Tihlabelelo 43 - Siswati 1996 Bible

Kucela Kukhululwa

¹ Hhawu Nkulunkulu, ngikhulumele ungimele ecaleni lami. Ungephule esiveni lesingamesabi Nkulunkulu, ungikhulule nakumuntfu lonemacebo nalongakalungi!

² Ngobe wena, Nkulunkulu, uyinqaba yami. Ungilahleleni? Kungani ngihambe ngilila ngenca yekucindzetelwa titsa?

³ Tfumela kukhanya kwakho neliciniso lakho, kutsi kutengihola. Shangatsi kungangiyisa entsabeni lengcwele lapho kuhlala wena khona.

⁴ Ngiyawusondzela elatini laNkulunkulu, kuNkulunkulu longumtfombo wenjabulo yami, ngikudvumise ngehabhu, ngidvumise Nkulunkulu, Nkulunkulu wami.

⁵ Mphefumulo wami, udzabukeleni? Uvungamelani ngekhatsi kwami? Mani kuNkulunkulu, ngobe ngisetawumdvumisa uMsindzisi wami naNkulunkulu wami.