Tihlabelelo 51 - Siswati 1996 Bible

Umthandazo wekucela kutsetselelwa (Sihlabelelo sesine sekutisola)

Sihlabelelo saDavide lesetfulwe kumhlabelisi. Wasihlabela emvakwekufika kwemphrofethi Nathani, labefike wamtjela ngesono sakhe sekuphinga naBhathisheba.

¹ Ngihawukele, Nkulunkulu, ngekwemusa wakho; yesula tiphambuko tami ngekwesihawu sakho lesikhulu.

² Ngigezisise ebubini bami, ngihlambulule esonweni sami.

³ Ngobe ngiyatati tiphambuko tami, sono sami sisembikwami njalo.

⁴ Ngonile kuwe, wena wedvwa, ngente lokunengekako emehlweni akho; ngako kwehlulela kwakho kumsulwa, nekungilahla kwakho ngelicala kulungile.

⁵ Empeleni ngatalwa vele ngisesonweni, ngaba soni kusukela make atsatsa sisu.

⁶ Ngempela, wena utsandza liciniso lelingekhatsi enhlitiyweni; ngako-ke uyawungifundzisa timfihlakalo tekuhlakanipha kwakho.

⁷ Ngihlambulule ngehisophu, ngitewuhlambuluka. Ngigeze ngibe mhlophe kunangcocwane.

⁸ Ngigcwalise ngekujabula lokujulile, kuze kutsi ematsambo ami lephukile atfokote.

⁹ Fihla buso bakho etonweni tami, wesule bonkhe bubi bami.

¹⁰ Hhawu, Nkulunkulu, dala kimi inhlitiyo lehlantekile, uvuselele kimi umoya wekulunga.

¹¹ Ungangicoshi ebusweni bakho, ungangemuki Moya wakho Longcwele.

¹² Buyisela kimi kutfokota kwensindziso yakho, ungisimise ngekungipha umoya lovumako,

¹³ ngiyawube sengifundzisa lababi tindlela takho, netoni tiyawuphendvuka tibuyele kuwe.

¹⁴ Hhawu, Nkulunkulu, ngikhulule ecaleni lengati, Nkulunkulu wensindziso yami, khona lulwimi lwami luyawuhlabela kulunga kwakho.

¹⁵ Hhawu, Nkhosi, vula tindzebe temlomo wami, kuze ngivakalise ludvumo lwakho.

¹⁶ Ngobe futsi ungeke weneliswe yimihlatjelo, nome bengingakunika yona, ngisho nemhlatjelo wekushiswa wonkhe ungeke ukhone kukujabulisa.

¹⁷ Umhlatjelo lowemukeleka kuNkulunkulu ngumoya lowephukile nenhlitiyo ledzabukile. Nkulunkulu ngeke awubukele phansi.

¹⁸ Yentela iSiyoni lokuhle ngekwemusa wakho, utakhe kabusha tindvonga taseJerusalema.

¹⁹ Khona-ke uyawujabula ngemihlatjelo lengiyo, ngeminikelo leshiswa yonkhe, khona-ke bayawunikela ngetinkunzi elatini lakho.