Tihlabelelo 5 - Siswati 1996 Bible

Umthandazo wekucela kuvikelwa

Sihlabelelo saDavide lesetfulwe kumhlabelisi kutsi sihlatjelwe ngetingubhu.

¹ Awu, Simakadze, lalela emavi ami, ubeke indlebe yakho kuwo, ungivele nangibubula kuwe.

² Vani livi lekukhala kwami, ungisite, Nkhosi yami naNkulunkulu wami, ngobe ngithandaza kuwe, Simakadze.

³ Simakadze, nakudzabuka kusa, uyaliva livi lami; nakudzabuka kusa, ngihlela ticelo tami kuwe, bese ngiyema ngilindzela wena.

⁴ Ngobe wena, Simakadze, unguNkulunkulu longakutsandzi lokubi, lomubi angeke akhone kuhlala nawe.

⁵ Labatigabatisako bashayeka phansi nawubhekisa buso bakho ngakubo. Uyabatondza bonkhe labenta lokubi.

⁶ Uyababhubhisa labacala emanga. Simakadze uyamenyanya umbulali, futsi uyamenyanya lonemacebo.

⁷ Kepha mine ngiyawungena endlini yakho ngekwengcebo yemusa wakho, ngikukhonte ngenhlonipho yekwesaba ethempelini lakho lelingcwele.

⁸ Simakadze, ngihole ngekulunga kwakho, ngobe nginetitsa, condzisa indlela yakho embikwami.

⁹ Kute liciniso emlonyeni wato, etinhlitiyweni tato kunekubulala, umphimbo wato ulithuna lelivulekile, lulwimi lwato lunebucili.

¹⁰ Tilahle ngelicala lato, Nkulunkulu, tente tibanjwe nguleto tingibe tato, tidzingise ngenca yetono tato letinyenti, ngobe phela setikuhlubukile.

¹¹ Kepha abajabule bonkhe lababalekele kuwe, abahlabele ngenjabulo kuze kube phakadze. Babiyele labo labakutsandzako, kuze badvumise libito lakho.

¹² Simakadze, nguwe lobusisa lolungile. Umfukamela ngemusa wakho, kube shangatsi kungelihawu.