokulungile; kute, kute ngisho nome munye.

⁴ Pho, bate yini lwati labantfu labenta lokubi? Badla bantfu bami kube shangatsi badla sinkhwa, bangathandazi nakuNkulunkulu.

⁵ Bayawufikelwa kwesaba lokukhulu, besabe ngisho nelite. Ngobe Nkulunkulu uyawasakata ematsambo alabo labakuhlaselako, uyawubahlazisa, ngobe Nkulunkulu wabadvuba wabalahla.

⁶ Shangatsi ingavela eSiyoni insindziso yesive saka-Israyeli. Mhlazana Nkulunkulu acedza lusizi lwebantfu bakhe, aphindze abahlumelelisa, Jakobe uyawujabula, Israyeli atfokote.